Buka ya Bobedi ya Bakorinthe 11:1-33
11 Ho ka nna ha utlwahala eka ntho eo ke tlo e bua ha e na kelello empa ke kopa le se ke la mphella pelo. Ha e le hantle, le se le ntse le mmamella.
2 Ke le tshepisitse ho le nyadisa Kreste mme ke batla ho le fa yena le le jwalo ka morwetsana. Ke ka hoo ke amehileng haholo ka lona feela jwalo ka ha Modimo a amehile ka lona.+
3 Ke tshaba hore feela jwalo ka ha noha e ile ya kgelosa Eva,+ motho e mong a ka senya menahano ya lona ka ho etsa hore le se ke la hlola le latela Kreste ka pelo yohle le hore le se ke la hlweka hobane Kreste o lebelletse hore le hlweke.+
4 Ke tjho jwalo hobane le mamela motho le ha e le ofe ya le rutang dintho tse fapaneng le tseo re ileng ra le ruta tsona ka Jesu kapa ya etsang hore le nahane ka tsela e fapaneng le eo le neng le nahana ka yona pele kapa ya le bolellang ditaba tse monate tse fapaneng le tseo le di amohetseng.+
5 Empa ha ke kgolwe hore baapostola bao ba iketsang eka ba lokile ba mpheta ka letho.+
6 Le haeba ke se kgeleke ha ke bua,+ tsebo yona ke na le yona. Re le bontshitse tsebo eo dinthong tsohle.
7 Na ke entse sebe ka hore ebe ke ile ka le bolella ditaba tse monate tsa Modimo ke sa le patadise le ka hore ebe ke ile ka ikokobetsa e le hore le ka hlomphuwa?+
8 Ke ile ka thuswa ke diphutheho tse ding e le hore ke le sebeletse mme ho ne ho tshwana le ha eka ke a ba utswetsa.+
9 Nakong eo ke neng ke ena le lona mme ke hloka, ha ke a ka ka le imetsa hobane bana ba bo rona ba neng ba tswa Macedonia ba ile ba nthusa ka dintho tsohle tseo ke neng ke di hloka.+ Ke ile ka etsa sohle seo nka se kgonang hore ke se ke ka ba morwalo ho lona ebile ke tla tswela pele ho etsa jwalo.+
10 Ha feela ke ntse ke le molatedi wa Kreste, ha ho na letho le tla nthibela ho ithorisa+ ka sena Akaia yohle.
11 Hore ebe ha ke a le kopa letho ha se hobane ke sa le rate, Modimo o a tseba hore ke a le rata.
12 Ho na le ba ithorisang ba reng ke baapostola jwalo ka rona. Ka hoo, ke tla tswela pele ke sa le kope letho+ e le hore ba se ke ba eba le lebaka la ho ithorisa.
13 Batho ba jwalo ke baapostola ba bohata, ba kgelosang batho, ba iketsang eka ke baapostola ba Kreste.+
14 Ha ho makatse hobane Satane le yena o ntse a iketsa eka ke lengeloi le lokileng.+
15 Ka hoo, le rona ha ho re makatse hore ebe basebeletsi ba hae ba ntse ba iketsa eka ba sebeletsa Modimo. Empa qetellong ba tla kotula ditholwana tsa mesebetsi ya bona.+
16 Ke boetse ke re: Le se ke la nahana hore ha ke na kelello. Le haeba le nahana hore ha ke na kelello, nkamoheleng ke le jwalo e le hore le nna ke tle ke ithorise hanyenyane.
17 Hona jwale ha ke bua, ha ke latele mohlala wa Morena empa ke bua jwalo ka motho ya se nang kelello, ya itshepang le ya ithorisang.
18 Ka ha ba bangata ba ithorisa ka dintho tsa lefatshe, le nna ke tla ithorisa.
19 Ka ha le bohlale haholo, le ke ke la ba le bothata ba ho mamella batho ba se nang kelello.
20 Ha e le hantle, le mamella mang kapa mang ya le etsang makgoba, mang kapa mang ya le nkelang maruo le sohle seo le nang le sona, mang kapa mang ya iketsang eka o molemo ho le feta le mang kapa mang ya le otlang sefahlehong.
21 Ho a swabisa hore ebe re bua tjena hobane ho ba bang ho ka bonahala eka re tshaba ho sebedisa matla a rona hantle.
Haeba batho ba bang ba sa swabele ho ithorisa, le nna ha ke swabele ho ithorisa le haeba ba bang ba ka bona eka ha ke na kelello.
22 Na ke Baheberu? Le nna ke Moheberu.+ Na ke Baiseraele? Le nna ke Moiseraele. Na ke ditloholo tsa Abrahama? Le nna ke setloholo sa hae.+
23 Na ba sebeletsa Kreste? Ke araba jwalo ka lehlanya, nna ke mo sebeletsa haholo ho ba feta: Ke entse mesebetsi e mengata,+ ka kwallwa hangata,+ ka otlwa hangata mme ka makgetlo a mangata ka batla ke shwa.+
24 Ka makgetlo a mahlano, Bajuda ba ile ba ntjhapa dithupa tse 39,+
25 ka otlwa ka melamu ka makgetlo a mararo,+ ka tlepetswa ka majwe hanngwe,+ ka robehelwa ke sekepe hararo,+ ka qeta bosiu bo le bong le letshehare ke le lewatleng.
26 Ke ne ke le maetong hangata, ke tobana le dikotsi dinokeng, dikotsi tsa mashodu, tsa batho ba heso,+ tsa dinaha tse ding,+ dikotsi tsa motseng,+ dikotsi tsa thoteng, dikotsi tsa lewatleng, dikotsi tsa bana beso ba bohata.
27 Ke ne ke sebetsa ka thata ke bile ke sehla, ke qeta masiu a mangata ke sa robale,+ ke bolawa ke tlala le lenyora,+ hangata ke se na dijo,+ ke bolawa ke serame ebile ke se na diaparo.
28 Ntle ho dintho tsena kaofela, letsatsi le leng le le leng ke dula ke tshwenyeha ka diphutheho tsohle.+
29 Ha motho e mong a fokola ke a tshwenyeha hape ke a halefa ha motho e mong a kgelosa ba bang tumelong.
30 Haeba ke lokela ho ithorisa, ke tla ithorisa ka dintho tse bontshang hore ke a fokola.
31 Modimo le Ntate wa Morena Jesu, Ya tla roriswa ka ho sa feleng, o a tseba hore ha ke bue leshano.
32 Ha mmusisi ya okametsweng ke Morena Aretase a ne a katile motse wa Damaseka e le hore a tle a ntshware,
33 bana ba bo rona ba ile ba nkenya ka basketeng,* ba nntsha ka fensetere e lerakong la motse+ yaba ke a phonyoha.
Dintlha tse qetellong ya sehloho
^ Kapa: “basketeng e lohilweng.”
