Haeba re nahana haholo ka hore na batho ba bang ba fapane jwang le rona, re ka qetella re se re bona eka ho se tshwane hoo ke diphoso mme sena se ka etsa hore re qale ho ba kgetholla. Hang feela ha re qala ho ba le maikutlo ana a mabe ka batho ba bang, seo se etsa hore ho be thata hore re ba qenehele.

“Thabang le batho ba thabileng; llang le batho ba llang.”​—BAROMA 12:15.

Seo e se bolelang, molaomotheo ona o ka hlaloswa ka mantswe a mabedi e leng, bontsha qenehelo. Ho bontsha qenehelo ke ho ipeha maemong a motho e mong mme o utlwe seo a se utlwang.

Haeba re qenehela motho e mong, seo se tla etsa hore re bone hore na ke dintho dife tseo re tshwanang le yena ka tsona. Seo se ka etsa hore re hlokomele hore tsela eo ba ikutlwang le ho etsa dintho ka yona, ke tsela eo le rona re ka etsang dintho ka yona. Ho bontsha qenehelo ho ka etsa hore re hlokomele hore kaofela ha rona re lelapa le le leng ho sa tsotellehe hore na re batho ba mofuta ofe. Haeba re nahana ka hore na re tshwana jwang le batho ba bang, seo se ka fetola tsela eo re ikutlwang ka yona ka bona.

Ho bontsha qenehelo ho ka boela ha re thusa hore re hlomphe batho ba bang. Anne-Marie ya dulang Senegal o bontsha hore o ne a sa nke batho ba bang ba itseng e le ba bohlokwa. O hlalosa ka moo ho bontsha qenehelo ho ileng ha mo thusa ka teng, o re: “Ha ke bona hore na batho bao ba sokola hakaakang, ke ile ka nahana hore na ke ne ke tla ikutlwa jwang haeba e ne e le nna. Ka lebaka la sena ke ile ka qala ho hlokomela hore ha ke wa bohlokwa ho feta batho bana ebile ha ho letho leo ke le entseng le etsang hore ke be betere ho ba feta. Haeba re utlwisisa hore na batho ba bang ba kopana le mathata afe, re ke ke ra ba kgetholla.”

Haeba ho na le batho bao o nang le maikutlo a fosahetseng ka bona, leka ho utlwisisa hore na o tshwana le bona jwang. Ka mohlala, nahana hore na ba ikutlwa jwang ha ba etsa dintho tse latelang:

• ha ba ja le ba malapa a bona

• ha ba qeta ho etsa mosebetsi wa bona o thata wa letsatsi le letsatsi

• ha ba qeta nako ya bona le metswalle

• ha ba mametse mmino oo ba o ratang

Ka mora moo, leka ho ipeha maemong a bona. Ipotse:

• ‘Ke ne ke tla ikutlwa jwang haeba motho e mong a etsa hore ke ikutlwe ke se motho wa bohlokwa?’

• ‘Ke ne ke tla ikutlwa jwang haeba batho ba bang ba ne ba ka nkahlola le pele ba ntseba?’

• ‘Haeba ke ne ke le karolo ya batho bao ke ba kgethollang, ke ne ke tla rata ho tshwarwa jwang?’