Hlala Ukulungele!

‘Banini ngulabakulungele ngobe iNdvodzana yemuntfu iyawufika ngesikhatsi leningakasibheki.’—MAT. 24:44.

1, 2. (a) Ngutiphi tehlakalo letibiketelwe eBhayibhelini letingafananiswa nekuhlasela kwengwe? (b) Lokuhlasela lokutako kukutsintsa njani wena?

 BESEKUMINYAKA leminyenti umdlali lodvumile ajabulisa bantfu ngekutsi atidlalise ngekuthula tingwe takhe taseBengal leticeceshwe kahle. Watsi: “Nangabe silwane sikwetsemba, uva shengatsi uniketwe sipho lesikhulu kunato tonkhe emhlabeni.” Nanobe kunjalo, nga-October 3, 2003, lokwetsembana kwaphela. Ngesizatfu lesingatiwa, lesinye setilwane takhe, lokuyingwe lemhlophe lenesisindvo lesingu-172 kg, yamhlasela. Lokuhlaselwa bekungakalindzeleki, futsi lomceceshi abengakatilungiseleli.

² Kuyintfo lenhle kucaphela kutsi neliBhayibheli libiketela ngekuhlasela ‘kwesilo,’ futsi natsi kufanele sihlale sikulungele. (Fundza Sembulo 17:15-18.) Lesilo sihlasela bani? Kutawukwenteka sehlakalo lesingakalindzeleki, futsi lelive laDeveli litawukwehlukana ekhatsi. Silo lesibovu simelela Mhlabuhlangene, kantsi ‘timphondvo letilishumi’ tona timelela yonkhe imibuso yetembangave. Letintfo titawuyihlasela ngebudlova iBhabhulona Lenkhulu lenjengengwadla, lokungumbuso wenkholo yemanga. Kutawukwenteka nini loku? Asilati lilanga kanye nemzuzu. (Mat. 24:36) Nanobe kunjalo, siyati kutsi loku kuyawukwenteka ngeli-awa lesingakalilindzeli kanye nekutsi sikhatsi lesisele ngembikwekutsi kwenteke sinciphile. (Mat. 24:44; 1 Khor. 7:29) Ngako-ke, kubalulekile ngatsi kutsi sihlale sikulungele kute kutsi lapho lokuhlasela kufika futsi naKhristu eta njengeMehluleli, abe nguMsindzisi wetfu. (Luk. 21:28) Kute sibe ngulabakulungele, singafundza etincekwini taNkulunkulu letetsembekile letiye tahlala tikulungele, futsi ngaleyo ndlela taba bofakazi bekutibonela bekugcwaliseka kwetetsembiso taNkulunkulu. Sitawutinakisisa yini letintfo letenteka?

Hlala Ukulungele—NjengaNowa

3. Ngutiphi timo letenta kwaba matima ngaNowa kutsi akhonte Nkulunkulu ngekwetsembeka?

³ Nangetulu kwetimo leticedza emandla lebetigcwele emhlabeni ngemalanga akhe, Nowa wahlala akulungele kubona kugcwaliseka kwetetsembiso taNkulunkulu. Cabanga ngebumatima Nowa lahlangabetana nabo ngesikhatsi tingilosi letihlubukile tembatsa imitimba yebantfu futsi tilala nebesifazane labahle! Lokuhlangana kwebantfu lokungasiko kwemvelo kwaveta intalo yebantfu labanemandla lamakhulu ‘labangemachawe,’ labebasebentisa emandla abo kute bahluphe labanye. (Gen. 6:4) Cabanga ngebudlova lobebukhula njengobe letichwaga tibangela tiphitsiphitsi kunobe nguyiphi indzawo lebetiya kuyo. Ngesizatfu saloko, bubi bagcwala futsi indlela umuntfu lacabanga nalenta ngayo yaba yimbi kakhulu. Ngako-ke, iNkhosi lenguMbusi Jehova yabeka sikhatsi lebeyitawubabhubhisa ngaso labantfu lababi.—Fundza Genesisi 6:3, 5, 11, 12. a

4, 5. Timo letikhona lamuhla tifanana ngayiphi indlela netemalanga aNowa?

