Kulandzisa KwaMatewu 25:1-46
25 “Ngako-ke, uMbuso wemazulu ungafananiswa netintfombi letingu-10 letatsatsa tibane tato+ taphuma tayohlangabeta umkhwenyane.+
2 Letisihlanu kuto betihlakaniphile kantsi leti letinye letisihlanu betilibele.+
3 Leti letilibele tatsatsa tibane kodvwa tangawaphatsi emafutsa,
4 kantsi leti letihlakaniphile taphatsa tibane tato, tafaka nemafutsa emabhodleleni.
5 Ngenca yekutsi umkhwenyane wephuta kufika, tonkhe tetela futsi tase tiyalala.
6 Ekhatsi nebusuku kwevakala bantfu bamemeta, batsi: ‘Nangu umkhwenyane! Vukani niyomhlangabeta.’
7 Ngako tonkhe letintfombi tavuka takhanyisa tibane tato.+
8 Leti letilibele tatsi kuleti letihlakaniphile: ‘Sicela nisiphe emafutsa, ngobe tibane tetfu setiyacisha.’
9 Letintfombi letihlakaniphile taphendvula tatsi: ‘Kungenteka angaseneli tsine kanye nani. Hambani niyotitsengela enu kulabo labawatsengisako.’
10 Kodvwa kutsite tisesendleleni tiyotsenga lamafutsa, umkhwenyane wefika, futsi letintfombi lebesetimlindzele tangena naye edzilini lemshado,+ ngemuva kwaloko umnyango wavalwa.
11 Ngekuhamba kwesikhatsi, naleti letinye tintfombi tefika, tatsi: ‘Nkhosi, Nkhosi, sicela usivulele!’+
12 Umkhwenyane watiphendvula watsi: ‘Ngicinisile ngitsi kini, anginati.’
13 “Ngako-ke, hlalani nilindzile+ ngobe anilati lilanga nobe li-awa.+
14 “UMbuso wemazulu ungaphindze ufananiswe nendvodza leyatsi naseyitawuhamba iye eveni lelikhashane, yabita tisebenti tayo futsi yatinika tintfo tayo kuze titinakekele.+
15 Lesinye sisebenti yasinika emathalenta* lasihlanu, lesinye yasinika lamabili kwatsi lesinye yasinika linye. Tonkhe yatinika lokulingene emandla ato, yase iyahamba.
16 Ngekushesha lesi lesasinikwe emathalenta lasihlanu saphuma sayowatalisa ngekwenta ibhizinisi ngawo, futsi satfola lamanye lasihlanu.
17 Nalesi lesasinikwe lamabili sawatalisa satfola lamanye lamabili.
18 Kodvwa lesisebenti lesasinikwe linye lithalenta salitsatsa sayoligubhela emhlabatsini salifihla.
19 “Ngemuva kwesikhatsi lesidze, lenkhosi yabuya futsi yatsi letisebenti atibuyise lokukwayo.+
20 Ngako lesisebenti lesasinikwe emathalenta lasihlanu seta saletsa lamanye emathalenta lasihlanu ngetulu, satsi: ‘Nkhosi, wanginika emathalenta lasihlanu, kodvwa ngiwatalisile ngatfola lamanye lasihlanu.’+
21 Inkhosi yaso yatsi kuso: ‘Wente kahle sisebenti lesihle nalesetsembekile! Utivete wetsembekile etintfweni letincane. Ngako-ke ngitakubeka kutsi wengamele tintfo letinyenti.+ Jabula kanye nami.’+
22 Ngemuva kwaloko, lesisebenti lesasitfole emathalenta lamabili naso seta satsi: ‘Nkhosi, wanginika emathalenta lamabili, futsi ngiwatalisile ngatfola lamanye lamabili.’+
23 Inkhosi yaso yatsi kuso: ‘Wente kahle sisebenti lesihle nalesetsembekile! Utivete wetsembekile etintfweni letincane. Ngako-ke ngitakubeka kutsi wengamele tintfo letinyenti. Jabula kanye nami.’
24 “Ekugcineni, kwangena lesisebenti lesasinikwe lithalenta linye satsi: ‘Nkhosi, bengati kutsi uyindvodza lenelulaka, nekutsi uvuna lapho ungakahlanyeli khona, futsi ubutsa lapho kwele khona labanye.+
25 Ngenca yekutsi bengesaba kakhulu, ngabese ngiyahamba ngayolifihla lelithalenta lakho emhlabatsini. Nali, ngilibuyisa kuwe njengobe linjalo.’
