KUSENTSAMBAMA, Rebheka usendleleni, njengoba ahamba ubuka indzawo yakubo lengemagcuma layishiya ngemuva. Sekuphele emaviki Rebheka akuloluhambo, uze akaseva nekutsi lelikamela laligibele lihamba liyayendza. Ekhaya kubo eHarani sekusemuva kakhulu, cishe sewuhambe emakhulu emakhilomitha ubheke ngasenyakatfo mphumalanga. Kungenteka akaphindze ababone bantfu bakubo. Kungenteka uyatibuta kutsi likusasa limphatseleni, ikakhulukati nyalo njengobe sekatofika lakaya khona.

BoRebheka sebengcile eKhenani, nyalo sebaseNegevu indzawo lengemagcuma kakhulu. (Genesisi 24:62) Kungenteka Rebheka bekatati timvu. Lendzawo lebekasakuyo ilihlandze ngako beyingalungi kutsi ingalinywa kodvwa beyikahle emfuyweni. Lomuntfu lomdzala lebekahamba naboRebheka bekayejwayele lendzawo. Besekajake kubuyela ekhaya kuyotjela basi wakhe kutsi bahambe njani. Phela Rebheka bekavumile kuba ngumfati wa-Isaka! Rebheka yena ubala uyabeka, uyatibuta kutsi utawuphila njani kulendzawo. Bekatibuta nekutsi Isaka, lobekatawuba ngumyeni wakhe, ungumuntfu lonjani. Phela bebangazange nje sebabonane. Bekatawujabula yini Isaka nakambona? Yena bekatamtsandza yini?

Emaveni lamanyenti lamuhla lendzaba yekutsatsela umuntfu umfati ayatiwa. Kantsi kulamanye bakwejwayele. Nobe ngabe sikhulelephi, sonkhe siyavuma kutsi Rebheka bekangati kutsi likusasa limphatseleni. Rebekha abenekukholwa lokucinile nesibindzi. Natsi sidzinga sibindzi nekukholwa lokucinile kuze sikhone kubhekana netingucuko ekuphileni. Ngaphandle kwekukholwa, Rebheka bekanalobunye buntfu lobuhle nalobungakavami.

Lolushintjo belungeke lube matima kakhulu kuRebheka. Wakhulela eHarani nobe edvute naseHarani lidolobha leliseMesophothamiya. Batali bakhe bebehlukile kubantfu labanyenti baseHarani. Bebangamkhonti Sin, nkulunkulu wenyanga, kodvwa bebakhonta Jehova.​—Genesisi 24:50.

Rebheka wakhula waba yintfombi lenhle, kodvwa bekangasimuhle ngaphandle kuphela, bekamuhle nangekhatsi. Bekatiphatsa kahle angavani nentfo lebheke eceleni. Ekhaya kubo bebanjingile banetisebenti, kodvwa abazange bamtotose, bamfundzisa kusebenta. Njengawo onkhe emantfombatane angaleso sikhatsi, Rebheka bekayenta imisebenti yasekhaya njengekuya emfuleni ayokha emanti. Njalo ntsambama abetfwala imbita ayokha emanti esicojeni.​—Genesisi 24:11, 15, 16.

Kulenye intsambama watsi nakacedza kukha emanti, kwachamuka lomunye mkhulu agijima eta kuye. Lomkhulu wafike watsi: “Ngicela sewumane unginatsise emantana nje la embiteni yakho.” Lomkhulu wamcela kahle nangenhlonipho. Rebheka wabona kutsi lomuntfu lomdzala usuka khashane. Akazange aphotise maseko, wavele wetfula lembita yakhe wamnatsisa, nanobe bekacele litsamo kodvwa wanatsa waze wakholwa. Rebheka wabona kutsi lendvodza beyihamba nemakamela lalishumi, nekutsi bekute emanti enkelebheni lebekanganatfwa ngulamakamela. Wabona kutsi lendvodza beyimbukile ngako wenta konkhe lokusemandleni akhe kuze ayisite. Rebheka wase utsi: “Ngitawunatsisa nalamakamela akho, aze enele onkhe.”​—Genesisi 24:17-19.

