Kucatjangwa kutsi bantfu labangaba ngu-5 billion batawubukela imidlalo yema-Olympics kulomnyaka wa-2024. Lemidlalo itawube ingenelwe ngemave langu-206. Thomas Bach longumengameli we-International Olympic Committee watsi, “Siyincenye yesentakalo lesihlanganisa umhlaba wonkhe ngekuthula. Asikhombise kutsi siyabonga ngaloko lokufezwa yimidlalo yema-Olympics ngekutsi ihlanganise bantfu ngekuthula nanobe banebuve lobehlukahlukene.”

 Kungenteka yini kutsi imidlalo yema-Olympics ikufeze loko? Kuyoke kube khona yini vele kuthula sibili kanye nebunye?

 Lama-Olympics alomnyaka ente lokungetulu nje kwekukhombisa temidlalo. Lemidlalo yandzise tinkinga letibangela kwehlukana kwebantfu kutepolotiki kanye nasendleleni yekuphila. Letinkinga tifaka ekhatsi emalungelo ebantfu, lubandlululo ngebuve, kubandlululana ngekwenkholo kanye nalokunye lokusenta singafani.

 Yonkhe imidlalo lehlanganisa bantfu njengemidlalo yema-Olympics yenta bantfu bajabule. Nobe kunjalo, lemidlalo yenta bantfu bahlukane ekhatsi kunekutsi babe nebunye.

 LiBhayibheli laphrofetha ngesimo sengcondvo lebesitokwenta kube matima ngebantfu kutsi babe nekuthula. (2 KuThimothi 3:1-5) Kuze utfole lokunyenti ngalesiphrofetho seliBhayibheli, fundza sihloko lesitsi “Ingabe IBhayibheli Layibikezela Indlela Abantu Abacabanga Nabenza Ngayo Namuhla?” lesitfolakala ngesiZulu.

 LiBhayibheli likhuluma ngelitsemba sibili lekuthula kanye nebunye emhlabeni wonkhe, lisetsembisa kutsi bonkhe bantfu batawuba munye ngephansi kwekubuswa nguhulumende wasezulwini lobitwa ngekutsi “nguMbuso waNkulunkulu.”​—Lukha 4:43; Matewu 6:10.

 Jesu Khristu loyiNkhosi yaloMbuso utawuletsa kuthula emhlabeni wonkhe. LiBhayibheli litsi:

•   “Bantfu labalungile batawuphumelela, kwandze kuthula kuze kube phakadze.”​—Tihlabelelo 72:7.

•   “Itawukhulula lohluphekile lokhalela lusito . . . Itawubakhulula ekucindzetelweni nasebudloveni.”​—Tihlabelelo 72:12, 14.

 Ngisho nalamuhla timfundziso taJesu tente tigidzi tebantfu emaveni langu-239 taba nekuthula. Njengobe BoFakazi BaJehova emhlabeni wonkhe bangemaKhristu, bafundze kuphilisana ngekuthula nabo bonkhe bantfu. Kuze utfole kutsi bakwente njani loko, fundza Sicongosekulindza lesinesihloko lesitsi “Singayincoba Inzondo.”