1, 2. (a) Ngubuphi bumatima tivakashi letinyenti letihlangabetana nabo? (Buka sitfombe lesisekucaleni kwalesihloko.) (b) LiBhayibheli liseluleka kutsi senteni njengemaKhristu, futsi ngumiphi imibuto lesitawucoca ngayo?

EMINYAKENI lengu-30 leyendlulile, Osei  ^[1] lebengasuye Fakazi ngaleso sikhatsi, waya eYurophu asuka eGhana. Utsi: “Ngasheshe ngabona kutsi bantfu bebangenandzaba nami. Bekubandza kakhulu. Nangisuka esikhumulweni setindiza ngeva emakhata lengingazange sengiweve, ngako ngakhala.” Ngenca yekutsi Osei bekangakhulumi lulwimi lwendzawo, kwamtsatsa sikhatsi lesingetulu kwemnyaka kutsi atfole umsebenti. Kuba khashane nemndeni wakubo kwamenta wativa anesitunge futsi wakhumbula ekhaya.

² Bewungatsandza kutsi labanye bakuphatse njani nawungaba sesimeni lesifanako? Bewungete wakujabulela yini kwemukelwa kahle nawufika eHholweni LeMbuso, kungakhatsaliseki kutsi usive sini nobe libala lakho linjani? Ecinisweni, liBhayibheli leluleka emaKhristu eliciniso litsi: “Ningakukhohlwa kwemukela tivakashi.”   (Heb. 13:2) Ase sicoce nganayi imibuto: Jehova utibheka njani tivakashi? Kungani kufanele sibe nembono lomuhle ngetivakashi? Yini lesingayenta kuze labo lababuya kulamanye emave bative basekhaya nabasebandleni letfu?

3, 4. Ngekusho kwemBhalo wa-Eksodusi 23:9, bantfu baNkulunkulu bekufanele batiphatse njani tihambi, futsi kungani?

³ Ngemuva kwekuba Jehova akhulule bantfu bakhe eGibhithe, wabanika imitsetfo lebeyikhombisa kutsi kwakufanele babacabangele labo lebebangasiwo ema-Israyeli. (Eks. 12:38, 49; 22:21) Njengobe letihambi betingenalutfo, Jehova wenta indlela yekutsi tikhone kuphila. Lenye indlela lebebangatiphilisa ngayo bekulilungelo labanalo lekukhwimita.​—Lev. 19:9, 10.

⁴ Kunekutsi Jehova atjele ema-Israyeli kutsi ahloniphe tihambi, wawacela kutsi atiphatse kahle. (Fundza Eksodusi 23:9.) Ema-Israyeli bekati kutsi ‘kunjani kuba sihambi.’ Ngisho nalapho asengakabi tigcila, ema-Hebheru bekaphatfwa kabi ngemaGibhithe ngenca yebuve babo nobe inkholo yabo. (Gen. 43:32; 46:34; Eks. 1:11-14) Ema-Israyeli bekakwati kahle kuphatfwa kabi njengetihambi, kodvwa Jehova bekalindzele kutsi tihambi batiphatse ‘njengebantfu bakubo.’​—Lev. 19:33, 34.

5. Yini lengasisita silingise Jehova ngekutsi sibaphatse kahle labo lababuya kulamanye emave?

⁵ Nalamuhla, singaciniseka kutsi Jehova utiva ngendlela lefanako ngalabo lesiba nabo emihlanganweni yetfu lababuya kulamanye emave. (Dut. 10:17-19; Mal. 3:5, 6) Nasingacabanga ngebumatima lababhekana nabo, njengekubandlululwa nobe kungakhoni kukhuluma kahle lulwimi lwendzawo, sitasibona sidzingo sekubaphatsa kahle.​—1 Phet. 3:8.

6, 7. Yini lebonisa kutsi emaKhristu elikhulu lekucala alwisana nelubandlululo?

⁶ EmaKhristu angelikhulu lekucala alwisana nelubandlululo lebelikumaJuda. Ngeli-Phentekoste la 33 C.E., labo lebebahlala eJerusalema bemukela emaKhristu lebekasandza kuphendvuka, lebekavela etindzaweni letehlukene. (Imis. 2:5, 44-47) Indlela emaKhristu langemaJuda lawaphatsa ngayo lamanye emaKhristu lebekavela kuletinye tindzawo, yakhombisa kutsi bekati kahle kutsi kusho kutsini “kwemukela tivakashi.”

⁷ Njengobe libandla lebuKhristu likhula, kwase kucala lubandlululo. EmaJuda lebekakhuluma siGriki akhonona ngekutsi bafelokati bawo bebanganakwa. (Imis. 6:1) Kuze kulungiswe lesimo, baphostoli bakhetsa emadvodza lasikhombisa labetawuciniseka kutsi kute longanakwa. Onkhe lamadvodza lakhetfwa bekanemabito esiGriki, lobekubonisa kutsi baphostoli bebafuna kucedza nobe nguluphi lubandlululo lobekungenteka belukhona kulawo maKhristu ekucala.​—Imis. 6:2-6.

