LiBhayibheli Liyakugucula Kuphila

YINI leyenta indvodza leyakhulela emndenini lokhonta ngekwetsembeka eKatolika futsi leyaphumelela emsebentini wayo webuphoyisa yaba nguFakazi WaJehova? Yini leyenta siphekula layekela budlova laba likholwa? Fundza lendzaba kuze utivele kutsi batsini

“Ngatfola Inchazelo Lebanti Ngalokuhle Nalokubi.”—SEBASTIÃO ALVES JUNQUEIRA

UMNYAKA LATALWA NGAWO: 1946

LIVE LATALELWA KULO: BRAZIL

UMLANDVO WAKHE: LIJAJI

KUPHILA KWAMI: Umndeni wakitsi bewuhlala eveni laseBrazil, endzaweni lengemakhilomitha lasitfupha nawusuka edolobheni iPiquete. Batali bami bebanelipulazi lelincane, bebalima kuze banakekele tidzingo tetfu. Ngafundza esikolweni sasePiquete, ngekuhamba kwesikhatsi ngatsenga libhayisikili lelidzala lebelenta kube melula kuya edolobheni. Bantfu basendzaweni yakitsi bebahlupheka kodvwa lidolobha belihlobile nebungebengu bebungakandzi. Emadvodza lamanyenti bewasebenta edolobheni efemini yekwakha tikhali temphi.

Bengitsandza kufundza futsi ngakhona kungena e-Aeronautical Military School lesisedolobheni lelisedvutane lapho ngatfola khona ticu tebusayitjeni nga-1966. Ngemuva kwaloko ngaya ekolishi letemtsetfo lapho ngatfola khona ticu temtsetfo. Ngekuhamba kwesikhatsi, ngafaka sicelo sekuba ngumphatsi wemaphoyisa. Nga-1976 ngaphumelela esivivinyweni ngawutfola lomsebenti. Ngaletinye tikhatsi umsebenti wami bewufaka ekhatsi nekuba ngumphatsi welijele. Ngaleso sikhatsi, boFakazi BaJehova bebavamise kuta batewucela imvume yekushumayela tiboshwa. Bebahlale bangicatsatela nami umlayeto weliBhayibheli. Bengimhlonipha kakhulu Nkulunkulu. Kwangikhanga kufundza kutsi Nkulunkulu unelibito lelitsi Jehova nekutsi singakhona kuba bangani bakhe.

Kancane kancane ngatfutfukisa ticu tami. Nga-1981 ngaphindze ngaphumelela etivivinyweni ngaba lijaji lembuso. Kwase kutsi nga-2005 ngabekwa kutsi ngibe lijaji enkantolo yaseSão Paulo lokundluliselwa kuyo emacala.

INDLELA LIBHAYIBHELI LELAKUGUCULA NGAYO KUPHILA KWAMI: Ngekushesha ngemuva kwekutsi ngitfole ticu temtsetfo, ngacala kufundza liBhayibheli intfo leyangiletsela lushintjo lolukhulu endleleni lengicabanga ngayo. BengingumKatolika lowetsembekile. Emndenini wakitsi bekunebaphristi nebabhishobhi futsi bengivamise kusita umphristi nakuneMthendeleko. Bengicale ngifundze incenye lokutsiwe ngiyifundze encwadzini yemthandazo bese umphristi uyashumayela. Bekungesiyo intfo leyetayelekile kumaKatolika kufundza liBhayibheli. Make watfukutsela wagana lunwabu nakeva kutsi mine ngifundza liBhayibheli.  Wetama kungiyekelisa atsi ngitawuhlanya. Nanobe kunjalo, ngachubeka ngilifundza ngobe bengingaboni lutfo lolungaba yingoti ngekulifundza.

Ngicabanga kutsi sifiso sami sekufuna kwati ngiso lesangikhutsata kutsi ngifundze liBhayibheli. Bengifuna kwati kabanti ngebaphristi nangendzima yabo esontfweni. Ngaphindze ngafundza ngemfundziso yemaKatolika yekulwela inkhululeko, kodvwa inchazelo yayo beyingevakali futsi ingacaci lokwenta kutsi ngingayicondzi.

