NGASEKUPHELENI kwa-1950, babe waJohn wabhajatiswa waba nguFakazi WaJehova edolobheni lelincane laseNdiya iGujarat. John, make wakhe kanye nebantfwana bakubo labasihlanu bebangemaRoma Katolika futsi bebaphikisana nenkholo yababe wabo.

Ngalelinye lilanga, babe waJohn wamcela kutsi amikisele umzalwane imvilophu letsite. Ekuseni ngalelo langa, John bekatisike umuno ngesikhatsi etama kuvula sikotela lesikhulu. Ngenca yekutsi abemhlonipha babe wakhe, John wabopha lesilondza ngendvwangu wase uhamba ngetinyawo wayomikisa lemvilophu.

Nakefika, watfola umfati walomzalwane labebamtfume kuye futsi naye abengulomunye waBoFakazi BaJehova. Nakatsatsa lemvilophu, lodzadze wasibona lesilondza saJohn futsi wamsita. Wawugeza lomuno wakhe lobewulimele, wawugcobisa ngemutsi wase uyambhandisha. Wase sewumentela litiya futsi bachubeka bacoca kamnandzi ngeliBhayibheli.

Inzondo John labenayo ngaBoFakazi beseyinciphile, ngako wambuta ngetintfo letimbili bona nababe wakhe lebebangavumelani kuto. Wambuta kutsi Jesu unguNkulunkulu yini nekutsi emaKhristu kufanele athantaze yini kuMariya. Njengobe lodzadze besekalwati lulwimi lolukhulunywa nguJohn lwesiGujarati, wamphendvula asebentisa liBhayibheli futsi wamnika incwajana letsi “This Good News of the Kingdom.”

Watsi nasekayifundza lencwajana, John wabona kutsi loko labekufundza bekuliciniso leliseBhayibhelini. Waya kumphristi wabo futsi wambuta imibuto lefanako. Lomphristi watfukutsela kakhulu futsi wamshaya ngeliBhayibheli, wamtsetsisa watsi: “Wena sewugucuke waba nguSathane! Ngitjengise kutsi kukuphi eBhayibhelini lakutsi khona Jesu akasuye Nkulunkulu. Shano nekutsi kukuphi lapho kutsi khona singathantazi kuMariya. Ngitjengise!” John wetfuka kakhulu ngendlela umphristi lamphendvula ngayo, ngako watsi kulomphristi: “Angiyuphindze ngiligcobe esontfweni lemaKatolika.” Vele akaphindzanga!

John wacala kudadisha liBhayibheli naBoFakazi BaJehova, walimela liciniso futsi wacala kukhonta Jehova. Ngekuhamba kwesikhatsi, nalabanye bakubo benta lokufanako. Nanobe sekuphele iminyaka lengu-60, solo sisekhona lesibati saJohn. Nanyalo solo usawukhumbula umphumela wesento semusa lesamdvonsela ekukhonteni kweliciniso.​—2 Khor. 6:4, 6.