⁴ Jesu wabiketela kutsi emalangeni etfu timo betitawufanana netemalanga aNowa. (Mat. 24:37) Sibonelo saloko kutsi natsi siyabubona bufakazi bekutsi imimoya lemibi iyabahunga bantfu. (Semb. 12:7-9, 12) Letingilosi letingemadimoni tembatsa imitimba yebantfu emalangeni aNowa. Nanobe lamuhla tingasakwati kuyembatsa, titimisele kakhulu kulawula bantfu labancane nalabadzala. Ngansense, letidalwa letikhutsata  kutiphatsa kabi ngekwelicasi titfola injabulo ngekubona tento letimbi naletinyanyekako tebantfu labonakele labasemhlabeni.—Ef. 6:11, 12.

⁵ LiVi laNkulunkulu lichaza Develi ngekutsi ‘ngumbulali webantfu’ futsi litsi ‘unendlela yekubangela kufa.’ (Joh. 8:44; Heb. 2:14, NW.) Ute emandla ekubulala bantfu ngalokucondzile. Nanobe kunjalo, lesidalwa semoya lesinelulaka sitfutfukisa emanga kanye nekuyenga. Senta kutsi tingcondvo tebantfu tibe nesifiso sekubulala labanye. Nasi sibonelo: Umntfwana loyedvwa kulabangu-142 labatalwa eMelika utawufa ngekubulawa. Njengobe budlova sebugcwele kangaka lamuhla, ucabanga kutsi Jehova angeke abunake yini kwendlula indlela labunaka ngayo emalangeni aNowa? Utawehluleka yini kutsatsa sinyatselo?

6, 7. Nowa kanye nemndeni wakhe bakuveta njani kukholwa kanye nekwesaba Nkulunkulu?

⁶ Ngesikhatsi lesifanele, Nkulunkulu watjela Nowa ngesincumo sakhe sekuletsa Zamcolo emhlabeni, kute abhubhise bonkhe bantfu. (Gen. 6:13, 17) Jehova watjela Nowa kutsi akhe umkhumbi lofanana nelibhokisi lelikhulu. Nowa kanye nemndeni wakhe bacala kuwakha. Yini leyabasita kutsi balalele futsi bakwati kuhlala bakulungele ngesikhatsi kufika sehlulelo saNkulunkulu?

⁷ Kukholwa lokucinile kanye nekwesaba Nkulunkulu kwenta kutsi Nowa kanye nemndeni wakhe bente njengobe bebayaliwe. (Gen. 6:22; Heb. 11:7) Njengenhloko yemndeni, Nowa wahlala asondzelene naJehova futsi wayibalekela imikhuba lemibi yebantfu labephila nabo. (Gen. 6:9) Bekati kutsi umndeni wakhe bekufanele uhlale ucaphele kute ungabi nebudlova nemoya wekuvukela lobewukhona kubantfu labebaphila nabo. Bekubalulekile kutsi bangabi matasatasa kakhulu ngekuphila kwabo kwamalanga onkhe. Nkulunkulu abebanikete umsebenti lobekufanele bawente, futsi bekudzingeka kutsi bonkhe bawunakisise ekuphileni kwabo.—Fundza Genesisi 6:14, 18.

Nowa Kanye Nemndeni Wakhe Bahlala Bakulungele

8. Yini leveta kutsi emalunga emndeni waNowa abetinikele kuNkulunkulu?

⁸ Lokulandzisa kweliBhayibheli kukhuluma kakhulu ngaNowa lobekayinhloko yemndeni, nanobe kunjalo, umfati wakhe, emadvodzana akhe kanye nebafati bawo nabo bebatikhonti taJehova. Umphrofethi Hezekeli wakufakazela loku. Watsi kube Nowa abephila emalangeni akhe, bantfwana bakhe bebangeke balindzele kutsi basindziswe ngekulunga kwababe wabo. Besebakhule ngalokwenele kutsi batikhetsele kulalela nobe kungalaleli. Ngako-ke, nabo besebativetile kutsi banelutsandvo ngaNkulunkulu kanye nangetindlela takhe. (Hez. 14:19, 20) Umndeni waNowa bewutemukela ticondziso takhe, unetinkholelo letifanana netakhe, futsi awuzange uvume kutsi imikhuba yalabanye iphatamise umsebenti wawo lobewuvela kuNkulunkulu.

