Ngekushesha nje Faro nakeva kutsi ema-Israyeli ahambile eGibhithe, washintja ingcondvo yakhe. Wayala emabutfo akhe watsi: ‘Lungisani tinkalishi tenu temphi futsi sibalandzele. Siwakhululeleni lama-Israyeli?’ Faro nelibutfo lakhe bacosha ema-Israyeli.

Jehova wahola bantfu bakhe asebentisa lifu emini kanye nemlilo ebusuku. Wabahola nabewela Lwandle Lolubovu, futsi wabatjela kutsi bahambe ndzawonye.

Ema-Israyeli abese abona Faro nelibutfo lakhe beta emuva kwawo. Abengasakhoni kuchubeka ngobe lwandle lwaluwavimbile. Akhala kuMosi atsi: ‘Sitawufa! Kube wamane wangasikhiphi eGibhithe.’ Kodvwa Mosi watsi: ‘Ningesabi. Cinani futsi nibone indlela Jehova latanisindzisa ngayo lamuhla.’ Mosi abemetsemba mbamba yini Jehova?

Jehova watjela ema-Israyeli kutsi achubekele embili. Ngalobo busuku, Jehova wenta kutsi lelifu libe semkhatsini wesive saseGibhithe nesive sema-Israyeli. Lelifu laba bumnyama esiveni saseGibhithe, kodvwa laba kukhanya esiveni sema-Israyeli.

Jehova watjela Mosi kutsi elulele sandla sakhe etikweLwandle. Jehova wakhweshisa emanti elwandle ngemoya lonemandla. Wenta  emanti laselwandle ehlukana ekhatsi kwaba nendlela emkhatsini. Sive sema-Israyeli sewela lolwandle sihamba emhlabatsini lowomile, emanti asemaceleni.

Libutfo laFaro lalandzela ema-Israyeli labehamba emhlabatsini lowomile. Jehova wase uyalisanganisa lelibutfo laseGibhithe. Emasondvo etincola talo temphi akhumuka. Lamasotja amemeta atsi: ‘Asibalekeni sisuke kuma-Israyeli, ngobe Jehova uyawalwela.’

Jehova watsi kuMosi: ‘Yelulela sandla sakho elwandle.’ Ngekushesha emanti abuyela endzaweni yawo futsi akhukhula emaGibhithe. Faro nelibutfo lakhe bafa. Kute ngisho namunye lowasindza.

Nasebawelile elwandle, badvumisa Nkulunkulu ngekuhlabela ingoma batsi: ‘Angihlabelele Jehova, ngobe uphakeme kakhulu. Lihhashi nemgibeli walo ukujike elwandle.’ Ngesikhatsi basahlabela, bafati badlala emathamborini badansa. Bonkhe besebajabule kakhulu ngobe besebakhululiwe.