Kulandzisa KwaMatewu 11:1-30
11 Ngesikhatsi Jesu asacedzile kuniketa bafundzi bakhe labangu-12 ticondziso, wesuka wayoshumayela futsi wayofundzisa nakulamanye emadolobha.+
2 Johane weva asejele+ ngetintfo Khristu labetenta, wase utfumela bafundzi bakhe kuye+
3 kutsi bayombuta batsi: “Wena unguye yini Loyo Lotako, nobe kusafanele silindzele lomunye?”+
4 Jesu wabaphendvula watsi: “Hambani niyobikela Johane loko lenikuvako nalenikubonako:+
5 Labangaboni emehlweni sebayabona,+ labachutako sebahamba kahle, labanebulephelo+ bayahlanjululwa, labangeva etindlebeni sebayeva, labafile bayavuswa, nalabeswele beva tindzaba letimnandzi letishunyayelwa kubo.+
6 Uyajabula loyo lote sizatfu sekungabata ngami.”*+
7 Kwatsi lapho bafundzi baJohane sebasendleleni, Jesu wakhuluma nalesicumbi sebantfu mayelana naJohane watsi: “Ngesikhatsi nisuka niya ehlane, beniyele kuyobonani?+ Beniyele kuyobona umhlanga upheshulwa ngumoya yini?+
8 Beniyobonani vele? Beniyobona umuntfu lowembetse tingubo letinhle? Anati yini kutsi tingubo letinhle tembatfwa ngulabo labasetindlini temakhosi?
9 Kantsi vele beniyobonani? Beniyobona umphrofethi yini? Ecinisweni nabona umuntfu lomkhulu kakhulu kunemphrofethi.+
10 Lona nguye lokwabhalwa ngaye nakutsiwa: ‘Ngitfumela sitfunywa sami embikwakho,* sona sitakulungisela indlela!’+
11 Ngicinisile ngitsi kini: Kubo bonkhe labake baphila emhlabeni, kute ngisho namunye lowaba mkhulu kunaJohane uMbhabhatisi, kodvwa loyo lomncane eMbusweni wemazulu mkhulu kunaye.+
12 Kusukela emalangeni aJohane uMbhabhatisi kute kube ngunyalo, bantfu betama kamatima kungena eMbusweni wemazulu, futsi labo labetama kamatima bayangena.+
13 Ngobe uMtsetfo nebaPhrofethi baphrofetha kwaze kwefika Johane,+
14 futsi ngisho nikuvuma nobe ningakuvumi loko, kepha lona ‘ngu-Elija, loyo lokwatsiwa utawufika.’+
15 Lonendlebe akeve.
16 “Lesitukulwane ngingasifanisa nabani?+ Sinjengebantfwana labasetimakethe labamemetana bodvwa,
17 batsi: ‘Sinishayele umntjingo kodvwa nangadansi; salila kodvwa nangasidzindzi sililo.’
18 Ngendlela lefanako, naJohane weta angadli futsi anganatsi, kodvwa bantfu batsi: ‘Unelidimoni.’
19 INdvodzana yemuntfu yona yefika yadla futsi yanatsa,+ kodvwa batsi: ‘Asenibuke lomuntfu! Usimiti, ungumnatsi weliwayini, futsi ungumngani webatselisi netoni.’+ Kepha kuhlakanipha kubonakala kulungile* ngemisebenti yako.”*+
20 Jesu wase ucala kukhuluma nebantfu basemadolobheni lapho bekente khona timangaliso letinyenti, wabatjela kutsi abakenti kahle ngobe abazange baphendvuke, watsi:
21 “Maye kuwe Khorazini nawe Bhethsayida! Ngobe kube letimangaliso letentiwe kini betentiwe eThire naseSidoni, ngabe kadze bantfu bakhona baphendvuka, futsi bebatatitsela ngemlotsa, bembatse netindvwangu temasaka.+
22 Kodvwa ngitsi kini: Sehlulelo lesitawutfolwa yiThire neSidoni sitawubancono kunalesitawutfolwa ngini ngeLilanga Lekwehlulelwa.+
23 Nawe Khaphanawume,+ ucabanga kutsi utawuphakanyiselwa ezulwini yini? Ngeke, utawehliselwa eThuneni,*+ ngobe kube letimangaliso letentiwe kuwe betentiwe eSodoma, ngabe isekhona nalamuhla.
24 Kodvwa ngitsi kini: Sehlulelo lesitawutfolwa yiSodoma sitawuba ncono kakhulu kunalesitawutfolwa ngini ngeLilanga Lekwehlulelwa.”+
25 Ngaleso sikhatsi Jesu watsi: “Ngikudvumisa embikwebantfu Babe, Nkhosi yemazulu nemhlaba, ngobe letintfo utifihlile kulabahlakaniphile nakulabafundzile, watembulela bantfwana.+
26 Kwaba kuhle kuwe Babe kutsi kube njalo.
27 Tonkhe tintfo ngitinikwe nguBabe,+ futsi kute loyati kahle iNdvodzana ngaphandle kwaBabe;+ kute nalomati kahle Babe ngaphandle kweNdvodzana kanye nanobe ngubani iNdvodzana lefuna kumembula kuye.+
28 Wotani kimi nonkhe nine lenidziniwe nalenisindvwako, futsi mine ngitaniphumuta.
29 Bekani lijoka lami kini, nifundze kimi, ngobe nginemoya lophansi*+ futsi ngitfobekile, nanenta njalo nitawuphumula.
30 Ngobe lijoka lami limelula, kantsi nemtfwalo wami awusindzi.”
Imibhalo lengentansi
^ NgesiGriki kutsi, “longakhubeki ngenca yami.”
^ NgesiGriki kutsi, “embikwebuso bakho.”
^ Nobe “kuliciniso.”
^ Nobe “ngemiphumela yako.”
^ NgesiGriki kutsi, “eHayidesi,” lokusho lithuna lebantfu. Fundza Tinchazelo Temagama.
^ Nobe “ngimnene.”