Unakile yini, Rebheka akasho kutsi lamakamela utawanatsisa nje, kodvwa utsi utawanatsisa aze enele. Phela likamela naselome kahle linganatsa emalitha  langu-95 emanti! Songacabanga-ke kutsi nangabe emakamela lalishumi bekome kangako, Rebheka bekatawusebenta kangakanani. Kubonakala shengatsi lamakamela bekangakomi kakhulu. * Kodvwa ngesikhatsi Rebheka atsembisa lomkhulu bekangakwati loko. Yena bekatimisele kwenta konkhe lokusemandleni akhe kuze asite lomkhulu lebekangamati nekumati. Lendvodza yajabula ngalesento saRebheka, futsi beyimbukile njengobe bekasolo agijima atfutsetela emanti kulenkelebhe.​—Genesisi 24:20, 21.

Kunyenti lesingakufundza kuRebheka lamuhla. Kulamanga bantfu labanyenti sebaticabangela bona. Njengobe liBhayibheli lasho kutsi bantfu “batawutitsandza bona,” bangabi nendzaba nalomunye umuntfu. (2 Thimothi 3:1-5) EmaKhristu latimisele kulwa nalenkinga, atawube enta kahle nakacabanga ngaleya ntfombatana lebeyehla yenyuka itfutsetela emanti.

Rebheka wabona kutsi lomkhulu bekaphetse kumbuka. Kute lokubi lomkhulu lebekakuhlosile, bekamane nje amangele futsi ajabulile. Nasekacedzile kukha emanti, lomkhulu wamupha bucwebe. Wase utsi: “Ase ungitjele kutsi wena utalwa ngubani? Singayitfola yini indzawo lena ekhaya kini, simane siyewufihla inhloko lenemehlo?” Ngalesikhatsi Rebheka amtjela ngemndeni wakubo, lomkhulu wajabula kakhulu. Mhlawumbe Rebheka abejabule kakhulu kangangekutsi waze watsi: “Sinetjani lobunyenti bemakamela kanye nendlu leyenele kutsi ningangenisa khona.” Lena bekuyindzawo lekahle kakhulu lebekangalala khona lomkhulu kanye nalabo labekahamba nabo. Rebheka wase uyagijima uyobabikela ekhaya ngalobekwentekile.​—Genesisi 24:22-28, 32.

Kuyabonakala kutsi Rebheka wafundziswa kutsi atemukele tivakashi. Sebancane bantfu labemukela tivakashi, ngako emantfombatane angafundza sifundvo lesihle kuRebheka. Nasikholwa kuNkulunkulu sitatemukela tivakashi. Jehova ulungile, unemusa kubo bonkhe bantfu futsi ufuna bonkhe labamkhontako bafane naye. Jehova ujabula kakhulu nasinemusa kubo bonkhe bantfu, ngisho nobe bangeke basinike lutfo.​—Matewu 5:44-46; 1 Phetro 4:9.

Ngubani lomkhulu lowakhandza Rebheka esicojeni? Lesi bekusisebenti sa-Abrahama umnakabomkhulu waRebheka. Kungako bamemukela ekhaya laBethuweli longubabe waRebheka. Kungenteka ligama lalesisebenti bekungu Eliyezeri. * Kulelikhaya bamupha kudla kepha akavumanga kukudla asengakayikhulumi lendzaba lebekete ngayo. (Genesisi 24:31-33) Asewumbone ngeliso lengcondvo lomkhulu njengoba akhuluma ajabulile, phela besekavele atibonele kutsi Nkulunkulu wakhe Jehova abenaye kuloluhambo lolubalulekile. Jehova wakukhombisa njani loko?

Asewumcabange Eliyezeri acocela babe waRebheka Bhetuweli nemnakabo Labani ngendzaba lete ngayo, bobabili bamlalelisisile. Ubatjela ngendlela Jehova lambusise ngayo Abrahama eKhenani nekutsi Abrahama naSara banendvodzana lengu-Isaka letawuba yindlalifa yabo. Abrahama abenikete lesisebenti sakhe umsebenti lobaluleke kakhulu, wekutsi bekufanele sihambe siyofunela Isaka umfati etihlotjeni takhe letiseHarani.​—Genesisi 24:34-38.