9. Ngutiphi tibonelo lesitibonako lamuhla tekukholwa lokufanana nekwaNowa?

⁹ Kuyakhutsata kakhulu lamuhla kubona tinhloko temindeni lesikanye nato ebuzalwaneni bemhlaba wonkhe tenta konkhe letingakwenta kute tilingise Nowa. Tiyacaphela kutsi akukeneli kuniketa imindeni yato kudla,  kwekwembatsa, indzawo yekuhlala, kanye nemfundvo. Kufanele tinakekele netidzingo takamoya temindeni yato. Ngekwenta njalo, tiveta kutsi tihlala tikulungele loko Jehova latawukwenta madvutane.

10, 11. (a) Ngesikhatsi basemkhunjini, Nowa kanye nemndeni wakhe bativa njani? (b) Ngumuphi umbuto lesitawube senta kahle ngekutibuta wona?

¹⁰ Kungenteka kutsi Nowa, umfati wakhe, emadvodzana akhe, kanye nebafati bawo bacitsa iminyaka lengaba ngu-50 bakha umkhumbi. Njengobe bebawakha, kungenteka kutsi bebangena futsi baphuma kuwo tikhatsi letinyenti kute bente imisebenti leyehlukehlukene. Bawakha ngendlela yekutsi ungangenwa ngemanti, bawugcwalisa ngekudla futsi bangenisa netilwane. Asewubuke lesimo ngeliso lengcondvo. Lelilanga lelikhulu selifikile. Ngumhlaka-17 enyangeni yesibili yemnyaka wa-2370 B.C.E., futsi bangena emkhunjini. Jehova uvala umnyango, futsi licala kuna. Lena akusiyo nje imvula lenkhulu leyetayelekile. Emasango etikhukhula asezulwini ayabhoboka, futsi imvula lenkhulu ina etikwemkhumbi. (Gen. 7:11, 16) Bantfu labangephandle kwemkhumbi bayafa, kantsi labo labangekhatsi bayasindza. Ucabanga kutsi Nowa kanye nemndeni wakhe bativa njani? Bambonga kakhulu Nkulunkulu. Ngetulu kwaloko kungenteka kutsi bacabanga: ‘Sijabula kakhulu ngekutsi sachubeka sihamba naNkulunkulu weliciniso futsi sahlala sikulungele!’ (Gen. 6:9) Ungakwati yini wena kutibona usindzile e-Amagedoni, futsi inhlitiyo yakho igcwele kubonga lokufananako?

¹¹ Kute lokungavimbela Somandla kutsi agcwalise setsembiso sakhe sekubhubhisa lelive lelibi laSathane. Tibute: ‘Ngiciniseka ngalokuphelele yini kutsi kute nasinye setsembiso saNkulunkulu lesingeke sigcwaliseke kanye nekutsi tonkhe titawugcwaliseka ngesikhatsi sakhe lesifanele?’ Nangabe kunjalo, hlala ukulungele ngekutsi ulikhumbule njalo ‘lilanga laJehova’ lelisondzela ngekushesha.—2 Phet. 3:12.

Mosi Wahlala Alindzile

12. Yini lebeyingase iphatamise Mosi embonweni wakhe wakamoya?

¹² Asesicabange ngalesinye sibonelo. Ngekwembono wenyama, kubonakala shengatsi Mosi abesesikhundleni lesihle kakhulu eGibhithe. Njengendvodzana yekutfolwa yendvodzakati yaFaro, kungenteka kutsi abehlonishwa kakhulu, ajabulela kudla lokumnandzi, agcoka kahle, futsi aphila endzaweni lenhle kakhulu. Watfola nemfundvo lesezingeni lelisetulu. (Fundza Imisebenti 7:20-22.) Abengaba setfubeni lekutfola lifa lelikhulu kakhulu.

