Batho ba bang ba nahana hore ho fetolela Bibele lentswe ka lentswe ho ka thusa motho hore a utlwisise dintho tse neng di ngotswe ka dipuo tsa kgale empa ka dinako tse ding ha ho jwalo. A re boneng hore na ke hobaneng ha re tjho jwalo:

• Dipuo ha di sebedise melao ya puo le mantswe a tshwanang ebile le dipolelo ha di ngolwe ka tsela e tshwanang. Moprofesa wa puo ya Seheberu e leng S. R. Driver o re dipuo “ha di fapane feela ka melao ya puo le hore na di buuwa sebakeng sefe empa . . . di fapana le ka tsela eo dipolelo di ngolwang ka yona.” Batho ba buang dipuo tse fapaneng ha ba nahane ka tsela e tshwanang. Moprofesa Driver o boetse o re: “Ka lebaka leo, dipuo tse fapaneng di bopa dipolelo ka ditsela tse sa tshwaneng.”

• Ha ho na puo e sebedisang mantswe le melao ya puo e tshwanang hantle le ya Seheberu, Searame le Segerike se sebedisitsweng ha ho ne ho ngolwa Bibele. Ka hoo, batho ba ne ba ke ke ba utlwisisa Bibele e fetoletsweng lentswe ka lentswe kapa ka dinako tse ding e ne e tla fetisa molaetsa o fosahetseng.

• Moelelo wa lentswe kapa wa polelo o ka fapana ho latela taba eo ho buuwang ka yona.

Bafetoledi ba ka kgona ho fetolela ditemana tse ding ba sebedisa mantswe a neng a sebedisitswe dipuong tsa kgale. Le ha ho le jwalo, ba lokela ho etsa seo ka hloko.

Mehlala e latelang e bontsha ka moo phetolelo ya lentswe ka lentswe e ka etsang hore batho ba se ke ba utlwisisa molaetsa:

•   Mangolo a Bibele a sebedisa lentswe “robala” ha a bua ka motho ya robetseng kapa ya shweleng. (Matheu 28:13; Diketso 7:60) Moo ditemana tse ding di sebedisitseng lentswe lena e le ha ho buuwa ka lefu, bafetoledi ba Bibele ba ka sebedisa lentswe ‘ho shwa’ ho thusa motho ya balang hore a kgone ho utlwisisa seo ho buuwang ka sona.—1 Bakorinthe 7:39; 1 Bathesalonika 4:13; 2 Petrose 3:4.

• Ho Baefese 4:14 moapostola Pauluse o sebedisitse mantswe ao ha a fetolelwa lentswe ka lentswe a ka bolelang “ha banna ba bapala mataese.” Ana ke maele a kgale a bolelang ho qhekella batho ba bang ha ho bapalwa mataese. Dipuong tse ngata, maele ao ha a utlwahale ha a fetoletswe lentswe ka lentswe. Empa a utlwahala hantle ha a fetoletswe e le “batho ba qhekellang ba bang” ebile a fetisa moelelo o nepahetseng.

• Ho Baroma 12:11 ho sebedisitswe polelo ya Segerike eo ha e fetolelwa lentswe ka lentswe e bolelang “moya o belang.” Ka Sesotho mantswe ana ha a utlwahale hore na a bolelang. Ka hoo, Bibeleng ena a fetoletswe e le “dumellang moya o halalelang hore o etse hore le be mafolofolo.”

• Thutong ya hae ya Thabeng e tsebahalang, Jesu o ile a sebedisa mantswe ao hangata a fetolelwang e le, “Ho hlohonolofetse ba futsanehileng moyeng.” (Matheu 5:3, King James Version) Empa dipuong tse ngata mantswe ana ha a utlwahale ha a fetoletswe lentswe ka lentswe. Dipuong tse ding ho fetolela mantswe a reng “ba futsanehileng moyeng” lentswe ka lentswe ho ka bolela hore motho ha a phele hantle kelellong kapa ha a na matla ebile ha a ikemisetsa ho etsa letho bophelong. Ha Jesu a ne a bua mantswe ana o ne a sa re batho ba amehe ka dintho tseo ba di hlokang empa o ne a ba ruta hore ba hloka ho tataiswa ke Modimo e le hore ba thabe. (Luka 6:20) Jwale ha mantswe ao a fetoletswe e le “ba hlokomelang hore ba hloka Modimo” kapa “ba hlokomelang hore ba hloka ho ithuta ka Modimo” a fetisa moelelo o nepahetseng wa mantswe ao a Jesu.—Matheu 5:3; The New Testament in Modern English.

• Ditemaneng tse ding lentswe la Seheberu le fetoletsweng e le “poulelo” le na le moelelo o tshwanang le wa Sesotho, le bolela ho halefela molekane wa hao ka lebaka la ho se tshepahale kapa ho honohela dintho tsa batho ba bang. (Diproverbia 6:34; Esaia 11:13) Lentswe lena la Seheberu le boetse le na le moelelo o  hlalosang boikutlo bo botle boo motho a nang le bona. Mohlala, le ka bolela ho ‘tjheseha’ kapa tsela eo Jehova a sireletsang bahlanka ba hae ka yona hobane a ba rata kapa hobane e le Modimo “ya batlang hore batho ba hae ba inehele ho yena feela.” (Exoda 34:14; 2 Marena 19:31; Ezekiele 5:13; Zakaria 8:2) Hape le ka bolela “tjheseho” eo bahlanka ba Modimo ba tshepahalang ba nang le yona ha ba mo sebeletsa kapa ho ikemisetsa ha bona ho mo tshepahalla.—Pesaleme ya 69:9; 119:139; Numere 25:11.

