Incociswano Namakhelwane—Bonkhe Bantfu Labalungile Baya Ezulwini Yini?

BOFAKAZI BAJEHOVA bayakujabulela kucoca ngeliBhayibheli nabomakhelwane babo. Ukhona yini umbuto lotsite ngeliBhayibheli lowake watibuta wona? Uyafisa yini kwati ngetinkholelo tabo nobe tintfo labatentako enkholweni yabo? Nangabe kunjalo, ungangabati kubabuta ngato esikhatsini lesitako nawuhlangana nabo. Bangakujabulela kucoca nawe ngato.

Kulencociswano lelandzelako, kunaletinye tetintfo Fakazi waJehova langase acoce ngato namakhelwane wakhe. Asesitsi Sipho, longulomunye waboFakazi uvakashele Veli.

Bantfu Labaya Ezulwini Bayokwentani Khona?

Sipho: Nawucabanga ngelikusasa, tintfo titawuba ncono yini nobe titawuba timbi nakakhulu nobe ngeke kushintje lutfo?

Veli: Ngicabanga kutsi titawuba ncono. Ngijake kuya ezulwini ngiyohlala neNkhosi.

Sipho: Litsemba lelihle lelo mnaketfu. LiBhayibheli likhuluma kanyenti ngekutsi kunjani kuphila kwasezulwini nekuya khona. Wake wacabangisisa yini ngekutsi bantfu labaya ezulwini bayokwentani khona?

Veli: Siyohlala naNkulunkulu simdvumise phakadze.

Sipho: Yintfo lenhle leyo. LiBhayibheli aligcini ngekukhuluma ngalelitfuba leliyingcayizivele lelitawutfolwa bantfu labaya ezulwini kodvwa liphindze likhulume nangemsebenti lobalulekile labatawenta.

Veli: Msebenti muni lowo?

Sipho: Ngumsebenti lochazwe ku-Sembulo 5:10. Lelivesi litsi: “[Jesu] wabenta baba ngemakhosi nebaphristi kuNkulunkulu wetfu, bayawubusa etikwemhlaba wonkhe.” Unakile yini kutsi msebenti muni loyowentiwa bantfu labaya ezulwini?

Veli: Lelivesi litsi batawubusa njengemakhosi etikwemhlaba.

Sipho: Yindzaba lejabulisako leyo mnaketfu.

Batawubusa Bobani?

Sipho: Awuvumi yini kutsi nangabe bantfu labaya ezulwini batawubusa njengemakhosi, kufanele kutsi bakhona nalabatababusa? Nawucabanga mnaketfu, kunengcondvo yini kutsi kungaba nahulumende kodvwa kube kute bantfu lobabusako?

Veli: Ngatsi sengiyakuva mnaketfu.

Sipho: Umbuto lesingatibuta wona ngulotsi batawusa bobani labo labaya ezulwini?

Veli: Ngicabanga kutsi sitawubusa bantfu labayobe basemhlabeni ngaleso sikhatsi labayobe basengakafi baya ezulwini.

Sipho: Loko kungabonakala kunengcondvo nangabe bonkhe bantfu labalungile baya  ezulwini kodvwa kukhona lokunye lofanele sicabange ngako. Kungenteka yini kutsi labanye bebantfu labalungile ngeke baye ezulwini?

Veli: Angikaze ngive umKhristu lokholelwa entfweni lenjalo.

Sipho: Ngikubuta lombuto ngenca yaloko lokushiwo Tihlabelelo 37:29. Ngicela ulifundze lelivesi mnaketfu.

Veli: Litsi: “Labalungile bayawudla lifa lemhlaba, bahlale kulo kuze kube phakadze.”

Sipho: Ngiyabonga mnaketfu. Unakile yini kutsi bantfu labanyenti labalungile batawuhlala kuphi?

Veli: Lelivesi litsi batawuhlala lamhlabeni.

Sipho: Kunjalo mnaketfu futsi ngeke bahlale sikhashana nje. Naka kutsi lelivesi litsi: “Bahlale kulo kuze kube phakadze.”

Veli: Mhlawumbe loko kumane nje kusho kutsi kutawuhlale kunebantfu labalungile lamhlabeni. Nasifa siya ezulwini, sikhala setfu sitawuvalwa ngulabanye bantfu labalungile labatawutalwa.

Sipho: Bantfu labanyenti bangase balichaze kanjalo lelivesi kodvwa kungenteka yini kutsi lisho intfo leyehlukile kuloko wena lokucabangako? Kungenteka yini nekutsi lelivesi lisho kutsi bantfu labalungile batawuhlala lamhlabeni phakadze?

Veli: Sengiyalahleka-ke manje.

Umhlaba Lolipharadisi Esikhatsini Lesitako

Sipho: Ngicela ucabange ngekutsi lomunye umbhalo utsini ngekuphila kwasemhlabeni esikhatsini lesitako. Ase sifundze Sembulo 21:4. Mayelana nebantfu labatawube baphila ngaleso sikhatsi, lelivesi litsi: “[Nkulunkulu] uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu, ngobe kwakucala sekwendlulile.” Livakala njani lelitsemba mnaketfu?

Veli: Liyajabulisa, kodvwa ngicabanga kutsi likhuluma ngekutsi kutawuba njani kuphila ezulwini.

Sipho: Kuliciniso kutsi bantfu labaya ezulwini batatitfola letibusiso. Ngicela siphindze silibuke lelivesi, litsi kutawentekani ngekufa?

Veli: Litsi “sekuyawubate kufa.”

Sipho: Ushaye khona mnaketfu. Ngiyetsemba utawuvuma kutsi intfo lokutsiwa sengeke ibe khona isuke ike yaba khona.

Veli: Yebo, kunjalo.