13. Mosi watigcina njani anake tetsembiso taNkulunkulu?

¹³ Kuyacaca kutsi kuceceshwa batali bakhe asemncane kwenta Mosi wakwati kubona kutsi kukhonta titfombe lobekwentiwa baseGibhithe akukalungi. (Eks. 32:8) Imfundvo yaseGibhithe kanye netintfo letinhle tasesigodlweni atizange tente Mosi kutsi ashiye kukhonta kweliciniso. Kungenteka kutsi wazindla kakhulu ngetetsembiso Nkulunkulu latitjela bokhokho bakhe futsi waba nelilukuluku lekuveta kutsi utimisele  kwenta intsandvo yaNkulunkulu. Naku Mosi lakutjela bantfwana baka-Israyeli: ‘Simakadze . . . Nkulunkulu wa-Abrahama, Nkulunkulu wa-Isaka, naNkulunkulu waJakobe, ungitfume kini.’—Fundza Eksodusi 3:15-17.

14. Kukholwa kwaMosi kanye nesibindzi sakhe kwavivinywa njani?

¹⁴ Ngalokwehlukile netithico lebetimelela bonkulunkulu baseGibhithe labangaphili, Nkulunkulu weliciniso Jehova, abephila kuMosi. Mosi waphila imphilo yakhe kwaba shengatsi uyambona loyo “longabonwa.” Abenelitsemba lekutsi bantfu baNkulunkulu batawukhululwa, kodvwa abengati kutsi loko bekutawukwenteka nini. (Heb. 11:24, 25, 27) Sifiso sakhe lesinemandla sekufuna kubona emaHebheru akhululwa sabonakala ngesikhatsi avikela sigcili lesingumIsrayeli lebesiphatfwa kabi. (Eks. 2:11, 12) Nanobe kunjalo, leso bekungasiso sikhatsi saJehova, ngako-ke, kwadzingeka kutsi Mosi aphile njengembaleki eveni lebelikhashane. Bekungasimelula ngaMosi kuphila imphilo yasehlane ngobe ekucaleni abejabulela imphilo lentofontofo yaseGibhithe. Nanobe kunjalo, Mosi wahlala akulungele ngekuchubeka asebentisa tonkhe ticondziso Jehova labemniketa tona. Ngako-ke, Nkulunkulu wamsebentisa kute akhulule bomnakabo ngemva kwekutsi sekahlale iminyaka lengu-40 kaMidiyani. Alalela sicondziso saNkulunkulu, Mosi wabuyela eGibhithe. Besesifikile sikhatsi sekutsi Mosi ente umsebenti Nkulunkulu labemnike wona, futsi awente ngendlela yaNkulunkulu. (Eks. 3:2, 7, 8, 10) Ngesikhatsi sekaseGibhithe, Mosi ‘umuntfu lotfobeke kwendlula wonkhe umuntfu,’ abedzinga kukholwa kanye nesibindzi kute akwati kuma embikwaFaro. (Num. 12:3) Waya kuFaro tikhatsi letinyenti njengobe letishayo betichubeka, futsi abengati nekutsi bekufanele aye kuye tikhatsi letingakhi.

15. Yini leyenta Mosi wahlala awaphaphamele ematfuba labengadvumisa Babe wakhe wasezulwini ngawo, nanobe abedvumateka?

¹⁵ Eminyakeni lengu-40 leyalandzela, kusuka ku-1513 B.C.E. kuya ku-1473 B.C.E., Mosi wahlangabetana nekudvumateka lokunyenti. Nanobe kunjalo, abewaphaphamele ematfuba labengadvumisa Jehova ngawo futsi akhutsata nema-Israyeli kutsi ente njalo. (Dut. 31:1-8) Kungani? Kungobe abetsandza libito laJehova kanye nebukhosi bakhe kakhulu kwendlula indlela labetsandza ngayo libito lakhe. (Eks. 32:10-13; Num. 14:11-16) Nanobe natsi sidvumala, kufanele sichubeke sisekela bukhosi baNkulunkulu, siciniseke ngekutsi indlela yakhe yekwenta tintfo ihlakaniphile, ilunge kakhulu, futsi incono kunanobe nguyiphi. (Isa. 55:8-11; Jer. 10:23) Nawe utiva ngalendlela yini?