8, 9. (a) Yini lengakhombisa kutsi sinelubandlululo? (b) Yini lokufanele siyisuse etinhlitiyweni tetfu? (1 Phet. 1:22)

⁸ Ngalokuvamile, indlela lesenta ngayo tintfo ichomeke endleleni lesikhule ngayo. (Rom. 12:2) Ngetulu kwaloko, kungenteka siyaye sive bomakhelwane, lesisebenta nabo nobe lesifundza nabo bachwensa labo labavela kulamanye emave nobe labo labanelibala lesikhumba lelehlukile kuneletfu. Isitsintsa njani lemibono lemibi bantfu labanayo ngalabanye? Senta njani lapho lomunye ahlekisa ngebuve betfu​—mhlawumbe aze akhulume lokungesiko ngalamanye emasiko etfu?

 ⁹ Umphostoli Phetro kwamtsatsa sikhatsi kulwisana nenzondzo lebekanayo ngalabo lebebangasiwo emaJuda, kodvwa kancane kancane wayisusa imibono lemibi lebekanayo enhlitiyweni yakhe. (Imis. 10:28, 34, 35; Gal. 2:11-14) Natsi singenta lokufanako, uma sitfola iminonjana yelubandlulo entinhlitiyweni tetfu, kufanele sente imetamo yekuyisusa. (Fundza 1 Phetro 1:22.) Singacabanga ngekutsi sonkhe siboniswe umusa, futsi sibantfu labanesono, kungakhatsaliseki kutsi sisive sini. (Rom. 3:9, 10, 21-24) Ngako kungani kufanele sicabange kutsi sincono kunalabanye? (1 Khor. 4:7) Kufanele sibe nembono lofana newemphostoli Pawula, lowatjela emaKhristu lagcotjiwe kutsi ‘abasesibo bafokati netihambi, kodvwa . . . sebamalunga endlu yaNkulunkulu.’ (Ef. 2:19) Nasingetama kungababandlululi labo lababuya kulamanye emave sitabe sigcoka buntfu lobusha.​—Khol. 3:10, 11.

10, 11. Bhowazi wakhombisa njani kutsi unembono waJehova ngetivakashi endleleni laphatsa ngayo Ruthe umMowabi?

¹⁰ Asingabati kutsi Bhowazi walingisa Jehova ngalesikhatsi emukela Ruthe umMowabi. Ngalesikhatsi ayohlola emasimu akhe, Bhowazi wambona lomfati lobekakhwimita ngemuva kwetisebenti takhe nativuna. Bekulilungelo laRuthe kukhwimita, kodvwa wacela imvume ngaphambi kwekutsi akhwimite. Ngesikhatsi Bhowazi eva ngaloku, wamvumela kutsi akhwimite ngisho nalapho bekusengakavunwa khona.​—Fundza Ruthe 2:5-7, 15, 16.

¹¹ Incociswano leyalandzela ikhombisa kutsi Bhowazi bekamkhatsalela kakhulu Ruthe kanye nekuphepha kwakhe njengesihambi. Ngalesinye sikhatsi Bhowazi wambita kutsi ahlale nemantfombatana akhe kuze angahlushwa ngulamadvodza labesebenta emasimini. Wase uyaciniseka kutsi utfola kudla nemanti lenele njengaletinye tisebenti takhe labeticashile. Ngetulu kwaloko Bhowazi wacikelela kutsi akakhulumi kabi ngalomfati losihambi, kodvwa kunaloko wamphatsa kahle.​—Rut. 2:8-10, 13, 14.

12. Tento tetfu temusa tingaba namuphi umphumela lomuhle kubantfu lababuya kulamanye emave?

¹² Bhowazi akajatjuliswanga nje kuphela kutsi Ruthe abebonise kutsi umtsandza sibili maketala wakhe Nawomi, kodvwa wajatjuliswa nakutsi waba sikhonti saJehova. Umusa lowaboniswa nguBhowazi bewukhombisa lutsandvo lolucotfo Jehova labekanalo ngalona wesifazane ‘lowakhosela ngephansi kwaNkulunkulu wema-Israyeli.’ (Rut. 2:12, 20; Taga 19:17) Nalamuhla, tento tetfu temusa tingasita “tonkhe tinhlobo tebantfu” kutsi tibone liciniso futsi titivele kutsi Jehova utitsandza kangakanani.​—1 Thim. 2:3, 4.

13, 14. (a) Kungani kufanele sente umetamo wekubingelela tivakashi natifika eHholweni leMbuso? (b) Yini longahle uyente kuze uncobe kwesaba nakufanele ucale incociswano nalababuya kulamanye emave?