Sipho: Wake weva yini kutsi kuyafiwa ezulwini? Kulamhlabeni kuphela lapho bantfu bafa khona.

Veli: Ngisetawucabanga ngaloku lokushoko.

Sipho: Uyabona wena Veli mnaketfu, liBhayibheli lifundzisa kutsi labanye bantfu labalungile batakuya ezulwini kodvwa bantfu labanyenti batawuphila lamhlabeni phakadze. Ngiyetsemba kutsi uke waweva lamavi latsi: “Babusisiwe labamnene, ngobe bayawudla lifa lemhlaba.”—Matewu 5:5.

Veli: Yebo, ngilive kanyenti lelivesi lifundvwa esontfweni.

Sipho: Nangabe bantfu labanyenti batawudla lifa lemhlaba, loko akusho yini kutsi bantfu batawuhlala lamhlabeni? Bantfu labatohlala lamhlabeni batawujabulela tinzuzo lokukhulunywa ngato kulombhalo weSembulo. Batawubona umhlaba lesiphila kuwo sewushintjile ngobe Nkulunkulu utawucedza bonkhe bubi ngisho nekufa lombala.

Veli: Ungatsi sengiyakucondza loku lokushoko kodvwa angikholwa kutsi sesingasima evesini linye nome lamabili nje kuphela lasekela loko.

Sipho: Kunjalo mnaketfu. Ecinisweni manyenti emavesi lakhuluma ngekutsi kutawuba njani kuphila lamhlabeni esikhatsini lesitako. Nawusenesikhashana, ngingakukhombisa lamanye emavesi lengiwatsandzako.

Veli: Ngisenaso sikhashana mnaketfu ungangikhombisa.

“Benti Balokubi Bayawunyamalala”

Sipho: Ekucaleni sifundze Tihlabelelo 37:29. Asesibuyele kuwo lombhalo weTihlabelelo,  nyalo sifundze vesi 10 na 11. Ngicela uwafundze lamavesi.

Veli: Atsi: “Emvakwesikhashana benti balokubi bayawunyamalala, uyakutsi uyabafuna bangabe basatfolakala. Kodvwa labamnene bayawulidla lifa lemhlaba, bahlale kahle, batijabulise ngekuthula lokukhulu.”

Sipho: Ngiyabonga mnaketfu. Livesi 11, litsi bantfu “labamnene” batawuhlala kuphi?

Veli: Litsi “bayawulidla lifa lemhlaba.” Nanobe kunjalo, ngicabanga kutsi lelivesi likhuluma ngentfo leyenteka nyalo ngobe vele bantfu labalungile bakhona lamhlabeni.

Sipho: Ucinisile mnaketfu, kodvwa-ke naka kutsi lelivesi liphindze litsi bantfu labalungile ‘batatijabulisa ngekuthula lokukhulu.’ Kukhona yini kuthula lamhlabeni lamuhla?

Veli: Cha, akukho.

Sipho: Nakunjalo, lesetsembiso sesiyagcwaliseka yini? Asengikubekisele kanjena: Asesitsi unetindlu tekucashisa. Labanye bantfu labacashile balungile, bayatinakekela letindlu futsi bayetama kuba bomakhelwane labakahle kulabanye. Uyakujabulela kubacashisa kodvwa letinye ticashi atitiphatsi kahle futsi atihlalisani kahle nabomakhelwane bato. Ungenta njani nangabe leticashi tingafuni kushintja?

Veli: Ngingaticosha.

Sipho: Nguloko kanye Nkulunkulu latakwenta ngebantfu lababi labasemhlabeni. Ngicela siphindze sifundze vesi 10. Utsi: “Benti balokubi bayawunyamalala.” Ngalamanye emavi, Nkulunkulu “utabacosha” bantfu labahlupha labanye. Bantfu labalungile batawutfola kuphila lokumnandzi emhlabeni lonekuthula. Ngiyabona kutsi lendzaba yekutsi bantfu labalungile batawuhlala phakadze lamhlabeni ingevakala yehluke kakhulu kuloko wena lofundziswe kona.

Veli: Yebo vele, angikaze ngikuve loko esontfweni.

Sipho: Njengobe ukhulumile ekucaleni, akukeneli kumane nje sifundze umbhalo munye nobe mibili lesekela lendzaba lesikhuluma ngayo. Kufanele sihlole kutsi liBhayibheli lilonkhe, litsini ngelikusasa lebantfu labalungile. Ngekusho kwalemibhalo lesiyifundzile lamuhla, ucabanga kutsi kungenteka yini kutsi labanye bantfu labalungile batawuya ezulwini kodvwa labanyenti batawuphila phakadze lapha emhlabeni?

Veli: Angiciniseki ngaloko, kodvwa ngiyavuma kutsi kubonakala kunjalo ngekusho kwalemibhalo lesiyifundzile. Ngisatewucabanga ngalendzaba.

Sipho: Njengobe utawube ucabanga ngalendzaba, kungenteka ube naleminye imibuto ngayo. Lomunye ngulotsi, kutsiwani ngebantfu labalungile lebebaphila kadzeni? Basezulwini bonkhe yini? Nangabe bangayanga bonkhe ezulwini, bakuphi nyalo?

Veli: Ngiyawutsandza lombuto wakho.

Sipho: Mhlawumbe ngingakusita ngetintfo letimbili. Kwekucala, ase ngikubhalele imibhalo lembalwa lekhuluma ngalendzaba. a Kwesibili, ngicela kuphindze ngibuye sitococa ngalemibhalo ngemuva kwekutsi nawe sewuyifundzile waphindze wacabanga ngayo. Kutakulungela yini loko?

Veli: Kute inkinga mnaketfu ungabuya. Ngiyabonga.

[Umbhalo longentansi]