Abrahama abemfungisile Eliyezeri kutsi angamtsatseli Isaka umfati eKhenani. Ngasiphi sizatfu? Ngoba emaKhenani bekangamhloniphi Nkulunkulu Jehova futsi abengamkhonti. Abrahama bekati kutsi Jehova bekatabajezisa bantfu baseKhenani ngalemikhuba yabo lemibi. Ngako abengafuni kutsi Isaka, indvodzana yakhe layitsandzako, itihlanganise nabo futsi yente nalemikhuba yabo lemibi. Bekati nekutsi indvodzana yakhe inendzima lenkhulu ekufezekeni kwetetsembiso taNkulunkulu.​—Genesisi 15:16; 17:19; 24:2-4.

Eliyezeri wabatjela nekutsi ngesikhatsi afika emtfonjeni longaseHarani, wathantaza kuJehova Nkulunkulu. Wacela Jehova kutsi kube nguye lokhetsela Isaka intfombatane latawushada nayo. Abetamkhetsela njani? Eliyezeri wacela Nkulunkulu kutsi ente lentfombatana lebeyitawushada na-Isaka ite emtfonjeni. Abetawutsi nakacela kutsi lentfombatane imnatsise, ingagcini ngekunatsisa yena kuphela kepha inatsise nemakamela akhe. (Genesisi 24:12-14) Nguyiphi-ke lentfombatane leyavele yenta loko? NguRebheka! Sowungacabanga-ke kutsi Rebheka weva kunjani nangabe wamuva Eliyezeri acocela emalunga emndeni wakubo lendzaba!

Bhetuweli naLabani yabatsintsa kakhulu lendzaba yaEliyezeri kangangekutsi batsi: “Lendzaba le iphuma kuSimakadze.” Njengoba bekulisiko lalendzawo, babese benta sivumelwano, bendzisa Rebheka ku-Isaka. (Genesisi 24:50-54) Loku kusho kutsi Rebheka bekangeke akhone yini kusho indlela lativa ngayo?

Ngaphambi kwekutsi Eliyezeri aye kuyofunela Isaka umfati bekakhatsatekile, ngako wabuta Abrahama kutsi bekatakwentanjani, ‘nangabe beyingavumi kuta naye lentfombi?’ Abrahama wamphendvula watsi: “Uyawube sewuyakhululeka-ke kulesifungo sakho.” (Genesisi 24:39, 41) Nasekhaya laBhetuweli beyibalulekile indlela intfombatane lebeyitiva ngayo. Eliyezeri abejabule kakhulu ngenca yekuphumelela kwaloluhambo lwakhe, kangangekutsi ngakusasa wavele wacela kuhamba naRebheka baye eKhenani. Kodvwa bakubo abazange bavume, bebasafuna kuhlala naye lokungenani emalanga lalishumi. Lenkinga bagcine bayicatulule ngekutsi batsi: “Ake sibite lentfombatana sitewuva kuyo.”​—Genesisi 24:57.

Rebheka bekufanele akhetse kutsi abetakwenta njani. Vele bekatawuphendvula atsini? Bekatamncenga yini babe wakhe nemnakabo, abatjele kutsi uyesaba kuya endzaweni labengazange sekayibone? Nobe abetakutsatsa njengelilungelo lelikhulu yini njengobe besekubonakele kutsi nguJehova lobekacondzisa tintfo? Imphendvulo yakhe yaveta indlela lebekativa ngayo ngaloluhambo lobelubukeka lumatima futsi lebelitawushintja kuphila kwakhe. Wavele waphendvula watsi: “Yebo ngitawuhamba nayo.”​—Genesisi 24:58.

Maye vele bekanesimo lesihle lomntfwana! Kungenteka kutsi emasiko etfu mayelana nemshado awafani, kodvwa kunyenti lesingakufundza kuRebheka. Lobekumcoka kakhulu kuye bekungasiko lokutsandvwa nguye kodvwa bekuyintsandvo yaNkulunkulu wakhe Jehova. Lamuhla liVi laNkulunkulu lisaniketa seluleko lesihle kakhulu mayelana neluhlobo lwemuntfu longashada naye, nekutsi ungaba njani yindvodza lekahle nome umfati lokahle. (2 Khorinte 6:14, 15; Efesu 5:28-33) Sitawube senta kahle kakhulu  nasilingisa Rebheka sente tintfo ngendlela yaNkulunkulu.

