1. Singamlalela njani Nkulunkulu futsi sihloniphe bohulumende bebantfu?

LIBHAYIBHELI lisifundzisa kutsi silalele bohulumende bebantfu, kodvwa liphindze lisitjele kutsi kufanele sihlale silalela Nkulunkulu. (Imisebenti 5:29; Thithusi 3:1) Kungenteka njani loko? Jesu wachaza simiso lesisisita sati kutsi ngubani lokufanele simlalele. Watsi kufanele sinike ‘Khesari lokukwakhe, kodvwa sinike Nkulunkulu lokukwakhe.’ ^[1] (Fundza kwatiswa lokusekugcineni.) (Matewu 22:21) Sinika “Khesari lokukwakhe” nangabe silalela imitsetfo yahulumende, sihlonipha tiphatsimandla futsi sibhadala imitselo. (Roma 13:7) Kodvwa nangabe hulumende asitjela kutsi sente intfo letsite Nkulunkulu langayifuni, asivumi kuyenta kodvwa loko sikusho ngenhlonipho.

2. Sikhombisa njani kutsi asitingeneli tindzaba tepolitiki letenteka kulelive?

² Lenye indlela ‘lesinika ngayo Nkulunkulu lokukwakhe’ kutsi singatingeneli tindzaba tepolitiki. Asitingeneli tindzaba letenteka kulelive. (Isaya 2:4) Asiphikisani nabohulumende bebantfu ngobe nguJehova lovumele kutsi babuse. Siphindze singayingeneli imisebenti lebonisa kutsandza kakhulu live. (Roma 13:1, 2) Asetami kushintja bohulumende nobe setame  kusekela bosopolitiki, futsi asivoti elukhetfweni nobe sibe bosopolitiki.

3. Kungani kungakafaneli sitingene tindzaba tepolitiki?

³ Tinyenti tizatfu letenta Nkulunkulu atsi singatingeni tindzaba tepolitiki. Sizatfu sekucala kutsi silingisa Jesu, ngobe bekangasiyo “incenye yelive.” Akazange atingene tindzaba tepolitiki nobe timphi. (Johane 6:15; 17:16) Lesinye sizatfu kutsi sisekela uMbuso waNkulunkulu. Ngenca yekutsi asibasekeli bohulumende bebantfu, siba nanembeza lohlantekile nasitjela bantfu kutsi nguMbuso waNkulunkulu kuphela lotawucatulula tonkhe tinkinga tebantfu. Tinkholo temanga tiyatingenela tindzaba tepolitiki futsi tehlukanisa bantfu. Ngesizatfu sekutsi asitingeni tindzaba tepolitiki, sinebunye nebazalwane nabodzadzewetfu emhlabeni wonkhe.​—1 Phetro 2:17.

4. (a) Sati njani kutsi kutawuba matima kakhulu kungatingeni tindzaba tepolitiki? (b) Kungani kufanele sitilungiselele nyalo kungatingeni tindzaba tepolitiki?

⁴ Kungenteka sihlala endzaweni lapho bantfu bangenankinga nekutsi siyatingena yini tindzaba tepolitiki. Kodvwa njengobe sisondzela ekupheleni kwalesimiso saSathane, kutawuba matima kakhulu ngatsi kuchubeka singatingeni tindzaba tepolitiki. Lamuhla bantfu ‘abavumi kwenta tivumelwane,’ ‘banenkhani’ futsi batawuchubeka behlukana kakhulu. (2 Thimothi 3:3, 4) Labanye bazalwane betfu sekuvele kuyabatsintsa loku ngenca yelushintjo lolwenteka kutepolitiki emaveni abo. Kungako kudzingeka kutsi sitilungiselele nyalo kungatingeni tindzaba tepolitiki. Asesicoce ngetintfo letine lesingatenta kuze sitilungiselele.

5. Jehova ucabangani ngabohulumende bebantfu?

⁵ Lenye indlela lesingatilungiselela ngayo kuchubeka singatingeni tindzaba tepolitiki, ikutsatsa bohulumende bebantfu ngendlela Jehova labatsatsa ngayo. Jehova akazange anikete bantfu lilungelo lekubusa labanye ngesikhatsi abadala. (Jeremiya 10:23) Bonkhe bantfu ubatsatsa njengemndeni munye. Kodvwa bohulumende babahlukanisile bantfu ngobe bacabanga kutsi sive sabo ngiso lesincono kakhulu. Ngisho nobe bohulumende bakahle, kodvwa angeke bakhone kucatulula tonkhe tinkinga. Bohulumende batitsa teMbuso waNkulunkulu lowacala kubusa nga-1914. Madvutane loMbuso utawususa bonkhe bohulumende bebantfu.​—Fundza Tihlabelelo 2:2, 7-9.