Ngesikhatsi lesifanako, dokotela wami wematinyo longumBhudda wanginiketa incwadzi lebekaphiwe yona. Beyinesihloko lesitsi “Did Man Get Here by Evolution or by Creation?” a Ngayemukela lencwadzi ngicabanga kutsi kutawujabulisa kuyifundza kanye nencwadzi yaCharles Darwin letsi “The Origin of Species.” Kulencwadzi letsi “Did Man Get Here by Evolution or by Creation?” Ngatfola kutsi lekushoko kuyevakala, kunengcondvo futsi inchazelo yayo iyenetisa. Bengingangabati kutsi imfundziso yekutigucukela kwemvelo ite sisekelo.

Kufundza tihloko letikhuluma ngendalo kulencwadzi kwakhulisa sifiso sami sekufuna kwati. Bengifuna kutfola letinye tincwadzi letishicilelwa boFakazi BaJehova. Ngatjelwa kutsi makhenikha wasesikolweni sekufundzela kwakha tindiza unguFakazi WaJehova. Ngakhuluma naye wanginika letinye tincwadzi. Ngaleso sikhatsi angizange ngisemukele sifundvo seliBhayibheli saboFakazi BaJehova. Bengicabanga kutsi ngingatifundzela ngingedvwana liBhayibheli.

Ngalesikhatsi ngicala kufundza liBhayibheli, ngancuma kutsi njengobe sengishadile kutawuba kuhlakanipha kutsi ngilifundze nemndeni wami. Besilifundza njengemndeni njalo ngeliviki sicoce ngalo. Njengobe ungemaKatolika, umndeni wakitsi bewunake kakhulu baphristi nebabhishobhi. Ngako, lengakufundza ku-Johane 14:6 lotsi: “Jesu watsi kuye [kumfundzi Tomase]: ‘Mine ngiyindlela, neliciniso, nekuphila. Kute longeta kuBabe nakangeti ngami.’” Lamavi angenta ngafuna kwati kabanti. Ngemuva kwekuyicwaningisisa lendzaba, ngaciniseka kutsi insindziso itfolakala kuJehova ngaJesu. Besikholelwa kutsi insindziso sayitfola ngebaphristi.

Leminye imibhalo yeliBhayibheli lemibili leyashintja indlela lebengicabanga ngayo ngemaKatolika netimfundziso tawo, ngumbhalo we-Taga 1:7 lotsi: “Kwesaba Simakadze kusicalo selwati, tilima tiyakwedzelela kuhlakanipha nemiyalo.” Lomunye ngu-Jakobe 1:5 lotsi: “Nangabe emkhatsini wenu kukhona loswele kuhlakanipha, akacele kuNkulunkulu lonika bonkhe bantfu ngekwephana lokungenakufehla, utawuphiwa.” Bengisolo ngomele lwati nekuhlakanipha, lengingazange ngikutfole esontfweni. Ngako ngayekela kuya esontfweni.

Nga-1980, umkami wacala kufundza liBhayibheli naboFakazi BaJehova. Nome nini nangisekhaya bengibajoyina nabafundza. Ngekuhamba kwesikhatsi ngasemukela sifundvo seliBhayibheli. Nobe kunjalo, kwasitsatsa sikhatsi lesidze kuncuma kubhajatiswa sibe boFakazi BaJehova. Umkami wabhajatiswa nga-1994 mine ngabhajatiswa nga-1998.

INDLELA LENGIZUZE NGAYO: Bantfwabami labane kubasitile kukhuliswa ngetimiso taJehova. (Efesu 6:4) Nginemadvodzana lamabili, akhutsele ekusiteni labanye boFakazi emabandleni lakuwo. Emadvodzakati ami lamabili nawo akhutsele emsebentini wekushumayela. Umkami usebentisa ema-awa lamanyenti inyanga ngayinye asita bantfu bafundze liBhayibheli futsi mine ngijabulela kukhonta njengalomdzala ebandleni lesikulo.

Ngalesikhatsi ngiba nguFakazi WaJehova, ngatfola inchazelo lebanti ngalokuhle nalokubi. Njengobe ngilijaji, ngetama kusebentisa indlela Jehova lanakekela ngayo tindzaba letehlukehlukene nangisenkantolo. Ngihlolisisa tonkhe  timo, ngicabangele futsi ngiba neluvelo nakunetimo letibitela loko.

