Kulandzisa KwaMakho 10:1-52
10 Jesu wesuka lapho wahamba waze wefika eminceleni yaseJudiya ngesheya kweJordane, futsi sicumbi sebantfu sabutsanela kuye. Wacala kusifundzisa njengobe bekavame kwenta.+
2 Kwase kuta baFarisi kuJesu kuze batfole liphutsa kuye, bambuta kutsi kuvumelekile yini kutsi indvodza idivose umkayo.+
3 Wabaphendvula watsi: “Kantsi Mosi watsini?”
4 Bona batsi: “Mosi wavuma kutsi ibhale incwadzi yedivosi, bese iyamshiya.”+
5 Kodvwa Jesu watsi kubo: “Mosi wanibhalela+ lomtsetfo ngenca yekutsi ninenkhani.+
6 Nanobe kunjalo, ekucaleni Nkulunkulu ‘wadala lomdvuna nalomsikati.+
7 Ngaleso sizatfu, indvodza itawushiya babe wayo namake wayo,+
8 futsi laba lababili batawuba nyamanye,’+ ngako abasesibabili, kodvwa sebanyamanye.
9 Loko Nkulunkulu lakuhlanganisile, akungehlukaniswa ngumuntfu.”+
10 Nasebasendlini, bafundzi bakhe bambuta ngaloku.
11 Watsi kubo: “Nangabe indvodza idivosa umkayo bese ishada nalomunye, inelicala kumkayo lekuphinga,+
12 futsi nangabe umfati adivosa indvodza yakhe bese ushada nalenye, uyaphinga.”+
13 Bantfu base baletsa bantfwana kuye kute ababusise, kodvwa bafundzi bakhe babekhuta.+
14 Nakakubona loku, Jesu akazange ajabule, futsi watsi kubo: “Bayekeleni bantfwana bete kimi; ningabavimbi, ngobe uMbuso waNkulunkulu webantfu labafana nabo.+
15 Ngicinisile ngitsi kini: Nobe ngubani longawemukeli uMbuso waNkulunkulu njengemntfwana, ngeke angene kuwo.”+
16 Ngako wabagona labantfwana, wababamba futsi wababusisa.+
17 Njengobe ahamba, umuntfu lotsite wagijima weta kuye wafike waguca embikwakhe, wambuta watsi: “Mfundzisi Lomuhle, yini lokufanele ngiyente kute ngitfole kuphila lokuphakadze?”+
18 Jesu watsi kuye: “Ungibitelani ngekutsi ngimuhle? Kute umuntfu lomuhle ngaphandle kwaNkulunkulu.+
19 Angitsi uyayati imitsetfo letsi: ‘Ungabulali,+ ungaphingi,+ ungebi,+ ungafakazi emanga,+ ungatsatsi lutfo ngebucili,+ hlonipha babe wakho namake wakho.’”+
20 Lomuntfu watsi kuye: “Mfundzisi, tonkhe letintfo ngitigcinile kusukela ngisemncane.”
21 Jesu wambuka, wamtsandza, wase utsi kuye: “Yinye intfo lesele: Hamba utsengise konkhe lonako, futsi uphe labeswele, nawenta njalo utawuba nemcebo ezulwini. Ngemuva kwaloko ubobese uyeta uyangilandzela.”+
22 Lomuntfu wajabha nakeva loko futsi wahamba abuhlungu, ngobe bekanjinge kakhulu.+
23 Ngemuva kwekucalata, Jesu watsi kubafundzi bakhe: “Kutawuba matima kakhulu ngalabo labanemali kutsi bangene eMbusweni waNkulunkulu!”+
24 Kodvwa bafundzi abamangalisa lamavi akhe. Jesu wase utsi kubo: “Bantfwana labatsandzekako, kumatima kakhulu kungena eMbusweni waNkulunkulu!
25 Kumelula kutsi likamela lingene embotjeni yenyalitsi kunekutsi umuntfu lonjingile angene eMbusweni waNkulunkulu.”+
26 Loko kwabamangalisa kakhulu kunakucala, base batsi kuye:* “Ngubani-ke lotawusindziswa?”+
27 Jesu wababuka emehlweni, watsi kubo: “Kumuntfu loku ngeke kwenteke, kodvwa kuNkulunkulu tonkhe tintfo tingenteka.”+
28 Phetro wase utsi kuye: “Nkhosi, sishiye tonkhe tintfo futsi sakulandzela.”+
29 Jesu watsi: “Ngicinisile ngitsi kini: Wonkhe umuntfu loshiye indlu, bomnakabo, bodzadzewabo, babe wakhe, make wakhe, bantfwana, nobe emasimu ngenca yami nangenca yetindzaba letimnandzi,+
30 utawutfola tindlu, bomnakabo, bodzadzewabo, bomake, bantfwana, nemasimu ngalokuphindvwe tikhatsi letingu-100 kulesikhatsi sanyalo, aphindze aphatfwe kabi+ bese kutsi esikhatsini* lesitako atfole kuphila lokuphakadze.