¹³ Singabonisa bungani kulabo labacalako kufika eHholweni LeMbuso ngekutsi sibabingelele ngemusa. Ngalesinye sikhatsi bantfu labacalako kufika bangaba nemahloni futsi bangatsandzi kusondzela kitsi. Indlela labakhule ngayo noma simo sabo semnotfo singabenta bative bangakhululeki nabasemkhatsini webantfu balesinye sive noma labakhuluma lulwimi lolwehlukile. Ngako kufanele sitsatse sinyatselo kucala sekubemukela futsi sikhombise kutsi sinendzaba nabo. Nangabe ikhona i-JW Language app ngelulwimi lwakho, ingakusita ukhone kufundza kubingelela tivakashi ngelulwimi letalumunya.​—Fundza Filiphi 2:3, 4.

 ¹⁴ Ungahle utive wesaba kucoca nebantfu lababuya kulamanye emave. Nangabe kunjalo, kungakusita kucale ubacocele ngemvelaphi yakho. Ungahle utfole kutsi kunalokunyenti lenifana ngako kunaleningafani ngako, ungatfola nekutsi lisiko nelisiko linebuhle nebubi balo.

15. Yini lesingayenta kuze sibaphatse ngemusa bantfu labasafundza imphilo yelive labangalati?

¹⁵ Nangabe ufuna kusita labanye ebandleni kutsi bative bakhululekile kuhle kutibuta kutsi: ‘Kube mine bengikulelinye live bengingatsandza kutsi ngiphatfwe njani?’ (Mat. 7:12) Babeketelele labo labasafundza imphilo yelive labangalati. Kungahle kutsatse sikhatsi kutsi siyicondze indlela labacabanga ngayo nalabenta ngayo tintfo. Kunekutsi sifune bente tintfo ngendlela tsine lesitenta ngayo, kungani singabemukeli njengobe banjalo?​—Fundza Roma 15:7.

16, 17. (a) Ngutiphi tinyatselo lesingatitsatsa kuze sisondzelane nalabo labanemasiko lehlukile? (b) Singabasita ngatiphi tindlela bantfu lababuya kulamanye emave labasemabandleni etfu?

¹⁶ Nangabe sifundza ngelive labasuka kulo kanye nemasiko alo, kutawuba melula kucoca nabo. Ekukhonteni kwetfu kwemndeni singacwaninga ngemlandvo webantfu lesingakabajwayeli labasebandleni letfu noma lesibatfola ensimini yetfu. Lenye indlela lesingasondzelana ngayo nalabo lababuya kulamanye emave kutsi sibameme emakhaya etfu. Njengobe Jehova “avulele bantfu betive umnyango wekutsi bakholwe,” natsi kufanele semukele tivakashi ‘letihlobene natsi ekukholweni.’​—Imis. 14:27; Gal. 6:10; Jobe 31:32.

¹⁷ Nasicitsa sikhatsi nemndeni lovela kulelinye live sitayibona kahle imetamo labayentako yekufundza indlela yetfu yekuphila. Sitawubona tindlela lesingabasita ngato kute bafundze lulwimi lwetfu. Singaphindze sibalayele ematiko ahulumende langabasita  kute bakhone kutfola tindzawo tekuhlala noma imisebenti. Tento letinjalo temusa tingenta umehluko lomkhulu etimphilweni tabo.​—Taga 3:27.

18. Ngusiphi sibonelo senhlonipho nesekubonga bantfu lababuya kulamanye emave labangasilingisa lamuhla?

¹⁸ Liciniso likutsi bantfu lababuya kulamanye emave batawukwenta konkhe lokusemandleni abo kute bafundze emasiko elive lasebakulo. Ruthe usibonelo lesihle kakhulu saloko. Kwekucala, wakhombisa kutsi uyawahlonipha emasiko elive labesakulo ngekucela imvume ngaphambi kwekutsi akhwimite. (Rut. 2:7) Akazange alibukele phansi lelilungelo, ente shengatsi bekufanele bamentele umusa. Kwesibili, wabonga kakhulu ngemusa latjengiswa wona. (Rut. 2:13) Nangabe lababuya kulamanye emave bakhombisa lobuntfu lobuhle batawuhlonishwa bantfu bendzawo nangulabo labakholwa nabo.

19. Ngutiphi tizatfu lesinato tekwemukela tivakashi emabandleni etfu?

¹⁹ Siyajabula kutsi ngenca yekutsi Jehova unemusa, uvumele bantfu bato tonkhe tinhlobo kutsi beve tindzaba letimnandzi. Kungenteka emaveni labesuka kuwo abakake bafundziswe liBhayibheli noma batfole inkhululeko yekukhonta nebantfu baJehova. Nyalo sebanelitfuba lekutihlanganisa natsi, ngako kufanele sibente bangasativa batihambi nabanatsi. Nanobe kungenteka site tintfo letinganani noma luncane lusito lesingabanika lona, singakhombisa lutsandvo lwaJehova kubo ngekutsi sibaphatse ngemusa. Njengobe ‘silingisa Nkulunkulu,’ shengatsi singenta konkhe lokusemandleni etfu kute semukele tivakashi letikhona emabandleni etfu.​—Ef. 5:1, 2.