Ngiteke emacala lamanyenti ebudlova, bugebengu, kuhlukunyetwa kwebantfwana nalamanye emacala ekwephulwa kwemtsetfo. Kuteka emacala lanjalo akungenti ngingatinaki ngemabomu timiso taJehova. Nangibukela tindzaba, kuyangicasula kwandza kwekutiphatsa lokubi nekungetsembeki lokukulomhlaba. Ngiyambonga Jehova ngekutsi sengiyatati tizatfu letenta kutsi bucala bandze kangaka kanye nelitsemba lesinalo letikhatsi letincono.

“Lijele Alizange Lingishintje.”—KEITH WOODS

UMNYAKA LATALWA NGAWO: 1961

LIVE LATALELWA KULO: NORTHERN IRELAND

UMLANDVO WAKHE: SIPHEKULA

KUPHILA KWAMI: Ngatalwa nga-1961 ePortadown, lidolobha leliphitsitelako eNorthern Ireland. Ekhaya kitsi besingemaPhrothestani sihlala emabhilidini lanabomakhelwane labangemaKatolika nemaPhrothestani. Imindeni leminyenti beyiphuyile. Nanobe besiphuyile, besiphilisana kahle nabomakhelwane betfu.

Bengitiphatsa ngendlela lengingatigcabhi ngayo. Nga-1974, ngatihlanganisa nema-“Troubles,” licembu leliyinkinga lebeliseNorthern-Ireland. Ngaleso sikhatsi simo saba sibi kakhulu etindzaweni tangakitsi. Nasi sibonelo, ngalobunye busuku babe njengobe abeyimenenja ye-Ulster Carpet Factory bekasemsebentini acecesha bafana lababili labangemaKatolika lebebabomakhelwane betfu ebhilidini lebesihlala kulo. Ngalesikhatsi bangekho, umuntfu lotsite wajikijela ibhomu efasiteleni lasendlini yekuphumula ekhabolabafana wabulala babe wabo, make wabo nemnakabo lomncane.

Kwaba netinkinga letinyenti, loko kwadala kutsi kube nemphi. EmaPhrothestani lebekahlala etindzaweni temaKatolika ashiselwa imiti yawo lokwawaphocelela kutsi ahambe etindzaweni temaKatolika, nemaKatolika bewahlushwa etindzaweni temaPhrothestani. Bese kunemaProthestani lamanyenti endzaweni yakitsi. Akutsatsanga sikhatsi lesidze ngemuva kwaloko kutsi ngiboshwe ngigwetjwe iminyaka lemitsatfu ngenca yekufaka sandla ekubhombeni.

Ngesikhatsi ngisesejele, ngaba nemngani lebekatiwa kakhulu welicembu lema-“loyalist” lokulicembu lepolitiki lase-Northern Ireland. Bekungatsi sibandzawonye futsi ngekuhamba kwesikhatsi ngaba sitolimisi lesikhulu emshadweni wakhe. Lijele alizange lisishintje. Ngemuva kwekuphuma ejele, sabuyela emacenjini etfu epolotiki futsi satimisela kakhulu kunasekucaleni. Umphumela waloko kwaba kutsi umngani wami aboshwe futsi. Ngalesikhatsi aboshiwe, wabulawa.

Nami besebangifuna kangangekutsi ngalelinye lilanga bashisa imoto yami. Letehlakalo tangenta ngatimisela nakakhulu kutepolitiki.

 Ngaleso sikhatsi, ngasita ekwenteni luhlelo lwe-“Troubles,” lolwasakatwa ku-British TV. Loluhlelo lwangengetela tinkinga. Ngalobunye busuku ngatsi nangibuya ekhaya ngakhandza umkami emukile. Ngemuva kwesikhashana nje ngenca yaloluhlelo lwe-TV, ngatsatselwa indvodzana yami. Ngiyatikhumbula ngitibuka esibukweni ngitsi, “Nkulunkulu, nangabe ukhona ngicela ungisite.”

NgeMgcibelo lolandzelako ngabona umuntfu lengimatiko, Paul lobesanguFakazi WaJehova. Wacoca nami ngeliBhayibheli. Ngemuva kwemalanga lamabili wangitfumelela Sicongosekulindza. Lesinye sihloko lebesikulomagazini besinemavi aJesu latfolakala ku-Johane 18:36 latsi: “Umbuso wami awusiwo wakulelive. Kube bewuwakulelive, ngabe balandzeli bami bangilwele, kuze ngingetiwuniketwa kumaJuda. Kepha noko umbuso wami awusiwo wakulelive.” Lamavi angitsintsa kakhulu. Lelo kwaba lilanga lokwacala kushintja ngalo kuphila kwami.

