LABANYE BATSI CHA. Lomunye dokotela wafananisa kusebentisa liBhayibheli nekusebentisa incwadzi yabo-1920 yekufundzisa i-chemistry. Umuntfu longakholelwa eBhayibhelini angase akufananise nekusebentisa incwadzi yekusebentisa luhlobo loludzala lwe-computer eluhlobeni lolusha lwe-computer. Ngalamanye emagama, labanye babheka liBhayibheli njengencwadzi lengenalusito nalephelelwe sikhatsi.

Kungani umuntfu angasebentisa sicondziso lesidzala ekuphileni kwalamuhla lesekutfutfuke kakhulu kutebucwephesha? Ngetulu kwaloko kuneteluleko neticondziso letitfolakala ngaso sonkhe sikhatsi kuma-website nakuma-blogs. Bocwephesha be-TV kanye netinhlelo temisakato tikhuluma ngelwati lwebantfu labacwaninga ngetingcondvo talabanye, beluleki betindlela tekuphila kanye nebabhali betincwadzi. Titolo tetincwadzi titsengisa tincwadzi letinyenti letentelwe kusita bantfu futsi tifakela babhali bato imali lenyenti.

Nangabe kunelwati lolungaka, kungani bantfu kufanele bafundze liBhayibheli—incwadzi leseyineminyaka lengu-2 000 budzala? Bacinisile yini bantfu labangakholelwa eBhayibhelini nabatsi, kusebentisa sicondziso sencwadzi lendzala kangaka kufana nekusebentisa incwadzi lendzala ye-chemistry nobe incwadzi yekusebentisa i-computer lendzala? Ecinisweni, lokucatsanisa lokunjalo kukabi. Isayensi netebucwephesha kuyashintjashintja, tidzingo tebantfu tona tiyashintja yini? Bantfu solo bafuna kwati injongo yekuphila futsi batfole injabulo nekulondzeka nobe babe nemindeni lejabulako kanye nebungani lobuzuzisako.

Nanobe lilidzala, liBhayibheli linato tindlela tekutfola leto tindzingo kanye nalokunyenti. LiBhayibheli liphefumulelwe ngumdali wetfu. Liyasicondzisa ekuphileni liphindze lisihlomise kuto tonkhe tinkinga lesihlangabetana nato. (2 Thimothi 3:16, 17) Ngetulu kwako konkhe, teluleko letikulo atiphilelwa sikhatsi​—futsi ngeke tiphuphe!. LiBhayibheli lona ngekwalo litsi: “Livi laNkulunkulu liyaphila.”​—Hebheru 4:12.

Ngabe licinisile yini liBhayibheli kuloku? Ngabe seliphelelwe sikhatsi nobe lihambisana nesikhatsi setfu futsi liyincwadzi lelusito kutendlula tonkhe​—nekutsi liyincwadzi lephilako? Injongo yalomagazini we-Sicongosekulindza, longuwekucala etihlokweni letiluchungechunge letikhetsekile, ikutsi ukusite utfole timphendvulo taleyo mibuto.