INCENYE 6
Jobe Ucotfo KuNkulunkulu
Sathane unyembenya bucotfo baJobe kuNkulunkulu, kepha Jobe uhlala etsembekile kuJehova
UKHONA yini umuntfu longahlala etsembekile kuNkulunkulu, ngisho nobe avivinywa, futsi kulalela kwakhe kubonakala shengatsi akumzuzisi ngalutfo? Lona ngumbuto lowabutwa, futsi waphendvulwa endzabeni lemayelana naJobe.
Ngesikhatsi ema-Israyeli aseGibhithe, Jobe sihlobo sa-Abrahama, abehlala endzaweni nyalo lebitwa ngekutsi yi-Arabhiya. Tingilosi ezulwini tahlangana embi kwaNkulunkulu, futsi nesihlubuki lesinguSathane besilapho. Ngembi kwekuba kucale lomhlangano, Jehova wevakalisa kuyetsemba lenceku yakhe lenguJobe. Empeleni Jehova watsi kute lomunye umuntfu locotfo njengayo. Kepha Sathane watsi Jobe ukhonta Nkulunkulu ngenca yekutsi ambusisile futsi amvikela. Sathane waphindze watsi nangabe Jobe angemukwa konkhe lanako, utawutfuka Nkulunkulu.
Nkulunkulu wamvumela Sathane kutsi amuke Jobe umcebo wakhe, nebantfwabakhe futsi ambangele kugula. Ngenca yekungati kutsi nguSathane lobangele konkhe loku, Jobe akazange acondze kutsi kungani Nkulunkulu amvumele kutsi avivinywe kabuhlungu kangaka. Nobe kunjalo, Jobe akamlahlanga Nkulunkulu.
Bangani mbumbulu bakhe labatsatfu beta batewumvakashela. Emavini abo labhalwe encwadzini yaJobe, lamadvodza atjela Jobe kutsi Nkulunkulu abemjezisa ngenca yetono letitsite latifihlile. Baphindze batsi Nkulunkulu akajabuli ngetinceku takhe futsi akatetsembi. Jobe akazange ayikholwe leyo nkhulumo lengemanga. Ngesibindzi, Jobe watsi utawuhlala acotfo aze afe!
Jobe wenta liphutsa ngekutivikela. Elihu lobekalalele yonkhe lenkhulumo phakatsi kwalamadvodza naJobe, wabeluleka bonkhe. Wamsola Jobe ngekuhluleka kwakhe kucaphela kutsi kulwelwa kwebukhosi baJehova Nkulunkulu kubaluleke kakhulu kwendlula kumelela noma ngumuphi umuntfu. Elihu waphindze wekhuta labangani mbumbulu baJobe.
Jehova Nkulunkulu wakhuluma naJobe ngenjongo yekulungisa indlela yakhe yekucabanga. Amkhumbuta ngendalo yakhe lemangalisako, wamkhombisa kutsi Yena mkhulu kakhulu kunebantfu. Jobe wasemukela ngekutfobeka leseluleko saJehova. Ngenca yekutsi Jehova ‘unemusa nesihawu lesikhulu,’ welapha Jobe, wamupha nemcebo lophindvwe kabili, wabese uyambusisa ngebantfwana labalishumi. (Jakobe 5:
