María Isabel ungummemeteli lokhutsele losemusha lohlala edolobheni laseSan Bernardo eveni laseChile leliseNingizimu yeMelika. Yena nemndeni wakubo bangemaMapuche. Umndeni wakubo wonkhe bewuyisekela imetamo yekutsi kwakhiwe libandla lelisha lelitawusebentisa lulwimi lwesiMapuche, loluphindze lubitwe ngekutsi siMapudungun.

Ngesikhatsi kumenyetelwa kutsi Sikhumbuto sekufa kwaKhristu sitawuchutjwa nangesiMapudungun nekutsi kushicilelwe timemo teSikhumbuto letingu-2 000 ngalolulwimi lesetilungele kuhanjiswa, loko kwenta María Isabel watibuta kutsi yini langayenta kute asite. Wakhumbula lokuhlangenwe nako kwalabanye boFakazi labasebasha labajabulela kushumayela ngemphumelelo kulabo labafundza nabo nakubothishela babo. Wakhuluma nebatali bakhe ngaloku, futsi batsi María Isabel akacabange indlela latayisebentisa kute ahambise letimemo esikolweni. Nguyiphi indlela layicabanga?

María Isabel wacale waya kubaphatsi besikolwa kute atfole imvume yekufaka simemo egedeni lelikhulu lesikolwa. Basemukela sicelo sakhe futsi bambonga ngekutsatsa leso sinyatselo. Ngalelinye lilanga ekuseni basemlayinini, thishela nhloko wesikolwa wenta simemetelo mayelana nalesimemo asebentisa umbhobho.

Ngemuva kwaloko, María Isabel wacela kuvakashela bonkhe bafundzi emakilasini. Nasatfole imvume kubothishela, abebuta bafundzi emakilasini kutsi ukhona yini kubo longumMapuche. Utsi: “Bengicabanga kutsi kutawuba nebafundzi labangu-10 nobe labangu-15 labavela emindenini yemaMapuche esikolweni, kodvwa bebabanyenti kakhulu. Ngagcine sengihambise timemo letingu-150.”

Lomunye make wabona lesimemo egedeni lesikolwa, wase uyabuta kutsi angakhuluma nabani kute eve ngalombutsano. Ungayicabanga indlela lamangala ngayo nakatjelwa kutsi akakhulume nalentfombatana leneminyaka lelishumi budzala. Akhuluma ngekumoyitela María Isabel utsi: “Abelindzele kubona umuntfu lomdzala.” Nakacedza kumnika lesimemo futsi amchazele kafishane ngaso, wase ucela likheli lalomake kute yena nebatali bakhe bamvakashele bamtjele lokunyenti ngeMbuso waNkulunkulu. Bamemeteli labangu-20 labasebenta insimu yesiMapudungun, bajabula kakhulu nababona lomake kanye nalabanye labangu-26 labanenshisekelo besive semaMapuche bete eSikhumbutweni. Nyalo lelicembu selilibandla leliphumelela kakhulu!

Ngisho nobe uneminyaka lemingakhi, ungakwenta yini nawe lokufananako, ubamemele eSikhumbutweni, enkhulumeni yelinyenti nobe emhlanganweni wesigodzi labo lofundza nabo esikolweni nobe losebenta nabo? Kute utfole kutsi ungaphumelela njani kuloyo msebenti, ungenta lucwaningo etincwadzini tetfu letinalokuhlangenwe nako longakusebentisa. Ungaphindze uthantaze kuJehova ucele umoya wakhe longcwele ukusite ube nesibindzi sekukhuluma ngaye. (Luk. 11:13) Nawenta njalo, ungajabula futsi ukhutsateke nawubona imetamo yemkhankaso wakho lohleliwe iphumelela.