KuJeremiya 31:15 siyafundza: “Naku lokushiwo nguSimakadze, utsi: ‘Kuvakala livi lekukhala eRama, yebo, livi lekulila nekukhala lokukhulu, Rakheli akhalela bantfwabakhe angasavumi nekudvudvutwa, ngobe bantfwabakhe bebangasekho.’”

Emadvodzana aRakheli lamabili akazange afe kucala kunaye. Ngako-ke, loko Jeremiya lakubhala ngemuva kweminyaka lengu-1 000 Rakheli afile, kungase kubonakale kungasilo liciniso.

Indvodzana yaRakheli yekucala bekunguJosefa. (Gen. 30:22-24) Ngemuva kwesikhatsi, waba nalenye indvodzana lokutsiwa nguBhenjamini. Kodvwa Rakheli wafa asabeleka lendvodzana yakhe yesibili. Ngako kuphakama umbuto: Kungani Jeremiya 31:15 atsi Rakheli abekhalela emadvodzana akhe ‘labengasekho?’

Kuyaphawuleka kutsi ngekuhamba kwesikhatsi Josefa, indvodzana yaRakheli yekucala, watala Manase na-Efrayimu. (Gen. 41:50-52; 48:13-20) Ngemuva kwesikhatsi, Efrayimu waba sive lesibalulekile nalesinemandla kuwo wonkhe umbuso wasenyakatfo yaka-Israyeli futsi wamelela tonkhe tive letilishumi. Ngakulolunye luhlangotsi, sive lesivela endvodzaneni yaRakheli yesibili, lokunguBhenjamini, saba yincenye yembuso waseningizimu kanye nesive sakaJuda. Ngemcondvo lotsite, Rakheli ufanekisela bonkhe bomake baka-Israyeli, lebebasembusweni wasenyakatfo newaseningizimu.

Ngesikhatsi incwadzi yaJeremiya ibhalwa, umbuso lowawusenyakatfo wetive letilishumi besewuvele uncotjwe ngema-Asiriya futsi bantfu bawo labanyenti bebatfunjiwe. Nobe kunjalo, kungenteka kutsi lesinye situkulwane sa-Efrayimu besibalekele eveni lakaJuda. Nga-607 B.C.E., baseBhabhulona bancoba umbuso wakaJuda lowawuseningizimu wetive letimbili. Kubonakala shengatsi labanye lebebatfunjiwe bahlaliswa ndzawonye eRama, lengemakhilomitha lasiphohlongo kusuka enyakatfo yeJerusalema. (Jer. 40:1) Kungenteka kutsi labanye babulawa endzaweni yakaBhenjamini, lapho Rakheli angcwatjelwa khona. (1 Sam. 10:2) Ngako kungenteka kutsi kukhala kwaRakheli akhalela emadvodzana akhe, kufanekisela kulila lokwaba khona ngenca yekubulawa kwebantfu bakaBhenjamini nobe labo lebebaseRama. Kungenteka futsi kusho kutsi bonkhe bomake bebantfu baNkulunkulu bebakhala ngenca yekubulawa nobe kutfunjwa kwema-Israyeli.

Kunobe ngukuphi, emavi aJeremiya lamayelana nekukhala kwaRakheli akhalela emadvodzana akhe abesiphrofetho saloko lokwenteka emashumini eminyaka leyalandzela ngesikhatsi kuphila kwaJesu kusengotini. INkhosi Herodi yakhipha umyalo wekutsi kubulawe bonkhe bafana labangephansi kweminyaka lemibili budzala labaseBhetlehema, lebeyiseningizimu yeJerusalema. Ngako-ke, lamadvodzana abengasekho; abesafile. Cabanga ngekukhala lokubuhlungu kwalabomake labashonelwa ngemadvodzana abo! Umsindvo wekukhala kwabo bekungatsi uvakala naseRama, lesenyakatfo neJerusalema.—Mat. 2:16-18.

Ngako-ke, ngesikhatsi saJeremiya nangesikhatsi saJesu, kukhala kwaRakheli akhalela emadvodzana akhe bekuyindlela lekahle yekukhombisa lusizi bomake bemaJuda labebanalo ngekubulawa kwebantfwana babo. Kuliciniso kutsi labo labafa futsi baya “eveni lesitsa” bangaphindze baphile ngesikhatsi kuvuswa labafile.—Jer. 31:16; 1 Khor. 15:26.