Ho Baheberu 4:1-16
4 Ka hona, ka ha tshepiso ya hore batho ba Modimo ba tla phomola le yena e ntse e eme, a re itlhokomeleng* esere e mong wa lona a hloleha ho phomola le yena.+
2 Le rona re boleletswe ditaba tse monate+ jwalo ka baholoholo ba rona empa ditaba tseo ba ileng ba di utlwa ha di a ka tsa ba tswela molemo hobane ba ne ba se na tumelo e matla jwalo ka ba ileng ba di mamela.
3 Rona ba bontshitseng hore re na le tumelo, re phomola le yena hobane o ile a re ka ba sa kang ba mamela: “Ka hoo, ka ikana ke halefile ka re: ‘Ba ke ke ba phomola le nna.’”+ O ile a tjho jwalo le hoja a ile a qeta mesebetsi ya hae ho tloha ha lefatshe le thehwa.+
4 Lengolong le leng o ile a bua tjena ka letsatsi la bosupa: “Modimo o ile a phomola mesebetsing yohle ya hae ka letsatsi la bosupa.”+
5 Le mona hape o re: “Ba ke ke ba phomola le nna.”+
6 Ba ileng ba bolellwa ditaba tse monate pele ha ba a ka ba phomola le yena hobane ba sa mamele.+ Empa ho ntse ho ka kgoneha hore ba bang ba phomole le yena.
7 Ke ka hoo ka mora nako e telele Modimo a buileng mantswe ana a hlahang pesalemeng ya Davida a seng a boletswe ka hodimo a reng, “Haeba le mamela lentswe la ka kajeno, le se ke la ba manganga.”+ Ka ho tjho jwalo, o tshwaya letsatsi le bitswang “kajeno.”
8 Hoja Joshua+ a ne a isitse Baiseraele sebakeng sa phomolo sa Modimo, Modimo a ka be a sa bua ka letsatsi le leng la phomolo ka mora moo.
9 Ka hoo, batho ba Modimo ba ntse ba ena le letsatsi la ho phomola le tshwanang le letsatsi la Sabatha.+
10 Etswe motho ya phomotseng le Modimo o phomotse mesebetsing ya hae feela jwalo ka ha Modimo le yena a ile a phomola ho ya hae.+
11 Ka hona, a re etseng sohle se matleng a rona ho phomola le yena e le hore re se ke ra etsisa batho ba sa kang ba mamela.+
12 Lentswe la Modimo le a phela, le fana ka matla+ mme le bohale ho feta sabole le ha e le efe e sehang ka mahlakore a mabedi.+ Le kenella ka harehare ho motho hoo le senolang seo motho a leng sona ka ntle* le ka hare* le bile le fihla le manonyellong le mmokong wa ona. Le kgona ho senola* menahano le boikemisetso ba pelo ya motho.
13 Modimo o bona ntho e nngwe le e nngwe,+ dintho tsohle di a bonahala mme di pepesitswe ka pela mahlo a ya tla re ahlola ho ya ka mesebetsi ya rona.+
14 Moprista wa rona ya phahameng ke Jesu Mora wa Modimo+ mme o kene lehodimong. Ka hoo, a re tsweleng pele re bolela hore re dumela ho yena.+
15 Moprista wa rona ya phahameng o utlwisisa* mefokolo ya rona+ hobane o lekilwe ka ditsela tsohle jwalo ka rona empa yena a se na sebe.+
16 Ka hona, a re atameleng terone ya Modimo ya re bontshang mosa* mme re mo rapele ka bolokolohi+ bohle e le hore a ka re hauhela le ho re bontsha mosa ka nako e nepahetseng ha re hloka thuso.
Dintlha tse qetellong ya sehloho
^ Ka Segerike: “tshabeng.”
^ Kapa: “lemoha.”
^ Kapa: “o re utlwela bohloko ka lebaka la.”
