Kulandzisa KwaLukha 6:1-49
-
Jesu ‘uyiNkhosi yeliSabatha’ (1-5)
-
Indvodza lenesandla lesikhubatekile iyelashwa (6-11)
-
Baphostoli labangu-12 (12-16)
-
Jesu uyafundzisa futsi uyelapha (17-19)
-
Injabulo nebumatima (20-26)
-
Kutsandza titsa (27-36)
-
Yekelani kwehlulela labanye (37-42)
-
Sihlahla satiwa ngetitselo taso (43-45)
-
Indlu leyakhiwe kahle; indlu lenesisekelo lesicinile (46-49)
6 Ngesikhatsi ancamula emasimini ngeliSabatha, bafundzi bakhe bebachulula kolo bawudla,+ futsi bebawuhlikihla ngetandla.+
2 Nababona loko, labanye baFarisi batsi: “Niyentelani intfo lengakavumeleki kutsi yentiwe ngeliSabatha?”+
3 Jesu wabaphendvula watsi: “Anizange nifundze yini ngaloko Davide lakwenta ngesikhatsi yena nemadvodza lebekahamba nawo sebalambile?+
4 Wangena endlini yaNkulunkulu wanikwa tinkhwa lebetinikelwe kuNkulunkulu, futsi watidla, waphindze wapha nalabo lebekahamba nabo. Kute lobekavumelekile kutsi atidle letinkhwa ngaphandle kwebaphristi.”+
5 Ngemuva kwaloko Jesu watsi kubo: “INdvodzana yemuntfu iyiNkhosi yeliSabatha.”+
6 Ngalelinye liSabatha+ wangena esinagogeni wase uyafundzisa. Bekunendvodza lebeyinesandla sangesekudla lesikhubatekile.*+
7 Tati temtsetfo nebaFarisi bebamgadzile bafuna kubona kutsi utayiphilisa yini lendvodza ngeliSabatha khona batombeka licala.
8 Kodvwa Jesu bekakwati loko lebebakucabanga,+ ngako watsi kulendvodza: “Sukuma ute lapha ngembili.” Yasukuma, yaya kuye.
9 Jesu watsi kubo: “Madvodza, ngukuphi lesivumeleke kukwenta ngeliSabatha, ngulokuhle nobe ngulokubi? Kuvumelekile yini kusindzisa kuphila nobe kubulala ngeliSabatha?”+
10 Ngemuva kwekubabuka, watsi kulendvodza: “Yelula sandla sakho.” Yaselula, sase siyelapheka.
11 Nababona loku, batfukutsela babila, futsi bakhuluma bodvwa ngekutsi yini lebebangayenta kuJesu.
12 Kulawo malanga, Jesu waya entsabeni wayothantaza,+ futsi wathantaza busuku bonkhe kuNkulunkulu.+
13 Ekuseni, wabita bafundzi bakhe wase ukhetsa labangu-12, wababita ngekutsi baphostoli.+
14 BekunguSimoni, lambita ngekutsi nguPhetro, Andreya umnakabo, Jakobe, Johane, Filiphu,+ Bhatalomewu,
15 Matewu, Tomase,+ Jakobe indvodzana ya-Alfiyose, Simoni lobekakhutsele,
16 Judasi indvodzana yaJakobe, naJudasi Skariyothi lowagcina amtsengisile.
17 Wehla nabo wafike wema endzaweni lebekile. Bekunebafundzi bakhe labanyenti kanye nesicumbi lesikhulu sebantfu lebesite kutomlalela nekutowelashwa tifo, futsi besisuka kuyo yonkhe iJudiya neJerusalema, nasetindzaweni taseThire naseSidoni letingaselwandle.
18 Ngisho nalabo lebebahlushwa ngemadimoni belashwa.
19 Bonkhe bantfu bebafuna kumtsintsa ngobe bekuphuma emandla kuye,+ futsi bekabelapha bonkhe.
20 Waphakamisa emehlo wabuka bafundzi bakhe, wase utsi:
“Niyajabula nine leneswele, ngobe uMbuso waNkulunkulu ngewenu.+
21 “Niyajabula nine lenilambile nyalo, ngobe nitawesutsiswa.+
“Niyajabula nine lenikhalako nyalo, ngobe ngemuva kwesikhatsi nitawuhleka.+
22 “Niyajabula nobe nini lapho bantfu banitondza,+ banicosha emkhatsini wabo,+ banihlambalata futsi banikhuluma kabi batsi nibantfu lababi, ngenca yeNdvodzana yemuntfu.
23 Jabulani nitfokote ngobe umvuzo wenu mkhulu ezulwini, ngobe nguleto tintfo bokhokho babo lebebatenta kubaphrofethi.+
24 “Maye kini nine leninjingile,+ ngobe senivele niyitfolile indvudvuto yenu.+
25 “Maye kini nine lenesutsi nyalo, ngobe nitawulamba.
“Maye kini nine lenijabulako nyalo, ngobe nitawulila futsi nikhale.+
26 “Maye kini nangabe bonkhe bantfu bakhuluma kahle ngani,+ ngobe nguleto tintfo bokhokho babo lebebatenta kubaphrofethi bemanga.