6. Kufanele sibaphatse njani labo labaneligunya kuhulumende?

⁶ Nkulunkulu uvumele bohulumende bebantfu kutsi babe khona ngobe balondvolota kuthula nekuhleleka. Loku kusisita sikhone kushumayela tindzaba letimnandzi letimayelana neMbuso waNkulunkulu. (Roma 13:3, 4) Nkulunkulu usitjela kutsi sithantazele labo labasemagunyeni kuze sitokhona kumkhonta ngekuthula. (1 Thimothi 2:1, 2) Nangabe siphatfwa kabi, singacela lusito kulabo labasemagunyeni  ahulumende. Nguloko Pawula lakwenta. (Imisebenti 25:11) Nanobe liBhayibheli litsi Sathane ulawula bohulumende bebantfu, kodvwa alisho kutsi ulawula umuntfu ngamunye loneligunya kuhulumende. (Lukha 4:5, 6) Ngako akukafaneli sente labanye bacabange kutsi siphatsimandla sahulumunde lesitsite silawulwa nguDeveli. LiBhayibheli litsi akukafaneli sikhulume kabi ngalabanye.​—Thithusi 3:1, 2.

7. Ngukuphi kucabanga lokufanele sikugweme?

⁷ Silalela Nkulunkulu ngekutsi sigweme kutsandza sopolitiki lotsite nobe licembu lepolitiki, ngisho nobe imibono yabo ingasizuzisa. Ngaletinye tikhatsi loko ngeke kube melula. Nasi sibonelo: Cabanga ngebantfu labavukela hulumende ngenca yekutsi ubangele kuhlupheka lokukhulu, ngisho nakuBoFakazi BaJehova imbala. Kuliciniso kutsi angeke ulijoyine lelicembu lelivukelako, kodvwa ungacabanga yini kutsi labo labavukelako benta intfo lekahle futsi ufise kutsi baphumelele? (Efesu 2:2) Nangabe singafuni kungenela tindzaba tepolitiki, kufanele sikugweme kucabanga kutsi luhlangotsi lolutsite lukahle nobe luncono kunalolunye. Loku kutawubonakala endleleni lesikhuluma ngayo nobe lesenta ngayo tintfo.

8. Nangabe kumatima kungatingeni tindzaba tepolitiki, singakhombisa njani kutsi ‘sicaphile’ kodvwa ‘asisoleki’?

⁸ Indlela yesibili yekungatingeni tindzaba tepolitiki kutsi ‘sicaphele njengetinyoka kepha singasoleki njengematuba.’ (Fundza Matewu 10:16, 17.) ‘Siyacaphela’ nangabe sicabanga kusenesikhatsi ngebumatima lesingahle sibhekane nabo. Siba ‘ngulabangasoleki’ nangabe singatingeneli tindzaba tepolitiki ngaleto tikhatsi letimatima. Asesicoce ngaletinye taletimo kanye naloko lesingakwenta kuze singatingeneli tindzaba tepolitiki.

9. Yini lokufanele siyicaphele nasicoca nalabanye?

⁹ Tincociswano. Kufanele sicaphele kakhulu nangabe bantfu bacala kukhuluma ngetindzaba tepolitiki. Nasi sibonelo: Nangabe sicoca nemuntfu lotsite mayelana neMbuso waNkulunkulu, akukafaneli sivumelane naye nobe siphikisane naye ngemibono yelicembu lelitsite letepolitiki nobe umholi walo. Esikhundleni sekutsi sicoce ngaloko bantfu labafuna kukwenta kuze bacatulule tinkinga tebantfu, bakhombise loko lokuseBhayibhelini mayelana nendlela uMbuso waNkulunkulu lotaticedza ngayo letinkinga ngalokuphelele. Nangabe bantfu bafuna kuphikisana ngendzaba letsite, njengekushada kwebantfu bebulili lobufanako nobe kukhipha sisu, batjele loko lokushiwo liVi laNkulunkulu nekutsi wena utama kwenta loko lelikushoko ekuphileni kwakho. Nangabe lotsite atsi imitsetfo letsite kufanele ishintjwe nobe isuswe, akukafaneli sitsatse luhlangotsi kuleyo ndzaba, futsi asimphoceleli loyo muntfu kutsi ashintje umbono wakhe.