INDLELA LIBHAYIBHELI LELAKUGUCULA NGAYO KUPHILA KWAMI: Paul wacala kufundza nami liBhayibheli. Ngekuhamba kwesikhatsi, Bill lomunye Fakazi WaJehova wachubeka nekufundza nami. Ngiyati kutsi bengingumfundzi longenetiseki kalula ngobe benginemibuto leminyenti, ngaze ngalandza bafundisi bami batomtjela kutsi loko lakushoko kungemanga. Nobe kunjalo, bengibona kutsi liVi laNkulunkulu lineliciniso.

Ngikhumbula ngalelinye lilanga ngitjela Bill kutsi angeti endlini yami kutongifundzela ngobe bekunemaphoyisa emgwacweni futsi imoto yakhe bewatayitsatsa ayishise. Nome kunjalo, Bill wefika sitofundza njengobe bekavame kwenta. Washiya imoto kakhe weta ngelibhayisikili. Kute umuntfu lobekangatsatsa libhayisikili. Ngalelinye lilanga, nginaBill sihleti kami sifundza liBhayibheli, kwefika emaphoyisa atengibopha. Nawangitsatsa ahamba nami, Bill wamemeta watsi ngetsembele kuJehova. Leto tentakalo tenta lushintjo lolukhulu ekuphileni kwami.

Kucala kwami kuya emihlanganweni yabo Fakazi BaJehova eHholweni LeMbuso kufanele kutsi kwabamangalisa labanye babo. Benginetinwele letindze ngifake nelicici futsi ngembetse silamba lebesineluphawu lwenhlangano yepolitiki lebengikuyo. Nobe kunjalo, angizange ngiyikholwe indlela boFakazi BaJehova labangiphatsa ngayo. Umusa wabo wangitsintsa kakhulu.

Nanobe bengifundza liBhayibheli, bengisolo ngitihlanganisa nebangani bami bakadzeni. Ngekuhamba kwesikhatsi, emaciniso lebengiwafundza eBhayibhelini angena ajula enhlitiyweni yami. Ngabona kutsi nangifuna kukhonta Jehova kufanele ngishiye ipolotiki nebangani bami. Kwenta loko bekungesimelula. Njengobe bengisolo ngifundza kabanti ngeliBhayibheli futsi ngitfola emandla kuJehova, ngakhona kwenta tingucuko ekuphileni kwami. Ngahhula tinwele, ngakhipha emacici ngatsenga isudu. Loko lebengikufundza kwangenta ngatfutfukisa simo sengcondvo lebenginaso ngalabanye bantfu.

INDLELA LENGIZUZE NGAYO: Bengiphila imphilo yebugebengu nebuphekula. Bemtsetfo bebangati ngekutsi ngisigebengu nekutsi ngisiphekula. Nyalo tintfo setishintjile. Sibonelo saloko kutsi ngalesikhatsi ngicala kuya emhlanganweni wesigodzi waboFakazi BaJehova lobewusedolobheni laseNavan, bemtsetfo bebangigadze kusukela e-Ireland kuya e-Northern Ireland. Nyalo, sengikhona kuya emihlanganweni lemikhulu ngaphandle kwekugadvwa futsi sengikhona kuhlanganyela ngenkhululeko emsebentini wekushumayela ngikanye naPaul naBill nalabanye ebandleni.

Njengobe kuphila kwami sekushintjile, sengililunga lelibandla. Kulelibandla kulapho ngatfola khona lomunye Fakazi libito lakhe nguLouise, lengagcine ngishade naye. Ngetulu kwaloko, bayibuyisa indvodzana yami.

Nangibuka emuva, ngiyatisola ngekuvisa labanye bantfu buhlungu. Ngiyaciniseka kutsi liBhayibheli liyabasita bantfu labafana nami kutsi bashintje ekuphileni imphilo lembi baphile imphilo lenenjongo nelitsemba.

[Umbhalo longentansi]

[Emavi lacashuniwe lasekhasini 12]

Make watfukutsela wagana lunwabu nakeva kutsi mine ngifundza liBhayibheli