Umbuto Lovela Kubafundzi . . .

Kuphila Lokuphakadze EPharadisi Kutawuba Ngulokungajabulisi Yini?

▪ LiBhayibheli letsembisa kutsi singaphila phakadze emhlabeni loliPharadisi. (Tihlabelelo 37:29; Lukha 23:43) Kuphila phakadze endzaweni lenhle kutawuba ngulokungajabulisi yini?

Lona ngumbuto lobalulekile. Bacwaningi batfole kutsi kuba nesitunge lesingapheli kungenta umuntfu akhatsateke, acindzeteleke, futsi ente tintfo letiyingoti. Labo labete injongo ekuphileni nobe labo labangakujabuleli kwenta imisebenti yabo yamalanga onkhe, bangase babe nesitunge. Bantfu labatawuphila ePharadisi batawube bete yini injongo ekuphileni? Tintfo labatawutenta malanga onkhe titawuba nguletingajabulisi yini?

Kwekucala, khumbula kutsi nguNkulunkulu Jehova, uMbhali weliBhayibheli, losetsembisa kuphila lokuphakadze. (Johane 3:16; 2 Thimothi 3:16) Imfanelo yakhe leyinhloko lutsandvo. (1 Johane 4:8) Jehova usitsandza kakhulu futsi usinikete tintfo letinyenti letinhle letisenta sijabule.—Jakobe 1:17.

UMdali wetfu uyati kutsi kute sijabule, sidzinga kwenta umsebenti lozuzisako. (Tihlabelelo 139:14-16; Umshumayeli 3:12) EPharadisi, bantfu angeke bative bangakabaluleki. Umsebenti labatawuwenta utawubazuzisa futsi uzuzise nalabo lababatsandzako. (Isaya 65:22-24) Kube bewunemsebenti lojabulisako, lodzinga kutimisela, nalokufanele uwente njalo, kuphila bekutawuba ngulokungajabulisi yini?

Cabanga nangekutsi Nkulunkulu Jehova angeke avumele nanobe ngubani kutsi aphile ePharadisi. Lesipho sekuphila lokuphakadze usiniketa kuphela labo labalingisa Jesu, iNdvodzana yakhe. (Johane 17:3) Ngesikhatsi alapha emhlabeni, Jesu wakujabulela kwenta intsandvo yaBabe wakhe. Wafundzisa balandzeli bakhe ngemavi kanye nangesibonelo kutsi injabulo lehlala njalo itfolakala ngekupha kunangekwemukela. (Imisebenti 20:35) Emhlabeni loliPharadisi, bonkhe bantfu batawuphila ngemiyalo lemibili lemikhulu—lokukutsandza Nkulunkulu kanye namakhelwane. (Matewu 22:36-40) Asewuticabange nje ukanye nebantfu labete bugovu, labakutsandzako nalabatsandza umsebenti wabo! Ucabanga kutsi angeke kujabulise yini kuhlala nebantfu labanjalo?

Yini lenye lesitawuyenta ePharadisi? Lilanga nelilanga, sitawuba nelitfuba lekufundza tintfo letinsha mayelana neMdali wetfu. Bacwaningi batfole tintfo letinyenti letimangalisako mayelana nendalo yaJehova. (Roma 1:20) Nanobe kunjalo, kusekuncane kakhulu lesikucondzako ngetintfo Jehova latidalile. Etinkhulungwaneni teminyaka leyengcile, Jobe, indvodza leyetsembekile, wahlolisisa loko labekwati ngendalo yaNkulunkulu, futsi siphetfo sakhe sisasebenta nalamuhla. Watsi: “Lawa ngemacentselo nje emisebenti [yaNkulunkulu]. Maye, lokukhulunywa ngaye sikuva kalufifi! Ngubani nje longakucondza kudvuma kwemandla akhe?”—Jobe 26:14.

Ngisho nobe singaphila phakadze, angeke size sitati tonkhe tintfo letimayelana naNkulunkulu Jehova kanye nemisebenti yakhe. LiBhayibheli litsi Nkulunkulu ufake sifiso sekuphila phakadze etinhlitiyweni tetfu. Kodvwa liphindze litsi angeke sikhone “kuyicondza imisebenti yaNkulunkulu kusukela ekucaleni kwayo kuze kube sekugcineni.” (Umshumayeli 3:10, 11) Ucabanga kutsi kutawuba ngulokungajabulisi yini kufundza tintfo letinsha ngeMdali wakho?

Ngisho nalamuhla, labo labatigcina bamatasatasa ekwenteni umsebenti lozuzisa labanye nalokhatimulisa Nkulunkulu ababi nesitunge. Natsi singaciniseka kutsi nasenta umsebenti lofananako, angeke size sibe nesitunge—ngisho nobe singaphila phakadze.

[Emavi laveta Umtfombo wesitfombe ekhasini 14]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/STScI/NASA)