SIFUNDVO 38
Bonga Ngesipho Sekuphila
Tinyenti tintfo lesingatenta futsi sitijabulele ngenca yekutsi siyaphila. Ngisho nobe sinetinkinga, tikhona tintfo lesingatijabulela ekuphileni. Singamkhombisa njani Jehova kutsi siyabonga ngesipho sekuphila? Ngusiphi sizatfu lesibalulekile sekumbonga?
1. Kungani kufanele sibonge ngekuphila?
Kufanele sibonge ngekuphila ngobe kusipho lesivela kuBabe wetfu lonelutsandvo, Jehova. ‘Ungumtfombo wekuphila,’ nguye lowadala konkhe lokuphilako. (Tihlabelelo 36:9) “Yena unika bonkhe bantfu kuphila, umoya, nato tonkhe tintfo.” (Imisebenti 17:25, 28) Jehova usiniketa loko lesikudzingako kuze sichubeke siphila. Ngetulu kwaloko, usekela kuphila kwetfu ngendlela lesenta sikujabulele.—Fundza Imisebenti 14:17.
2. Singamkhombisa njani Jehova kutsi siyabonga ngalesipho sekuphila?
Jehova wakunakekela kusukela usesesiswini samake wakho. Emthantazweni Jehova lawubhala eVini lakhe, lenye yetinceku takhe yatsi kuye: “Emehlo akho angibona ngesikhatsi ngisesiswini samake.” (Tihlabelelo 139:16) Kuphila kwakho kuligugu kuJehova. (Fundza Matewu 10:29-31.) Kungamvisa buhlungu Jehova nawungatibulala nobe ubulale lomunye umuntfu ngemabomu. a (Eksodusi 20:13) Angaphindze eve buhlungu Jehova nasingabeka kuphila kwetfu engotini ngalokungenasidzingo, nobe nasingenti lokudzingekile kuze sivikele kuphila kwalabanye. Nasinendzaba nekuphila kwetfu futsi sikuhlonipha nekuphila kwalabanye, sisuke sikhombisa kutsi siyabonga ngalesipho lesimangalisako sekuphila.
CHUBEKA UFUNISISA
Fundza ngaletinye tindlela longakhombisa ngato kutsi uyabonga ngesipho sekuphila.
3. Yinakekele imphilo yakho
Ngenca yekutsi setsembisa Jehova kutsi sitawenta konkhe lakufunako, sisebentisa kuphila kwetfu konkhe kuze simkhonte. Kuba ngatsi sinikela imitimba yetfu njengemhlatjelo kuNkulunkulu. Fundza KubaseRoma 12:1, 2, bese nicoca ngalemibuto:
-
Yini lokufanele ikukhutsate kuze unakekele imphilo yakho?
-
Ngutiphi letinye tindlela longakwenta ngato loko?
4. Hlala ugadzile kuze kube bete lolimalako nobe lofako
LiBhayibheli lisikhutsata kutsi sitibalekele tintfo letingaba yingoti. Dlala le-VIDEO kuze ubone letinye tintfo longatenta kuze uphephe.
Fundza Taga 22:3, bese nicoca ngekutsi yini wena kanye nalabanye leningayenta kuze niphephe . . .
-
ekhaya.
-
emsebentini.
-
nanidlala.
-
nawuhamba ngemoto nobe ugibele lenye intfo.
5. Kuhloniphe kuphila kwemntfwana losengakatalwa
Asebentisa emavi lasankondlo, Davide wachaza kutsi Jehova unendzaba nayo yonkhe intfo leyentekako kumntfwana losakhula esiswini samake wakhe. Fundza Tihlabelelo 139:13-17, bese nicoca ngalombuto:
-
Emehlweni aJehova, kuphila kucala nini, lapho make nakakhulelwa nobe nakatfola umntfwana?
Umtsetfo Jehova lebekawunikete ema-Israyeli asendvulo bewuvikela make nemntfwana wakhe losengakatalwa. Fundza Eksodusi 21:22, 23, bese nicoca ngalemibuto:
-
Jehova bekamtsatsa njani umuntfu lobulele umntfwana losengakatalwa ngesiphosiso?
-
Angativa njani ngemuntfu longabulala umntfwana losengakatalwa ngemabomu? b
-
Wena utiva njani ngembono waNkulunkulu?
Ngisho newesifazane lokuhloniphako kuphila angeva shengatsi kukhipha sisu ngulona khambi lanalo. Fundza Isaya 41:10, bese nicoca ngalemibuto:
-
Nangabe wesifazane acindzetelwa kutsi akhiphe sisu, kufanele alucele kubani lusito? Leni?
LABANYE BANTFU BATSI: “Wesifazane unelilungelo lekutikhetsela kutsi utasikhipha yini sisu, ngobe ngumtimba wakhe.”
-
Yini lekwenta uciniseke kutsi Jehova ukutsatsa njengalokuligugu kuphila kwamake nekwemntfwana wakhe losengakatalwa?
LOKO LESICOCE NGAKO
LiBhayibheli lisikhutsata kutsi sisitsandze sipho sekuphila Jehova lasiphe sona, sisihloniphe futsi sisivikele. Loku kufaka ekhatsi kuphila kwetfu kanye nekwalabanye.
Yini Loyifundzile?
-
Yini leyenta kuphila kwebantfu kube ligugu kuJehova?
-
Jehova utiva njani nangabe umuntfu abulala lomunye ngemabomu?
-
Yini lekwenta ubonge ngesipho sekuphila?
LOKUNYE LONGAKUHLOLA
Singambonga njani Jehova ngesipho sekuphila?
Tfola imphendvulo yembuto lotsi, Nkulunkulu angamcolela yini wesifazane lokhiphe sisu?
“Litsini LiBhayibheli Ngekukhipha Sisu?” (Sihloko lesiku-internet)
Fundza kutsi umbono waNkulunkulu ngekuphila kufanele usisite njani sikhetse tekutijabulisa letingeke tifake kuphila kwetfu engotini.
Kutsiwani nangabe umuntfu acabanga kutibulala? Tfola kutsi liBhayibheli lingamsita njani.
a Jehova uyabavela labo labephuke tinhlitiyo. (Tihlabelelo 34:18) Uyayicondza imiva lebuhlungu lengenta umuntfu afise kutibulala futsi uyafuna kusita. Kuze ubone kutsi Jehova angamniketa njani umuntfu emandla ekulwisana nemicabango yekutibulala, fundza sihloko lesitsi “Ngifuna Kufa, LiBhayibheli Lingangisita Yini Nanginemicabango Yekutibulala?” lesisencenyeni letsi “Lokunye Longakuhlola,” kulesifundvo.
b Labo labake bakhipha sisu akudzingeki kutsi bakhatsateke ngobe Jehova angabacolela. Kuze utfole lokunyenti, fundza sihloko lesitsi “Litsini LiBhayibheli Ngekukhipha Sisu?” lesisencenyeni letsi “Lokunye Longakuhlola,” kulesifundvo.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
