Jobo 1:1-22
1 Ho ne ho ena le monna ya bitswang Jobo*+ ya dulang naheng ya Utse. E ne e le monna ya lokileng le ya tshepahalang.+ O ne a tshaba Modimo a bile a hloile dintho tse mpe.+
2 O ne a ena le bara ba supileng le baradi ba bararo,
3 a ena le dinku tse 7 000, dikamele tse 3 000, dikgomo tse 1 000* le ditonki* tse 500. Hape o ne a ena le basebeletsi ba bangata. E ne e le monna ya ruileng, ya hlomphehang ka ho fetisisa ho baahi bohle ba Botjhabela.
4 Bara ba hae ba ne ba tlwaetse ho etsa mokete, e mong le e mong ha hae ka letsatsi leo a ikgethetseng lona. Ba ne ba mema dikgaitsedi tsa bona tse tharo hore di tlo ja le ho nwa le bona.
5 Ha matsatsi a mokete a fela, Jobo o ne a bitsa bana ba hae e le hore a tlo ba hlwekisa. O ne a tsoha esale hoseng mme a etsetsa e mong le e mong sehlabelo sa setjheso+ hobane o ne a re: “Mohlomong bana ba ka ba entse sebe mme ba rohakile Modimo ka dipelong tsa bona.” Jobo o ne a etsa jwalo ka mehla.+
6 E ne e le letsatsi la hore bara ba Modimo wa nnete*+ ba tle ka pela Jehova+ yaba Satane+ o kena le bona.+
7 Jehova a re ho Satane: “O tswa hokae?” Satane a araba Jehova a re: “Ke tswa solla lefatsheng le ho tsamaya ho lona.”+
8 Jehova a boela a re ho Satane: “Na o hlokometse* hore ha ho motho ya tshwanang le mohlanka wa ka Jobo? Ke monna ya lokileng le ya tshepahalang,+ o tshaba Modimo ebile o hloile dintho tse mpe.”
9 Satane a re ho Jehova: “Ha ho ne ho se na letho leo o le fang Jobo, na o ne a tla nne a o tshabe?+
10 Na ha se nnete hore o sireleditse lelapa la hae+ le dintho tsohle tseo a nang le tsona? O atlehisitse mosebetsi wohle wa hae+ le diphoofolo tsa hae di tletse hohle lefatsheng.
11 Empa hanngwe feela, ako nke ntho e nngwe le e nngwe eo a nang le yona mme o bone hore na a ke ke a o rohaka sefahlamahlo.”
12 Jehova a re ho Satane: “Etsa seo o se batlang ka dintho tseo a nang le tsona. Empa yena o se ke wa mo etsa letho.” Ka mora moo, Satane a tloha ka pela* Jehova.+
13 Letsatsing leo ka lona bara ba Jobo le baradi ba hae ba neng ba ja le ho nwa veine ka tlung ya abuti wa bona e moholo,+
14 moromuwa a fihla a re ho Jobo: “Ha dikgomo tsa hao di ntse di lema le ditonki di fula pela tsona,
15 Basabea ba ile ba re hlasela mme ba di nka yaba ba bolaya bahlanka ka sabole. Ke nna feela ya phonyohileng mme ke tlile ho tla o jwetsa.”
16 Ha moromuwa wa pele a ntse a bua, wa bobedi a fihla a re: “Mollo wa Modimo* o tswang mahodimong o tjhesitse bahlanka ba hao. Ke nna feela ya phonyohileng mme ke tlile ho tla o jwetsa.”
17 Ha moromuwa wa bobedi a ntse a bua, wa boraro a fihla mme a re ho Jobo: “Dihlopha tse tharo tsa Bakalde+ di ile tsa fihla tsa nka dikamele tsa ba tsa bolaya bahlanka ba hao ka sabole. Ke nna feela ya phonyohileng mme ke tlile ho tla o jwetsa.”
18 Ha moromuwa wa boraro a ntse a bua, wa bone a fihla mme a re ho Jobo: “Ha bara le baradi ba hao ba ntse ba ja mme ba nwa ha abuti wa bona e moholo,
19 ho ile ha fihla moya o matla o hlahang lefeelleng re sa lebella. O ile wa sisinya dikhona tse nne tsa ntlo hoo e ileng ya wela bana ba hao hodimo yaba ba a shwa. Ke nna feela ya phonyohileng mme ke tlile ho tla o jwetsa.”
20 Hanghang Jobo a ema mme a tabola seaparo sa hae, a kuta moriri yaba o a kgumama
21 o re:
“Ke tswile ka popelong ya mme ke hlobotse,
Ke tla ya lebitleng ke hlobotse.*+
Jehova o fane+ mme Jehova o nkile.
Lebitso la Jehova le ke le tswele pele ho roriswa.”
22 Ho sa tsotellehe dintho tsena tse mo etsahaletseng, Jobo ha a ka a etsa sebe kapa a beha Modimo molato.*
Dintlha tse qetellong ya sehloho
^ Mohlomong e bolela “Ya Hloilweng.”
^ Ka Seheberu: “dipane tse 500 tsa dikgomo.”
^ Ka Seheberu: “ditonki tse tshehadi.”
^ Maele a Seheberu a bolelang bara ba Modimo ba mangeloi.
^ Ka Seheberu: “behile pelo ya hao ho.”
^ Ka Seheberu: “pela sefahleho sa.”
^ Kapa mohlomong: “Lehadima.”
^ Ka Seheberu: “Ke tla kgutlela teng ke hlobotse.”
^ Kapa: “bua Modimo hampe.”
