Ngesikhatsi Jehova asungula umndeni, wabeka batali kutsi kube ngibo labacondzisa bantfwana babo. (Kholose 3:20) Njengobe ungumtali, kungumtfwalo wakho kucecesha umntfwana wakho kutsi atsandze Jehova futsi abe ngumuntfu lomdzala lokhonako kutimela. (2 Thimothi 1:5; 3:15) Kufanele uphindze ufundze kubona loko lokusenhlitiyweni yendvodzana yakho nobe indvodzakati yakho. Ecinisweni, sibonelo sakho sibaluleke kakhulu. Kute ukhone kumfundzisa kahle umntfwana wakho ngeliVi laJehova, kufanele ucale ulifake enhlitiyweni yakho.—Tihlabelelo 40:8.

LOKO LOKUSHIWO LIBHAYIBHELI: ‘Shesha kulalela, wephute kukhuluma.’ (Jakobe 1:19) Njengemtali, ufuna kutsi bantfwana bakho bative bakhululekile kukhuluma nawe. Kufanele bati kutsi uhlale ukulungele kubalalela nabadzinga kukhuluma. Ciniseka kutsi ekhaya kuhlale kunekuthula kuze bakutfole kumelula kuveta indlela labativa ngayo. (Jakobe 3:18) Nangabe bacabanga kutsi utawuba nelulaka nobe ubasole, kungenteka bangakhululeki. Babeketelele futsi uhlale ubacinisekisa kutsi uyabatsandza.—Matewu 3:17; 1 Khorinte 8:1.

LONGAKWENTA:

• Tente utfolakale nangabe bantfwana bakho badzinga kukhuluma

• Coca nebantfwana bakho ngaso sonkhe sikhatsi, hhayi nje nakunetinkinga kuphela

LOKO LOKUSHIWO LIBHAYIBHELI: ‘Lobonisa kucondza endzabeni letsite utawuphumelela.’ (Taga 16:20, NW.) Ngaletinye tikhatsi, kutawudzingeka kutsi ubuke ngale kwemavi bantfwana bakho labawashoko kuze ucondze indlela labativa ngayo. Kuyintfo levamile ngebantfu labasha kutsi bakhulume kabi nobe basho tintfo labangakacondzi kutisho. “Kubulima . . . kuphendvula umbuzo ungakeva kutsi utsini.” (Taga 18:13) Ungasheshi ucansuke.—Taga 19:11.

LONGAKWENTA:

• Yenta sincumo sekutsi ungabaphatamisi nobe ubatfukutselele bantfwana bakho, ngisho nobe batsini

• Yetama kukhumbula indlela lobewutiva ngayo ngesikhatsi usengangabo futsi ukhumbule netintfo lebetibonakala tibalulekile kuwe

LOKO LOKUSHIWO LIBHAYIBHELI: “Ndvodzana yami, lalela umyalo weyihlo, ungayali imfundziso yenyoko.” (Taga 1:8) Jehova unikete babe namake ligunya lekukhulisa bantfwana. Kufanele nifundzise bantfwana benu kutsi banihloniphe futsi banilalele. (Efesu 6:1-3) Bantfwana bayabona nangabe batali babo ‘bangasimunye ngalokuphelele emcondvweni munye.’ (1 Khorinte 1:10) Nangabe ningavumelani, yetamani kutsi ningakhulumi embikwebantfwana benu ngobe loku kungenta kutsi bangasanihloniphi njengobe nibatali babo.

LONGAKWENTA:

• Cocani ngekutsi nitawubayala njani bantfwana benu futsi nivumelane ngaloko

• Nangabe wena nemuntfu loshade naye ninembono lowehlukile endzabeni yekucecesha bantfwana, yetama kucondza umbono wakhe

LOKO LOKUSHIWO LIBHAYIBHELI: “Khulisa umntfwana ngendlela lekufanele aphile ngayo.” (Taga 22:6) Ngeke kutentakalele kutsi uceceshe bantfwana bakho ngemphumelelo. Kudzingeka ube neluhlelo lwekubacecesha, lolufaka ekhatsi kubayala. (Tihlabelelo 127:4; Taga 29:17) Kuyala akusho kujezisa, kodvwa kufaka ekhatsi kusita bantfwana bakho kutsi bacondze tizatfu temitsetfo loyibekile. (Taga 28:7) Kufanele uphindze ubasite kutsi batsandze liVi laJehova futsi baticondze timiso letikulo. (Tihlabelelo 1:2) Loku kutawubasita kutsi babe nanembeza loceceshekile.—Hebheru 5:14.

LONGAKWENTA:

• Ciniseka kutsi bantfwana bakho batsatsa Nkulunkulu njengeMuntfu mbamba labangametsemba

• Basite bafundze indlela yekubona tingoti letingabaholela ekutiphatseni lokubi futsi batibalekele, njengaleto letitfolakala ku-Internet nasetinhlelweni tekuchumana. Bafundzise indlela yekubalekela bantfu labafuna kubahlukubeta ngekwelicansi