Ho Baroma 15:1-33
15 Rona ba matla tumelong, re lokela ho nahanela mefokolo ya ba seng matla tumelong+ mme re se ke ra ikgahlisa.+
2 E mong le e mong wa rona a etse dintho tse tla tswela moahisani wa hae molemo e le hore a mo matlafatse.+
3 Le Kreste ha a ka a itjheba boyena,+ le Mangolo a re ka yena: “Dithohako tsa ba neng ba o rohaka di wetse hodima ka.”+
4 Dintho tsohle tse ileng tsa ngolwa kgale di ile tsa ngollwa ho re ruta+ e le hore re be le tshepo. Ha e le hantle,+ Mangolo ao a a re tshedisa ebile a re thusa hore re mamelle.+
5 E se eka Modimo ya re thusang ho mamella le ya re tshedisang a ka etsa hore le nahane ka tsela eo Kreste a neng a nahana ka yona
6 e le hore le ka tlotlisa Modimo, Ntate wa Morena wa rona Jesu Kreste le momahane.+
7 Ka hona, amohelanang+ feela jwalo ka ha Kreste le yena a ile a le amohela+ hobane ha le etsa jwalo le tlotlisa Modimo.
8 Ke a le bolella hore Kreste e ile ya eba mosebeletsi wa Bajuda+ e le ho bontsha hore Modimo o na le nnete, ho tiisa ditshepiso tseo Modimo a ileng a di etsetsa baholoholo ba bona+
9 le hore ditjhaba tse ding di tlotlise Modimo ka lebaka la mohau wa hae.+ Etswe Mangolo a re: “Ke ka lebaka leo ke tla o rorisa hara ditjhaba, ke tla binela lebitso la hao dipina tsa thoriso.”+
10 A boetse a re: “Thabang lona ditjhaba ha mmoho le batho ba hae.”+
11 Hape a re: “Rorisang Jehova* lona ditjhaba tsohle mme ditjhaba di ke di mo rorise.”+
12 Esaia le yena o re: “Ho tla ba le e mong ya tswang lelapeng la Jese*+ ya tla busa ditjhaba+ mme ditjhaba di tla mo tshepa.”+
13 E se eka Modimo ya fanang ka tshepo a ka etsa hore le be le kgotso le thabo e ngata hobane le mo tshepa e le hore moya o halalelang o ka matlafatsa tshepo eo le nang le yona.+
14 Bana beso, ke kgodisehile hore le etsa dintho tse molemo, le na le tsebo e ngata ebile le kgona ho eletsana.*
15 Le ha ho le jwalo, ke le ngolletse dintlha tse ding ke sa hlathe kwana le kwana e le hore ke le hopotse tsona hobane Modimo o bile mosa* ho nna.
16 O nkgethetse hore ke be mohlanka wa Kreste Jesu hore ke bolele ditaba tse monate tse tswang ho Modimo ditjhabeng.+ Ke etsa mosebetsi ona o halalelang e le hore ditjhaba tsena di ka ba jwalo ka sehlabelo seo Modimo a tla se amohela,+ se halaleditsweng ka moya o halalelang.
17 Ka hona, ke thabela hore ebe ke morutuwa wa Kreste Jesu le hore ebe ke etsa mosebetsi wa Modimo.
18 Nke ke ka re letho ka dintho tseo ke di entseng. Ke tla bua feela ka tseo Kreste a ileng a ntshebedisa ho di bua le ho di etsa e le hore ditjhaba di mo mamele.
19 Di ile tsa mamela ka lebaka la mehlolo le dimakatso+ tse entsweng ka matla a moya o halalelang. Ka lebaka leo, ke boletse ka botlalo ditaba tse monate tse mabapi le Kreste ho tloha Jerusalema ho ya fihla Ilirikame.+
20 Sepheo sa ka e ne e le ho qoba ho bolela ditaba tse monate moo batho ba teng ba neng ba se ba tseba ka Kreste e le hore ke se ke ka tswela pele ka mosebetsi o neng o se o qadilwe ke motho e mong.*
21 Ho jwalo ka ha Mangolo a bolela ha a re: “Ba sa kang ba bolellwa letho ka yena ba tla mo bona le ba sa utlwang ba tla utlwisisa.”+
22 Ke ka lebaka leo ka makgetlo a mangata ke ileng ka sitwa ho tla ho lona.
23 Empa jwale ke se ke qetile ho ruta batho dibakeng tsena mme ka dilemo tse ngata* esale ke batla ho tla ho lona.
24 Ke tshepa hore ha ke le tseleng e yang Spain ke tla le bona, ke qete nako le lona ebe ka mora moo le a mphelehetsa le nkgutlela tseleng.
25 Hona jwale ke mothating wa ho ya Jerusalema ho ya thusa badumedimmoho le rona.*+
26 Bana ba bo rona ba Macedonia le Akaia ba ile ba utlwa ba rata hore ba fe bana ba bo rona* ba futsanehileng ba Jerusalema dimpho.+
27 Ba ne ba thabetse ho etsa jwalo hobane ba ne ba ikutlwa ba ba kolota. Ka ha bao ba Jerusalema ba ile ba arolelana le bona dintho tse tswang ho Modimo, le bona ba Macedonia le Akaia ba ne ba lokela ho ba thusa ka dintho tseo ba di hlokang.+
28 Ha ke se ke isitse dimpho tsena ho bona, ke tla pota ho lona ha ke ya Spain.
29 Ke a tseba hore ha ke tla ho lona, ke tla le tlisetsa ditlhohonolofatso tse ngata tse tswang ho Kreste.
30 Bana beso, ka ha re dumela ho Morena wa rona Jesu Kreste ebile moya o halalelang o entse hore re ratane, ke le kopa hore le nthapedise.+
31 Le nthapedise hore ke pholoswe+ ho batho ba Judea ba sa dumeleng ho Jesu le hore bana ba bo rona* ba Jerusalema ba amohele dimpho tsena tseo ke di isang ho bona.+
32 Ha Modimo a rata, ke tla fihla ho lona ke thabile haholo ebile re tla kgothatsana.
33 E se eka Modimo ya fanang ka kgotso a ka ba le lona kaofela.+ Amen.
Dintlha tse qetellong ya sehloho
^ Sheba Ntlha ya A5.
^ Ka Segerike: “motsong wa Jese.”
^ Kapa: “rutana.”
^ Ka Segerike: “haha hodima motheo wa motho e mong.”
^ Kapa mohlomong: “tse mmalwa.”
^ Ka Segerike: “bahalaledi.”
^ Ka Segerike: “bahalaledi.”
^ Ka Segerike: “bahalaledi.”