10. Singakhombisa njani kutsi asitingeneli tindzaba tepolitiki nasibukela nobe sifundza lokutsite lokuvela kubetindzaba?

¹⁰ Betindzaba. Ngaletinye tikhatsi tindzaba letisematseni tetfulwa ngendlela yekutsi kuvakale kutsi basekela luphi luhlangotsi endzabeni letsite. Loku kuvame kwenteka ikakhulukati emaveni lapho tindzaba tilawulwa nguhulumende. Nangabe betindzaba nobe tintsatseli batsatsa luhlangotsi endzabeni letsite, kufanele sicaphele singacabangi ngendlela labenta ngayo. Nasi sibonelo: Ungase utibute,  ‘Ngiyakutsandza yini kulalela intsatseli letsite ngenca yekutsi ngivumelana naloko lekushoko mayelana netindzaba tepolitiki?’ Kuze ungatingeni tindzaba tepolitiki, kugweme kubukela nobe kufundza tindzaba letinyenti letisekela luhlangotsi lolutsite etindzabeni tepolitiki. Esikhundleni saloko yetama kutfola tindzaba letingalutsatsi luhlangotsi. Ngaso sonkhe sikhatsi catsanisa loko lokuvako ‘nemavi laphilile’ latfolakala eBhayibhelini.​—2 Thimothi 1:13.

11. Kungani kungase kube matima kungatingeni tindzaba tepolitiki nangabe tintfo lesenato tibaluleke kakhulu kitsi?

¹¹ Umcebo. Nangabe imali netintfo lesinato kubaluleke kakhulu kitsi, singahle sikutfole kumatima kungatingeneli tindzaba talelive. Ngemuva kwa-1970 BoFakazi labanyenti eMalawi kwadzingeka kutsi balahlekelwe ngito tonkhe tintfo lebebanato ngobe bala kujoyina licembu lepolitiki. Lokudzabukisako kutsi labanye bakutfola kumatima kushiya imphilo yabo lentofontofo. Lomunye dzadze ligama lakhe lokunguRuth uyakhumbula: “Labanye lesatfunjwa nabo kwatsi ngemuva kwesikhatsi bajoyina licembu lepolitiki futsi babuyela emakhaya ngobe bebangafuni kuphatfwa kabi kulenkambu lebesitfunjwe kuyo.” Kodvwa bantfu baNkulunkulu labanyenti abasinjalo. Abatingeni tindzaba tepolitiki ngisho nobe loko kungaba nemphumela wekutsi balahlekelwe ngiko konkhe labanako nobe baphelelwe yimali.​—Hebheru 10:34.

12, 13. (a) Uyini umbono waJehova ngebantfu? (b) Singabona njani nangabe sesicala kutigabatisa ngelive letfu?

¹² Kutigabatisa. Kuvamile kubantfu labanyenti kutsi batigabatise nobe batikhukhumete ngelibala labo, buve babo, lisiko labo, lidolobha lakubo nobe live labo. Kodvwa Jehova akacabangi kutsi umuntfu nobe sive lesitsite sincono kunalesinye. Kuye sonkhe siyalingana. Kuliciniso kutsi sonkhe Jehova wasidala sangafani kulomunye nalomunye futsi singakujabulela nobe sikutsandze lokwehlukahluka kwetfu. Jehova akafuni kutsi siwayekele emasiko etfu. Kodvwa akafuni kutsi siticabange sincono kunalabanye.​—Roma 10:12.

¹³ Akukafaneli sitigabatise ngelive lakitsi nobe ngesive lesicabanga kutsi sincono kunalesinye. Nangabe sitiva ngaleyo ndlela, kungase kube matima kungatingeneli tindzaba talelive. Loku kwenteka ngelikhulu lekucala. Labanye bazalwane lebebakhuluma siHebheru bebangabaphatsi kahle bafelokati labebakhuluma siGriki. (Imisebenti 6:1) Singabona ngani kutsi sesicala kutigabatisa? Nangabe umzalwane nobe dzadze lobuya kulelinye live akuniketa seluleko, kuyenteka yini ucabange kutsi: ‘Tintfo sitenta kancono lana,’ bese awusitsatsi leseluleko? Nangabe wenta njalo, khumbula nangu umyalo lobalulekile lotsi: “Ngekutfobeka nitsatse labanye njengalabakhulu kunani.”​—Filiphi 2:3.

14. Umthantazo ungasisita njani, futsi ngusiphi sibonelo lesiseBhayibhelini lesifakazela loko?

¹⁴ Indlela yesitsatfu yekuchubeka singatingeneli tindzaba talelive, kwetsembela  kuJehova. Thantaza ucele umoya longcwele lotakusita ukhone kubeketela futsi utibambe. Lobuntfu butakusita nangabe hulumende angaketsembeki nobe enta intfo lengakalungi. Cela Jehova akuphe kuhlakanipha kuze ukhone kubona simo lesingahle sikwente kube matima ngawe kuchubeka umsulwa. Mcele akusite wente lokukahle kuleso simo. (Jakobe 1:5) Ungahle uboshwe nobe ujeziswe ngaletinye tindlela ngenca yekutsi wetsembekile kuJehova. Nangabe kunjalo, thantaza ucele sibindzi kuze ukhone kuchazela labanye ngalokucacile kutsi kungani ungatingeneli tindzaba talelive. Ungaciniseka kutsi Jehova utakusita ukhone kubeketela.​—Fundza Imisebenti 4:27-31.