31 Kodvwa labanyenti lababekucala batawuba bekugcina, nalababekugcina babe bekucala.”+
32 Babese benyukela eJerusalema, futsi Jesu abehamba embikwabo. Bafundzi bakhe bamangala, kwatsi labo lebebabalandzela bacala kwesaba. Wabitela eceleni bafundzi bakhe labangu-12 wabatjela loko lobekutakwenteka kuye, watsi:+
33 “Nyalo senyukela eJerusalema, futsi iNdvodzana yemuntfu itawunikelwa kubaphristi labakhulu nasetatini temtsetfo. Batayilahla ngelicala batsi ayibulawe, bese bayinikela kubantfu betive,
34 bahlekise ngayo, bayikhafulele, bayishaye, futsi bayibulale, bese kutsi ngelilanga lesitsatfu ivuswe.”+
35 Emadvodzana lamabili aZebedi,+ boJakobe naJohane, beta kuye batsi: “Mfundzisi, kukhona lesicela usentele kona.”+
36 Yena watsi kubo: “Nifuna nginenteleni?”
37 Batsi kuye: “Sicela kuhlala nawe eMbusweni wakho,+ lomunye abe ngesekudla sakho, futsi lomunye abe ngesencele sakho.”
38 Kodvwa Jesu watsi kubo: “Aniyati lentfo leniyicelako. Ningakhona yini kuyinatsa lendzebe lengitayinatsa, futsi ningabhajatiswa yini ngalolubhabhatiso lengitawubhajatiswa ngalo?”+
39 Batsi kuye: “Yebo singakhona.” Ngako Jesu watsi kubo: “Lendzebe lengitayinatsa nitayinatsa, futsi nani nitawubhajatiswa ngalolubhabhatiso lengitawubhajatiswa ngalo.+
40 Kodvwa akusimi loncumako kutsi ngubani lotawuhlala ngesekudla nobe ngesencele sami eMbusweni, ngobe labo labatawuhlala kuletihlalo ngulabakhetsiwe.”
41 Laba labanye labangu-10 batsi nabeva ngaloko, babatfukutselela boJakobe naJohane.+
42 Kodvwa Jesu wababita watsi kubo: “Niyati kutsi labo lababusa tive batenta emakhosi futsi tikhulu tibusa ngekucindzetela.+
43 Akukafaneli kube njalo ngani, ngobe nobe ngubani lofuna kuba mkhulu emkhatsini wenu kufanele abe yinceku yenu,+
44 nanobe ngubani lofuna kuba wekucala emkhatsini wenu kufanele abe sisebenti senu.
45 Ngobe neNdvodzana yemuntfu ayizange itele kutewusetjentelwa, kodvwa yetela kutewuba yinceku+ nekunikela ngekuphila kwayo kuze kube yinhlawulo yalabanyenti.”+
46 Befika eJerikho, futsi njengobe Jesu nebafundzi bakhe kanye nesicumbi lesikhulu sebantfu sebaphuma, bekunaBhathimeyosi indvodzana yaThimeyosi. Bekangaboni emehlweni, aphila ngekucela, futsi bekahleti eceleni kwemgwaco.+
47 Nakeva kutsi kwendlula Jesu waseNazaretha, wacala kumemeta watsi: “Jesu, Ndvodzana yaDavide,+ ngihawukele!”+
48 Labanyenti bamekhuta batsi akabindze, kodvwa yena wachubeka amemeta kakhulu atsi: “Ndvodzana yaDavide, ngihawukele!”
49 Ngako Jesu wema wase utsi: “Mbiteni.” Bambita, batsi kuye: “Bani nesibindzi! Sukuma, uyakubita.”
50 Walahla phansi ingubo yakhe yangetulu, wasukuma ngekushesha waya kuJesu.
51 Jesu watsi kuye: “Ufuna ngikwenteleni?” Yena watsi: “Mfundzisi,* mane ungente ngiphindze ngibone.”
52 Ngako Jesu watsi kuye: “Sewungahamba, kukholwa kwakho kukuphilisile.”+ Ngekushesha waphindze wabona+ wase ucala kumlandzela.
Imibhalo lengentansi
^ Kungaphindze kubekwe ngekutsi, “babutana bodvwa batsi.”
^ Fundza Tinchazelo Temagama.
^ NgesiGriki kutsi, “Raboni.”