Hlala Uphapheme!

16, 17. Kungani Makho 13:35-37 abaluleke kakhulu kuwe?

¹⁶ “Caphelani nilindze, ngobe anati kutsi leso sikhatsi siyawufika nini.” (Mak. 13:33) Jesu washo lesecwayiso ngesikhatsi akhuluma ngetimphawu lebetitawuveta kuphela kwalelive lelibi. Asewucabange ngalamavi ekuphetsa labhalwe nguMakho esiphrofetho saJesu lesikhulu lesitsi: “Lindzani, ngobe animati umnikati wendlu kutsi uyawubuya nini. Angahle abuye ebusuku nome ekhatsi nebusuku, angabuya ekukhaleni kwekucala kwelichudze, nome ekuseni. Nakefika ningakamlindzeli, akanganikhandzi nilele. Loku lengikusho kini, ngikusho kubo bonkhe ngitsi: Lindzani.”—Mak. 13:35-37.

¹⁷ Lesikhutsato saJesu sisenta sicabangisise. Wakhuluma ngetikhatsi letine letehlukehlukene tekulindza ebusuku. Kulindza kwekugcina  bekusikhatsi lokumatima kakhulu ngaso kuhlala uphapheme, ngobe bekucala ngeli-awa lesitsatfu entsatsakusa kute kube ngulapho kuphuma lilanga. Tati temphi titsatsa lesikhatsi njengaleso lesiphumelelako ekuhlaseleni sitsa, futsi titsi silitfuba lelihle lekusitfola ‘silele.’ Ngendlela lefananako, njengobe lelive lilele ngekwakamoya, natsi singakutfola kumatima kuhlala siphapheme. Siyakungabata yini kutsi kudzingeka ‘silindze’ futsi ‘siphaphamele’ kuphela lokwabiketelwa kanye nekukhululwa kwetfu?

18. NjengaboFakazi BaJehova, nguliphi litfuba lelihle lesinalo?

¹⁸ Umceceshi wetilwane lesikhulume ngaye ekucaleni wasindza ngesikhatsi ahlaselwa yingwe yaseBengal. Ngalokwehlukile kuloko, siphrofetho seliBhayibheli sitsi inkholo yemanga kanye nalelive lelibi angeke likubalekele kuphela. (Semb. 18:4-8) Shengatsi tonkhe tikhonti taNkulunkulu, labadzala kanye nalabancane, bangakubona kubaluleka kwekwenta konkhe lokusemandleni abo kutsi bahlale balindzele lilanga laJehova njengobe Nowa nemndeni wakhe benta. Siphila eveni lelingamlaleli Nkulunkulu lapho bafundzisi benkholo yemanga kanye nebantfu labangakholelwa kuNkulunkulu, bedzelela uMdali ngetimfundziso tabo. Nanobe kunjalo, kufanele sikubalekele kuyenga kwabo. Asihlale sitikhumbula njalo letibonelo lesisandza kufundza ngato, sihlale siwaphaphamele ematfuba ekusekela kanye nekudvumisa Jehova ‘longuNkulunkulu wabonkulunkulu’ futsi ‘longuNkulunkulu lomkhulu, nalonemandla nalowesabekako.’—Dut. 10:17.

[Umbhalo longentansi]

Usakhumbula?

• Kungani kwadzingeka kutsi Nowa anake tidzingo takamoya temndeni wakhe kucala?

• Tikhatsi lesiphila kuto tifanana njani nemalanga aNowa?

• Kungani Mosi ahlala anake tetsembiso taJehova nanobe abedvumateka?

• Ngutiphi tiphrofetho teliBhayibheli letikwenta uhlale uphapheme ngekwakamoya?

[Imibuto Yesihloko Lesifundvwako]

[Sitfombe ekhasini 25]

Nowa nemndeni wakhe bahlala banake umsebenti waJehova

[Sitfombe ekhasini 26]

Tetsembiso taNkulunkulu leticinisekile tasita Mosi kutsi ahlale alindzile