15. LiBhayibheli lingasisita njani kutsi sichubeke simsulwa? (Hlola libhokisi lelitsi “ LiVi LaNkulunkulu Lacinisa Kukholwa Kwabo.”)

¹⁵ Jehova usinikete liBhayibheli kuze lisicinise. Zindla ngemavesi latakusita uhlale umsulwa. Yetama kuwafundza lamavesi futsi uwakhumbule ngobe atakusita nangabe kwenteka ungabi nalo liBhayibheli. LiBhayibheli lingaphindze licinise litsemba lonalo ngaloko Nkulunkulu lakushoko ngelikusasa. Siyalidzinga lelitsemba kuze sikhone kubeketela nasiphatfwa kabi. (Roma 8:25) Khetsa emavesi lachaza tintfo lofisa kutijabulela emhlabeni lomusha futsi uticabange ulapho.

16, 17. Yini lesingayifundza etibonelweni tetinceku taNkulunkulu letetsembekile letachubeka timsulwa nativivinywa? (Buka sitfombe lesisekucaleni kwalesihloko.)

¹⁶ Indlela yesine lengasisita kutsi singatingeni tindzaba talelive, kucabanga ngetibonelo tetinceku taJehova letetsembekile. Labanyenti bebanesibindzi ngetikhatsi teliBhayibheli futsi benta tincumo letihlakaniphile letabasita kutsi bahlale bamsulwa. Cabanga ngaShadraki, Meshaki, na-Abednego, labala kukhonta sitfombe lebesimelela hulumende waseBhabhulona. (Fundza Danyela 3:16-18.) Lokulandzisa lokuseBhayibhelini kusita BoFakazi labanyenti lamuhla kutsi babe nesibindzi futsi bangavumi kushayela ifulegi yelive labahlala kulo indesheni. Jesu akazange  atingene tindzaba tepolitiki nobe tindzaba letehlukanisa bantfu. Bekati kutsi sibonelo sakhe lesihle sitawubasita bafundzi bakhe. Watsi: “Manini sibindzi! Mine ngilincobile live.”​—Johane 16:33.

¹⁷ BoFakazi labanyenti lamuhla abatingeni tindzaba tepolitiki. Labanye babo bahlushwa, bafakwa emajele, futsi labanye baze babulawa ngenca yekutsi betsembekile kuJehova. Sibonelo sabo singasisita kutsi sibe nesibindzi. Lomunye umzalwane waseTurkey watsi: “Franz Reiter bekangumzalwane losemusha lowabulawa ngenca yekutsi wala kujoyina libutfo laHitler. Incwadzi layibhalela make wakhe ngebusuku bangaphambi kwekutsi abulawe iyakhombisa kutsi abenekukholwa lokucinile kuJehova nesibindzi, futsi nami bengifuna kulandzela sibonelo sakhe nangabe ngibhekana nebumatima.” ^[2]​—Fundza kwatiswa lokusekugcineni.

18, 19. (a) Emalunga elibandla angakusita njani kutsi ungatingeni tindzaba tepolitiki? (b) Yini lotimisele kuyenta?

¹⁸ Bazalwane nabodzadze labasebandleni lokulo bangakusita kutsi ungatingeni tindzaba tepolitiki. Tjela labadzala belibandla nangabe usesimeni lesimatima. Bangakunika seluleko lesikahle lesivela eBhayibhelini. Nangabe emalunga elibandla asati simo lokuso, nawo angakukhutsata. Wacele kutsi akufake emithantazweni yawo. Kodvwa natsi kufanele sibasekele bazalwane betfu futsi sibathantazele. (Matewu 7:12) Kuze utfole luhla lwemagama ebazalwane lababoshiwe, hlola sihloko lesiku-jw.org/zu, lesitsi “OFakazi BakaJehova Baboshelwe Ukholo Lwabo​—Ngokwezindawo,” lesitfolakala ngaphansi kwencenye letsi IZINDABA > IZINDABA ZOMTHETHO. Khetsa emagama lambalwa bese ucela Jehova kutsi abasite labazalwane nabodzadze kutsi babe nesibindzi futsi bachubeke betsembekile kuye.​—Efesu 6:19, 20.

¹⁹ Njengobe sisondzela ekupheleni kwalelive, singalindzela kutsi bohulumende basicindzetele kakhulu. Kungako kubalulekile ngatsi kutsi sitilungiselele nyalo kuhlala simsulwa kulelive lelehlukene ekhatsi.