27 “Kodvwa ngitsi kini nine lenilalele: Chubekani nitsandza titsa tenu, nibentele lokuhle labo labanitondzako,+
28 nibabusise labo labanicalekisako, futsi nithantazele labo labaniphatsa kabi.+
29 Nangabe umuntfu akushaya esihlatsini, mnike nalesi lesinye, futsi nangabe umuntfu atsatsa ingubo yakho yangetulu, ungayigodli nengubo yakho yangephansi.+
30 Phani bonkhe labakucelako,+ futsi nangabe lotsite atsatsa tintfo takho, ungamceli kutsi atibuyise.
31 “Njengobe nifuna bantfu bente kini, yentani kanjalo nani kubo.+
32 “Nangabe nitsandza labo labanitsandzako, kunizuzisa ngani loko? Ngobe ngisho netoni titsandza labo labatitsandzako.+
33 Nangabe nenta lokuhle kulabo labanentela lokuhle, kunizuzisa ngani loko? Ngobe ngisho netoni tenta kanjalo.
34 Kantsi futsi nangabe niboleka* labo lenetsemba kutsi batanibuyisela, kunizuzisa ngani loko?+ Ngobe ngisho netoni tiboleka toni kuze tibuyelwe ngulokulinganako.
35 Kunekutsi nente njalo, chubekani nitsandza titsa tenu, nente lokuhle, niboleke labanye ngaphandle kwekulindzela kubuyelwa lutfo.+ Umvuzo wenu utawuba mkhulu, futsi nitawuba ngemadvodzana aLosetikwako Konkhe, ngobe unemusa kulabo labangabongi nakulababi.+
36 Chubekani ninesihawu, njengobe nje naBabe wenu anesihawu.+
37 “Ngetulu kwaloko, yekelani kwehlulela labanye, kuze nani ningatowehlulelwa,+ futsi yekelani kufuna emaphutsa kulabanye, kuze nani ningatotfolakala ninemaphutsa. Chubekani nitsetselela,* nani nitawutsetselelwa.*+
38 Chubekani nipha labanye, nani nitawuphiwa.+ Batawunipha lokunyenti kakhulu, lokungagcishwa kugcwale konkhe leningaphatsa ngako. Ngobe ngendlela lenibaphatsa ngayo labanye nani nitawuphatfwa ngayo.”
39 Wase ubatjela umfanekiso, watsi: “Imphumphutse ingayihola yini lenye imphumphutse? Angeke yini totimbili tigcumukele emgodzini?+
40 Umfundzi akasimkhulu kunemfundzisi wakhe, kodvwa wonkhe umuntfu lofundziswe kahle utawuba njengemfundzisi wakhe.
41 Ulunakeni lutsi lolusesweni lalomunye umuntfu, kodvwa ube ungalunaki lugodvo lolusesweni lakho?+
42 Ungasho kanjani kulomunye umuntfu utsi: ‘Ngicela kukukhipha nalu lutsi lolusesweni lakho,’ kodvwa wena ube ungaluboni lugodvo lolusesweni lakho? Wena mtentisi! Cale ukhiphe lolugodvo lolusesweni lakho, khona utobona kahle kutsi ungalukhipha njani lutsi lolusesweni lalomunye umuntfu.
43 “Ngobe sihlahla lesihle ngeke kwenteke sitsele titselo letimbi; nesihlahla lesibi ngeke kwenteke sitsele titselo letinhle.+
44 Nguleso naleso sihlahla satiwa ngetitselo taso.+ Bantfu abawakhi emakhiwa esihlahleni semanyeva, futsi abawakhi emagilebisi esihlahleni selugagane.
45 Umuntfu lolungile ukhipha lokuhle lokugcwele enhlitiyweni yakhe, kodvwa umuntfu lomubi ukhipha lokubi lokugcwele enhlitiyweni yakhe; ngobe umlomo ukhuluma loko lokugcwele enhlitiyweni.+
46 “Ningibitelani-ke ngekutsi Nkhosi, kodvwa nibe ningatenti tintfo lengitishoko?+
47 Ngitanitjela kutsi ufana nabani umuntfu lota kimi futsi eve emavi ami bese uyawenta:+
48 Ufana nendvodza leyatsi nayakha indlu yayo yagubha kwashona, yase yakha sisekelo sayo etikwelidvwala. Kwatsi nakufika tikhukhula, emanti eta ngemandla kodvwa akazange akwati ngisho nekuyinyakatisa lendlu, ngobe beyakhiwe kahle.+
49 Kodvwa loyo lovako angenti,+ ufana nendvodza leyakha indlu yayo emhlabatsini yangasakhi sisekelo. Emanti eta ngemandla, futsi lendlu yavele yawa ngekushesha, yabhidlika yonkhe.”
Imibhalo lengentansi
^ NgesiGriki kutsi, “lesishwaphene.”
^ Lokusho, kubolekisa ube ungeke ubhadalise intalo.
^ Nobe “nitawukhululwa.”
^ Nobe “nikhulula labanye.”
