Lengolo la Pele le Yang ho Timothea 6:1-21
6 Bao e leng makgoba ba hlomphe beng ba bona ka pelo yohle+ e le hore lebitso la Modimo le dithuto tsa hae di se ke tsa buuwa hampe.+
2 Makgoba ao beng ba ona e leng Bakreste a se ke a ba tella hobane feela e le badumedimmoho le ona. Ho ena le hoo, a ba sebeletse ka thata le ho feta hobane batho ba fumanang melemo ya mosebetsi wa ona o motle ke badumedimmoho le ona le bana ba bo ona bao a ba ratang.
O nne o ba rute dintho tsena le ho ba fa dikeletso tsena.
3 Haeba mang kapa mang a ruta thuto esele, a sa dumellane le thuto e nepahetseng*+ e tswang ho Morena wa rona Jesu Kreste kapa thuto eo a e rutang e sa kgothaletse batho ho sebeletsa Modimo ka botshepehi,+
4 o a ikgohomosa ebile ha a utlwisise letho.+ O rata* ho pheha kgang le ho tseka mantswe.+ Dintho tsena di etsa hore batho ba be mona, ba qabane, ba senye ba bang mabitso* le hore ba se ke ba tshepa batho ba bang.
5 Dintho tseo di etsa hore batho bana ba senyehileng dikelello+ le ba seng ba sa utlwisise nnete ba dule ba phehile kgang ka dintho tse sa reng letho. Ba batla ho sebeletsa Modimo hobane feela ba shebile ho fumana melemo e itseng.+
6 Teng ke nnete hore motho o tla fumana melemo e mengata ha a sebeletsa Modimo+ a bile a kgotsofaletse dintho tseo a nang le tsona.
7 Etswe ha re a tlisa letho lefatsheng ebile re ke ke ra tloha ho lona re nkile letho.+
8 Ka hoo, ha re ena le dijo* le diaparo* re tla kgotsofala.+
9 Empa batho ba ikemiseditseng ho rua bona ba wela molekong le lerabeng+ hape ba inehella ditakatso tse ngata tse se nang kelello le tse kotsi. Qetellong ba kena mathateng ebile ba a shwa.+
10 Lerato la tjhelete ke mohlodi wa mefuta yohle ya dintho tse mpe. Ba bangata ba feletswe ke tumelo hobane ba lateletse ho ba le tjhelete mme ba ipaketse mathata a mangata.+
11 Ha e le wena mohlanka wa Modimo, o balehe dintho tsena. O lwanele ho etsa dintho tse nepahetseng, ho sebeletsa Modimo ka botshepehi, ho ba le tumelo, lerato, mamello le bonolo.+
12 Lwana ntwa e ntle e le hore o sireletse dithuto tsa Modimo.* O dule o ena le tshepo e matla ya hore o tla fumana bophelo bo sa feleng boo o ileng wa bo bitsetswa wa ba wa bua ka bona ka pela dipaki tse ngata.
13 Ke o laela ka pela Modimo ya etsang hore dintho tsohle di dule di phela, le ka pela Kreste Jesu ya ileng a bua ka tumelo ya hae ka sebete ka pela Ponse Pilato+
14 hore o mamele taelo ena ka tsela e phethahetseng le ka tsela eo ka yona ho ke keng ha eba le motho ya tla o tshwaya phoso, ho fihlela Morena wa rona Jesu Kreste a bonahatswa.+
15 Ka nako e kgethilweng, Morena ya thabileng, ya matla o tla iponahatsa. Ke Morena wa marena le Kgosi ya dikgosi.+
16 Ke yena feela ya ke keng a shwa.+ O dula sebakeng* se kganyang hoo ho se nang motho ya ka atamelang.+ Ha ho motho ya kileng a mo bona kapa ya ka mo bonang.+ Tlhompho le matla a sa feleng e ke e be tsa hae. Amen.
17 Laela ba ruileng hona jwale* hore ba se ke ba ikgohomosa* le hore ba se ke ba tshepa maruo a ka felang+ empa ba tshepe Modimo ya re fang dintho tse ngata tse re thabisang.+
18 Ba bolelle hore ba etse dintho tse ngata tse ntle hape e be batho ba fanang, ba ikemiseditseng ho arolelana le batho ba bang.+
19 Ha ba etsa jwalo ba tla be ba ipolokela matlotlo a tswang ho Modimo. Ba tla be ba iketsetsa motheo o motle bakeng sa bokamoso+ e le hore ba dule ba ena le tshepo e matla ya hore ba tla fumana bophelo ba sebele.+
20 Timothea ngwanaka, o hlokomele dintho tseo o di fuweng ke Modimo.+ O se ke wa mamela dipuo tse se nang thuso tse hanyetsang Modimo tse tswang ho batho ba nahanang hore ba tseba haholo empa tsebo ya bona e hanana le nnete.+
21 Ba bang ba ikgantshang ka tsebo ena ba lahlile dithuto tsa nnete.
E se eka Modimo a ka ba mosa* ho wena.
Dintlha tse qetellong ya sehloho
^ Kapa: “e molemo.”
^ Kapa: “O hlanyetsa.”
^ Kapa: “ba bue dipuo tse mpe.”
^ Kapa: “dintho tseo re iphedisang ka tsona.”
^ Kapa mohlomong: “bodulo.”
^ Ka Segerike: “Lwana ntwa e ntle ya tumelo.”
^ Ka Segerike: “leseding.”
^ Kapa: “iphahamisa.”