• Lentswe la Seheberu leo hangata le fetolelwang e le letsoho le ka ba le meelelo e sa tshwaneng. Ho itshetlehile ka seo ho buuwang ka sona, lentswe lena le ka fetolelwa e le ho “hapa,” ho ‘fana’ kapa ‘matla.’ (2 Samuele 8:3; 1 Marena 10:13; Diproverbia 18:21) Ha e le hantle lentswe lena le fetoletswe ka ditsela tse sa tshwaneng tse ka hodimo ho 40 Bibeleng ya Phetolelo ya Lefatshe le Letjha.

Dintlha tsena di re bontsha hore ha ho fetolelwa Bibele, ha se ka mehla lentswe le neng le sebedisitswe ha ho ngolwa Bibele le tla fetolelwa ka tsela e tshwanang hohle moo le hlahang teng. Ka hoo, bafetoledi ba lokela ho kgetha ka hloko mantswe a puo ya bona a hlalosang hantle ntho eo ho buuwang ka yona. Ho feta moo, ba lokela ho ngola dipolelo ka tsela e dumellanang le melao ya puo ya bona mme sena se thusa hore ditaba tse ngotsweng di balehe ha bonolo.

Le ha ho le jwalo, bafetoledi ha ba a lokela ho nolofatsa dipolelo haholo hoo di ka fetolang moelelo. Bafetoledi ba ka fosa molaetsa wa Bibele haeba ba o fetolela ho ya ka moo ba o utlwisisang ka teng. Ba ka etsa seo jwang? Ka hore ba ngole dintho tseo ba di nahanang ha ba fetolela empa e se tseo ho neng ho buuwa ka tsona ha ho ne ho ngolwa Bibele kapa ka hore ba siye dintlha tsa bohlokwa. Le hoja ho ka ba bonolo ho bala Bibele eo ditaba tsa yona di akareditsweng feela, ntho eo e ka sitisa motho hore a utlwisise molaetsa o neng o fetiswa qalong ha ho ne ho ngolwa Bibele.

Dithuto tseo bafetoledi ba di dumelang di ka susumetsa tsela eo ba fetolelang ka yona. Mohlala, lengolo la Matheu 7:13 le re: “Tsela e lebisang [timelong] e sephara.” Bafetoledi ba bang ba fetoletse temana ena ho latela seo ba se dumelang. Ba sebedisitse lentswe “dihele” ho ena le ho sebedisa lentswe la Segerike leo ha e le hantle le bolelang ‘timetso.’

Ntlha e nngwe eo bafetoledi ba lokelang ho e hopola ke hore Bibele e ne e ngotswe ka puo eo batho ba neng ba e bua ka nako eo ebile  e utlwisiswa ke balemi, badisana le batshwasi ba ditlhapi. (Nehemia 8:8, 12; Diketso 4:13) Ka hoo, Bibele e fetoletsweng hantle ke eo molaetsa wa yona o utlwisiswang ke batho ba batlang ho tseba Modimo ho sa tsotellehe hore na ba tswa hokae. Ho bohlokwa ho sebedisa mantswe a utlwahalang le a tsejwang ke batho bohle ho ena le ho sebedisa a tsejwang ke batho ba itseng feela.

Bafetoledi ba bangata ba Bibele ba iketseditse qeto ya ho ntsha lebitso la Modimo e leng Jehova Dibibeleng tseo ba di fetoletseng le hoja lebitso leo le hlaha dibukeng tsa kgale tsa Bibele. (Sheba Ntlha ya A4.) Dibibeleng tse ngata lebitso la Modimo le tlositswe mme bakeng sa lona ho kentswe lentswe “Morena” ebile Dibibele tse ding di etsa eka Modimo ha a na lebitso. Mohlala, Dibibeleng tse ding thapelo ya Jesu e hlahang ho Johanne 17:26 e re: “Ke ba tsebisitse wena” mme ho Johanne 17:6 e re: “Ke o tsebahaditse ho batho bao o mphileng bona.” Ha e le hantle mantswe ao a thapelo ya Jesu a re: “Ke ba tsebisitse lebitso la hao,” hape a re: “Ke tsebahaditse lebitso la hao ho batho bao o mphileng bona.”

Selelekela sa Bibele ya pele ya Phetolelo ya Lefatshe le Letjha ya Senyesemane se re: “Ha re fetolela Bibele ha re akaretse molaetsa wa yona feela empa re lwanela ho fetolela lentswe ka lentswe haeba Senyesemane se ena le maele a tshwanang le a puo ya kgale le haeba ha re fetolela lentswe ka lentswe moelelo o ntse o hlaka.” Ka hoo, Komiti ya Phetolelo ya Bibele ya Lefatshe le Letjha e lekile ka hohle ho sebedisa mantswe le dipolelwana tse tshwanang le tsa puo e sebedisitsweng ha ho ne ho ngolwa Bibele. E boetse e entse bonnete ba hore e fetolela molaetsa ka tsela e utlwahalang le e hlakileng. Ka lebaka leo, Bibele e baleha ka tsela e bonolo ebile motho ya e balang a ka kgodiseha hore molaetsa o tswang ho Modimo oo a o balang o fetoletswe ka tsela e nepahetseng.—1 Bathesalonika 2:13.