2 Tikhronike 3:1-17
3 Solomoni wabese ucala kwakha indlu yaJehova+ eJerusalema eNtsabeni iMoriya,+ lapho Jehova bekabonakele khona kubabe wakhe Davide,+ endzaweni Davide bekayilungiselele, ebaleni lekubhulela la-Onani+ umJebhusi.
2 Wacala kwakha ngelilanga lesibili enyangeni yesibili, emnyakeni wesine wekubusa kwakhe.
3 Sisekelo sendlu yaNkulunkulu weliciniso lesabekwa nguSolomoni besingemamitha langaba ngu-27* budze nalangaba ngu-9 bubanti,*+ ngekuhambisana nendlela yekukala yasekucaleni.*
4 Livulandi lelingembili belingemamitha langaba ngu-9* bubanti, lilingana nebubanti balendlu, kuphakama kwalo kungu-54;* ngekhatsi wayinamatsisela ngeligolide lelicwengisisiwe.+
5 Wanamatsisela emaphanela esigodvo semjunipha elubondzeni lwalendlu lenkhulu* wabese uwanameka ngeligolide lelicwengisisiwe+ futsi wawahlobisa ngemdvwebo wetihlahla telusundvu+ nangetinketane.+
6 Ngetulu kwaloko, wahlobisa lendlu ngematje lamahle laligugu+ nangeligolide+ lasePhavayimu.
7 Wanameka ligolide kulendlu, emakabheni, etitubhini, elubondzeni nasetivalweni+ wase udvweba emakherubhi kulolubondza.+
8 Solomoni wabese wakha iNgcwelengcwele;+ budze bayo bebulingana nebubanti balendlu, bungemamitha langaba ngu-9,* futsi bubanti bayo bungemamitha langaba ngu-9.* Wayinameka ngeligolide lelicwengisisiwe+ lelingemathalenta langu-600.*
9 Sisindvo seligolide letipikili besingemashekeli langu-50* futsi wanamatsisela ligolide emakamelweni laseluphahleni.
10 Wabese wakha emakherubhi lamabili eNgcwelengcwele futsi wawanameka ngeligolide ngetulu.+
11 Budze betimphiko talamakherubhi+ bebungemamitha langaba ngu-9.* Luphiko lunye lwelikherubhi lekucala belungetudlwana kwemamitha lamabili* budze futsi belutsintsa lubondza lwalendlu, nalololunye luphiko lwalo belungetudlwana kwemamitha lamabili* budze futsi belutsintsana neluphiko lwalelelinye likherubhi.
12 Luphiko lunye lwalelelinye likherubhi belungemamitha langetudlwana kwalamabili* futsi belutsintsa lololunye lubondza lwalendlu. Lololunye luphiko nalo belungemamitha langetudlwana kwalamabili* futsi belutsintsa luphiko lwalelikherubhi lekucala.
13 Timphiko talamakherubhi betivulekile, tingemamitha langaba ngu-9* futsi lamakherubhi bekemile abuke eNgcwele.
14 Wenta nendvwangu+ ngentsambo leluhlata njengesibhakabhaka, intsambo lebukhwebeletane,* intsambo lebubendze nangelineni yelikhetselo futsi wenta imihlobiso yemakherubhi kulo.+
15 Wabese wenta tinsika letimbili+ ngembili kulendlu taba ngemamitha langu-15* nehhafu budze futsi bekunengcongwane lengetulu kwemamitha lamabili* etikwensika ngayinye.+
16 Waphindze wenta tinketane letinjengemigaco, wase utifaka etikwaletinsika wenta imihlobiso yetitselo temahananandza* langu-100 wawafaka kuletinketane.
17 Wamisa letinsika embikwelithempeli, lenye wayimisa ngesekudla* lenye wayimisa ngesencele;* lena lebeyingesekudla wayibita ngekutsi yiJakhini* kantsi lebeyingesencele wayibita ngekutsi yiBhowazi.*
Imibhalo lengentansi
^ NgesiHebheru kutsi, “besingemakhyubhitha langu-60.” Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ Ikhyubhitha levamile beyingu-44.5 cm, kodvwa labanye bacabanga kutsi ‘indlela yekukala yasekucaleni’ isho ikhyubhitha lelingana na-51.8 cm. Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ Leminye imibhalo yesandla yakadzeni itsi 120, kantsi leminye nalamanye emahumusho kutsi emakhyubhitha langu-20.
^ Lena kungenteka kutsi yiNgcwele.
^ Lithalenta belilingana nemakhilogremu langu-34.2. Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ Lishekeli belilingana nemagremu langu-11.4. Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ NgesiHebheru kutsi, “kwemakhyubhitha lasihlanu.” Fundza Sandzisanchazo B14.
^ NgesiHebheru kutsi, “kwemakhyubhitha lasihlanu.” Fundza Sandzisanchazo B14.
^ NgesiHebheru kutsi, “belungemakhyubhitha lasihlanu.” Fundza Sandzisanchazo B14.
^ NgesiHebheru kutsi, “belungemakhyubhitha lasihlanu.” Fundza Sandzisanchazo B14.
^ NgesiHebheru kutsi, “emakhyubhitha langu-20.” Fundza Sandzisanchazo B14.
^ NgesiNgisi kutsi “purple.”
^ NgesiHebheru kutsi, “ngemakhyubhitha langu-35.” Fundza Sandzisanchazo B14.
^ NgesiHebheru kutsi, “kwemakhyubhitha lasihlanu.” Fundza Sandzisanchazo B14.
^ Nobe “temaphomegranathi.”
^ Nobe “ngaseningizimu.”
^ Nobe “ngasenyakatfo.”
^ Lokusho kutsi “Shengatsi Yena [Jehova] Angayimisa Icine.”
^ Kungenteka kusho kutsi “Ngemandla.”
