THUTO 6
Ho na le Tshepo Efe ka Bafu?
1. Ke ditaba dife tse molemo ka bafu?
Ha Jesu a fihla Bethani e haufi le Jerusalema, motswalle wa hae Lazaro o ne a se a na le matsatsi a mane a shwele. Jesu o ile a ya lebitleng a na le Maretha le Maria, dikgaitsedi tsa mofu. Bongata bo ile ba bokana ka ho panya ha leihlo. Na o bona thabo eo Maretha le Maria ba ileng ba ba le yona ha Jesu a tsosa Lazaro?—Bala Johanne 11:21-24, 38-44.
Maretha o ne a tseba ditaba tse molemo ka bafu. O ne a tseba hore Jehova o tla tsosa bafu hore ba tlo phela hape lefatsheng.—Bala Jobo 14:14, 15.
2. Ho etsahalang ka batho ba hlokahetseng?
Modimo o ile a re ho Adama: “O lerole mme o tla kgutlela leroleng”—GENESE 3:19.
Batho ba entswe ka lerole. (Genese 2:7; 3:19) Ha re moya o phelang ka hara mmele wa nama. Re dibopuwa tsa nama, kahoo ha ho letho la rona le pholohang ha re shwa. Ha re shwa, boko ba rona le bona bo a shwa, mme menahano ya rona ya timela. Kahoo, Lazaro ha aa ka a bua letho ka se mo etsahaletseng nakong ya ha a shwele, hobane bafu ha ba tsebe letho.—Bala Pesaleme ya 146:4; Moeklesia 9:5, 6, 10.
Na Modimo o tjhesa bafu ka mollo? Kaha Bibele e re bafu ha ba tsebe letho, ho hlakile hore thuto ya mollo wa dihele ke leshano le etselletsang Modimo. Taba ya ho hlokofatsa batho ka mollo ya nyonyeha mahlong a hae.—Bala Jeremia 7:31.
Shebella video e reng Ho Etsahalang ka Batho ba Hlokahetseng?
3. Na bafu ba ka bua le rona?
Bafu ba ke ke ba bua kapa ba utlwa. (Pesaleme ya 115:17) Empa ho na le mangeloi a kgopo mme a ka bua le batho a ba a iketsa eka ke bafu. (2 Petrose 2:4) Jehova o hloile ha re bua le bafu.—Bala Deuteronoma 18:10, 11.
4. Ho tla tsoswa bomang?
Batho ba dimilione ba shweleng, ba tla phela hape lefatsheng. Esita le ba bang ba ileng ba etsa dintho tse mpe hobane ba sa rutwa ka Modimo, ba tla tsoswa.—Bala Luka 23:43; Liketso 24:15.
Batho ba tsositsweng ba tla kgona ho rutwa nnete ka Modimo, e be ba bontsha tumelo ho Jesu ka hore ba mo mamele. (Tšenolo 20:11-13) Batho ba tla beng ba tsositswe, e be ba etsa dintho tse ntle, ba tla phela ka ho sa feleng lefatsheng.—Bala Johanne 5:28, 29.
5. Tsoho ya bafu e re rutang ka Jehova?
Modimo o entse hore tshepo ya tsoho e be ya sebele, ka ho romela Mora wa hae hore a re shwele. Kahoo, tsoho e re ruta ka lerato la Jehova le mosa wa hae. Ha bafu ba tsoha, ke bomang ka ho kgetheha bao o batlang ho ba bona?—Bala Johanne 3:16; Baroma 6:23.
