Liyini Liciniso Ngelizulu?

CABANGA nje kutsi kungakhanga kangakanani kwati kutsi uya ezulwini! Litsemba lekuphila ngemva kwekufa, yinkholelo yebantfu labanyenti, emaMoslem, emaHindu, ema-Bhuda, emalunga etinkholo teBukholwa kanye nebantfu labanyenti labangakholwa. Imvamisa lizulu kucatjangwa kutsi yindzawo lenhle nalejabulisako lapho bantfu batfola khona kukhululeka ekuhluphekeni baphindze bahlangane “netihlobo tabo letitsandzekako.” Bantfu labanyenti bayalati leliciniso lelitsi: Bonkhe bantfu bafuna kuya ezulwini, kodvwa kute lofuna kufa kute aye khona. Kungani kunjalo?

Nangabe sadalelwa kutsi sife ngemuva kwaloko siye ezulwini, bantfu labanyenti bebangeke yini babe nenkhaphunkhaphu yekufika kwaleso sikhatsi? Bebangeke yini balingise umntfwana lomncane loba nesifiso sekukhula abemdzala, nalosemusha loba nesifiso sekukhula adzimate ashade? Kodvwa bantfu labanyenti abafuni kufa.

Nobe kunjalo, bafundisi batikhohlisa ngekutsi ngemuva kwesikhashana nje siphile lana emhlabeni, sitawendlulela ekuphileni kwasezulwini. Sibonelo saloku kutsi Khadinali Edgar Theodore McCarrick lobekangumbhishobhi wase Washington, D.C., wacashunwa atsi: “Asikadalelwa kuphila ngalendlela lesiphila ngayo nyalo lapha emhlabeni. Sadalelwa kuphila ezulwini.” Ngendlela lefananako, lobekangumengameli we-U.S. National Association of Evangelicals, yena wacashunwa atsi: “Injongo yekuphila kudvumisa Nkulunkulu ngemuva kwaloko siye ezulwini . . . ngobe lizulu likhaya letfu.”

Labo labakholelwa kutsi bayawuphila ezulwini, imvamisa basekela inkholelo yabo elwatini lolungatseni. George Barna mengameli wenkampani lehlolisisa imibono yenkholo, watfola kutsi bantfu labanyenti “imibono labanayo mayelana nekuphila kanye nekuphila ngemuva kwekufa isekelwe emitfonjeni leyehlukahlukene, lefaka ekhatsi emabhayisikobho, umculo kanye netincwadzi.” Umfundisi welisontfo lema-Episcopal lose-Florida, naye wacashunwa atsi: “Kute lesikwatiko ngelizulu ngephandle nje kwekutsi ngulapho kuhlala khona Nkulunkulu.”

Nobe kunjalo, lizulu indzaba lokukhulunywa ngayo kakhulu eBhayibhelini. Ngekusho kweliVi laNkulunkulu, linjani lizulu? Umuntfu abedalelwe kuphila ezulwini yini? Nangabe bantfu baya ezulwini, yini labayoyenta khona?

[Emavi lacashuniwe lasekhasini 3]

Kungani bantfu labanyenti bafuna kuya ezulwini, kodvwa babe bambalwa labafuna kufa kute baye khona?