Jobe 3:1-26
3 Ngemuva kwaloko Jobe wacala kukhuluma futsi wacalekisa lilanga latalwa ngalo.*+
2 Watsi:
3 “Kube mane alizange lifike lilanga lengatalwa ngalo,+Kanye nebusuku lapho lotsite atsi: ‘Kutelwe umfana!’
4 Lelolanga alibe bumnyama.
Nkulunkulu losetulu akangabi nandzaba nalo;Shengatsi nekukhanya kungete kwakhanya.
5 Shengatsi bumnyama lobukhulu* bungalimbonya.
Shengatsi lingambonywa lifu lelimnyama.
Shengatsi bumnyama lobesabekako bungambonya kukhanya kwalo.
6 Shengatsi lobo busuku bungaba mnyama kakhulu;+Shengatsi bungete bajabula emkhatsini wemalanga onkhe emnyaka,Futsi abungabalwa kunobe ngabe nguyiphi inyanga.
7 Bekutawuba ncono kube kute lowatalwa ngalobo busuku;Shengatsi umsindvo wenjabulo bewungete wevakala.
8 Shengatsi labo labacalekisa lilanga bangabucalekisa nalobusuku,Labo labakhona kuvusa ingwenya.*+
9 Shengatsi tinkhanyeti tentsatsakusa tingaba mnyama;Shengatsi lobobusuku bungamela kukhanya lokungeke kufike,Futsi abungakuboni kukhanya kwentsatsakusa.
10 Ngobe abuzange busivale sibeletfo samake;+Futsi abuzange bufihle tinkinga kuze ngingatiboni.
11 Angifanga ngani nje nangitalwa?
Kungani ngingazange ngishabalale nangiphuma esiswini samake?+
12 Kungani kwaba nematsanga langigonaNemabele langimunyisa?
13 Ngobe nje nyalo ngabe ngitilalele ngekuthula;+Ngabe ngilele, ngitiphumulele+
14 Ngabe ngitiphumulele nemakhosi asemhlabeni kanye nebeluleki bawo,Labatakhela tindzawo lesetabhidlika,*
15 Nobe nebantfwabenkhosi* lebebaneligolide,Lebebanetindlu letigcwele lisiliva.
16 Kungani ngingazange ngifane nemntfwana lofele esiswini,Ngibe njengebantfwana labangazange sebakubone kukhanya?
17 Bantfu lababi abakhatsateki ethuneni;Futsi labaphelelwe ngemandla bayaphumula.+
18 Ethuneni tonkhe tiboshwa tiyakhululeka;Atiliva livi lalotiphocelela kutsi tisebente.
19 Labakhulu nalabancane bayafana lapho,+Nesigcili siyakhululeka kumphatsi waso.
20 Nkulunkulu umnikelani kukhanya umuntfu lohluphekako
Ubaniketelani kuphila labo labacindzeteleke kakhulu?+
21 Kwentiwa yini kutsi labo labafuna kufa bangafi,+Ngisho nobe bakufunisisa kwendlula umcebo lofihliwe,
22 Labo labangajabula kakhulu
Futsi batfokote nababona kufa?
23 Nkulunkulu umnikelani kukhanya umuntfu lophambukile endleleni,Umuntfu lovalelwe nguNkulunkulu?+
24 Ngobe sibibitfwane sesikudla kwami,+Nekukhala kwami+ kunjengemsindvo wemanti lageletako.
25 Loko lebengikwesaba kakhulu sekungehlele,Futsi loko lebengikwesaba sekungifikele.
26 Angikakutfoli kuthula, kukhululeka nekuphumula,Solo nje ngihlaselwa tinkinga.”
Imibhalo lengentansi
^ NgesiHebheru kutsi, “wacalekisa lilanga lakhe.”
^ Nobe “bumnyama nelitfunti lekufa.”
^ NgesiHebheru kutsi, “Leviyathani.”
^ Kungaphindze kubekwe ngekutsi, “Labatakhela tindzawo letingasahlali muntfu.”
^ Nobe “netiphatsimandla letisesigabeni lesisetulu.”