26 Inkhosi yasiphendvula yatsi: ‘Wena sisebenti lesibi nalesivilaphako, angitsi bewati kutsi ngivuna lapho ngingakahlanyeli khona, nekutsi ngibutsa lapho kwele khona labanye?
27 Pho kungani ungakatsatsi lemali* yami wayifaka ebhange kuze nangibuya ngiyitfole seyinentalo?
28 “‘Ngako tsatsani lelithalenta lelikuye nilinikete lona lonemathalenta langu-10.+
29 Ngobe nobe ngubani lonalokunyenti uyawunikwa lokwengetiwe, bese uba nalokunyenti kakhulu, kodvwa nobe ngubani lote lutfo, ngisho naloko lokuncane lanako kuyawutsatfwa.+
30 Tsatsani lesisebenti lesingenalusito lwalutfo nisilahlele ngephandle ebumnyameni. Kulapho sitawufikelwa khona kukhala nekugedletela kwematinyo.’
31 “Lapho iNdvodzana yemuntfu+ ifika inemandla lamakhulu ikanye nato tonkhe tingilosi tayo,+ itawuhlala esihlalweni sayo sebukhosi lesikhatimulako.
32 Tonkhe tive titawubutsana embikwayo, bese yehlukanisa bantfu, njengemelusi ehlukanisa timvu etimbutini.
33 Itawubeka timvu+ ngesekudla sayo, bese kutsi timbuti itibeke ngesencele sayo.+
34 “INkhosi itawutsi kulabo labangesekudla sayo: ‘Wotani nine lenibusiswe nguBabe, nitewudla lifa leMbuso lenalilungiselelwa kusukela kwasekelwa live.*
35 Ngobe ngesikhatsi ngilambile nangipha kudla; nangomile nanginatsisa. Ngesikhatsi ngisihambi nangemukela emitini yenu;+
36 futsi ngesikhatsi ngihamba ngcunu* nanginika kwekugcoka.+ Ngesikhatsi ngigula nanginakekela. Nangiboshiwe neta natongivakashela.’+
37 Ngako laba labalungile batayibuta batsi: ‘Nkhosi, sakubona nini ulambile sakupha kudla, nobe womile sakunatsisa?+
38 Sakubona nini usihambi sakwemukela emitini yetfu; futsi sakubona nini uhamba ngcunu sakunika kwekugcoka?
39 Sakubona nini ugula nobe uboshiwe sakuvakashela?’
40 INkhosi itawubaphendvula itsi: ‘Ngicinisile ngitsi kini: Loku lenikwente kulabomnaketfu labancane, nikwentile kimi.’+
41 “Ngemuva kwaloko, itawutsi kulaba labangesencele sayo: ‘Sukani kimi,+ nine lenicalekisiwe, niye emlilweni waphakadze+ lolungiselelwe Develi netingilosi takhe.+
42 Ngobe ngesikhatsi ngilambile anizange ningiphe kudla, futsi nangomile anizange ninginatsise.
43 Ngesikhatsi ngisihambi anizange ningemukele emitini yenu; ngesikhatsi ngihamba ngcunu anizange ninginike kwekugcoka; nangigula nanangiboshiwe, anizange ninginakekele.’
44 Nabo batawuphendvula batsi: ‘Nkhosi, sakubona nini ulambile, womile, usihambi, uhamba ngcunu, ugula nobe uboshiwe futsi sangakunakekeli?’
45 Ngaleso sikhatsi itawubaphendvula itsi: ‘Ngicinisile ngitsi kini: Loku leningazange nikwente kulaba labancane, anizange nikwente kimi.’+
46 Ngako laba batawubhujiswa* ngalokuphelele,+ kodvwa labalungile batawutfola kuphila lokuphakadze.”+
Imibhalo lengentansi
^ Lithalenta lemaGriki belingemakhilogremu langu-20.4. Fundza Sandzisanchazo B14.
^ NgesiGriki kutsi, “lelisiliva.”
^ Loku kusho bantfwana ba-Adamu na-Eva.
^ Nobe “ngigcoke kancane.”
^ Nobe “batawufa.” NgesiGriki kutsi, “batawujutjwa.”