Umndeni wakhabo Rebheka wamvalelisa ngemavi lamnandzi. Ngemva kwaloko Rebheka kanye naDebhora, lobekamgadza kusukela asemncane, wahamba netinceku takhe kanye naEliyezeri nalamadvodza labekamphekeletele. (Genesisi 24:59-61; 35:8) Ngesikhashana nje, iHarani besebayishiye khashane kakhulu. Loluhambo beluludze kakhulu, kungenteka belungemakhilomitha langu-800 futsi kungenteka lwatsatsa emaviki lamatsatfu. Kubonakala shengatsi bekungasilo luhambo lolumnandzi. Rebheka bekawatayele emakamela kodvwa asati kahle kutsi bekake waligibela yini. LiBhayibheli litsi umndeni wakubo bewunayo imfuyo kodvwa alikhulumi ngekutsi bebanemihlambi yemakamela. (Genesisi 29:10) Bantfu lebebagibela emakamela imvamisa bebatsi akusimnandzi kuligibela ngisho nome uligibele sikhashana nje!

Noma ngabe loluhambo belumatima kanganani Rebheka bekatimisele kuhamba, asingabati kutsi tinyenti tintfo Rebheka lebekatibuta Eliyezeri nga-Isaka nangemmdeni wakubo. Ase umcabange Eliyezeri njengobe botsa umlilo futsi acocela Rebheka ngetintfo Jehova lebekatitsembise Abrahama labengumngani waJehova. Nkulunkulu abetawuveta intalo emndenini wa-Abrahama futsi bonkhe bantfu bebatawubusiswa ngayo. Ake ucabange ngendlela Rebheka lajabula ngayo nakeva kutsi tetsembiso taJehova betitawufezeka ngalo Isaka lobekatawuba yindvodza yakhe, nangaye.​—Genesisi 22:15-18.

Lase liyefika-ke lelilanga lesikhulume ngalo ekucaleni kwalesihloko. Njengoba besebalibangise eNegevu, nelilanga seliyawutibeka kunina, Rebheka wase ubona indvodza ihambahamba emasimini. Lendvodza beyibonakala ngatsi ikulomkhulu umcabango. LiBhayibheli litsi: ‘Wase uyehla ekameleni,’ mhlawumbe akazange amele nekutsi lelikamela liguce. Wase uyabuta: “Ngubani leya ndvodza lesihlangabetako?” Watsi nakeva kutsi ngu-Isaka, watsatsa isholi yakhe watimbonya buso. (Genesisi 24:62-65) Abetimbonyelani? Lesi bekusento lesikhombisa kutsi uyamhlonipha lomuntfu lobekatawuba yindvodza yakhe. Loku kungabonakala kusidzala lamuhla. Kuyakhanya-ke kutsi bonkhe bantfu lamuhla bangafundza kuRebheka ngekutfobeka kwakhe. Ukhona yini vele umuntfu longafuni kutsi kutsiwe utfobekile?

Isaka, lobekayindvodza lecishe ibe neminyaka lengu-40, bekasolo eva buhlungu ngekushonelwa ngumake wakhe Sara, lobesekuphele iminyaka lemitsatfu ashonile. Loku kumane kusikhombisa kutsi Isaka abengumuntfu lonelutsandvo naloneluvelo. Kwaba sibusiso lesikhulu ngalendvodza kutsi itfole umfati lokhutsele, lotfobekile nalowephanako. Rebheka na-Isaka bahlalisana njani? LiBhayibheli litsi: “Isaka wamtsandza umkakhe.”​—Genesisi 24:67; 26:8.

Ngisho nome sekwendlule emakhulu eminyaka, Rebheka solo usesibonelo lesihle kakhulu lamuhla. Kute lokunye lesingakwenta ngaphandle kwekutsi sikope kuRebheka, phela abekhutsele, anemusa, anesibindzi futsi atfobekile. Ngisho nobe sibadzala, sibancane, sishadile nobe singakashadi sitawube senta kahle nasilingisa kukholwa kwaRebheka!