KHAOLO EA 38
Ananela Mpho ea Bophelo
Ho na le lintho tse ngata tse ka re thabisang bophelong. Ho ntse ho e-na le lintho tseo re ka li thabelang bophelong esita leha re e-na le mathata. Re ka bontša joang hore re ananela mpho ea bophelo eo Molimo a re fileng eona? Lebaka la bohlokoa ka ho fetisisa leo re lokelang ho etsa joalo ka lona ke lefe?
1. Ke hobane’ng ha re lokela ho ananela bophelo?
Re lokela ho ananela bophelo hobane ke mpho eo Ntate oa rona Jehova a re fileng eona ka lerato. Ke eena “mohloli oa bophelo” kaha ke eena ea entseng ntho e ’ngoe le e ’ngoe. (Pesaleme ea 36:9) “O fa batho bohle bophelo le phefumoloho le lintho tsohle.” (Liketso 17:25, 28) Jehova o re fa lintho tseo re li hlokang e le hore re phele. O boetse o re fa lintho tse etsang hore re thabele bophelo.—Bala Liketso 14:17.
2. Re ka bontša Jehova joang hore re ananela mpho ea bophelo?
Jehova o ile a u tsotella ho tloha mohlang u neng u emoloa. Mohlanka e mong oa Jehova ea bitsoang Davida o ile a rapela ’me Molimo o ile a etsa hore mantsoe a thapelo ea hae a tlalehoe ka Bibeleng. Thapelong eo, Davida o ile a re ho Jehova: “Mahlo a hao a ile a mpona ke sa le lesea le sa tsoa emoloa.” (Pesaleme ea 139:16) Jehova o nka bophelo ba hao bo le bohlokoa haholo. (Bala Matheu 10:29-31.) A ka utloa bohloko haholo haeba motho a ka ipolaea kapa a bolaea motho e mong ka boomo. a (Exoda 20:13) Jehova a ka utloa bohloko haholo haeba re ka beha bophelo ba rona kotsing ka boomo kapa re sa tsotelle bophelo ba batho ba bang. Ha re hlokomela bophelo ba rona re bile re tsotella bophelo ba batho ba bang, rea bontša hore re ananela mpho ea bophelo.
ITHUTE LINTLHA TSE LING
Nahana hore na ke joang u ka bontšang hore u ananela mpho ea bophelo.
3. Hlokomela ’mele oa hao
Ntho e ’ngoe le e ’ngoe eo Bakreste ba e etsang, ba e etsetsa ho tlotlisa Jehova. Ho tšoana le ha ba fana ka ’mele ea bona e le sehlabelo ho Molimo. Bala Baroma 12:1, 2 ebe le buisana ka lipotso tsena:
-
Ke hobane’ng ha u lokela ho itlhokomela ’meleng?
-
U ka etsa’ng hore u lule u phetse hantle ’meleng?
4. E-ba hlokolosi e le hore ho tle ho se ke ha e-ba le motho ea tla hlaha kotsi kapa a shoa
Bibele e re khothaletsa ho qoba lintho tse kotsi. Bapala VIDEO e le hore u bone tse ling tsa lintho tseo u ka li etsang e le hore u lule u sireletsehile.
Bala Liproverbia 22:3 ebe le buisana ka hore na re ka etsa joang hore rona le batho ba bang re lule re sireletsehile . . .
-
ha re le lapeng.
-
ha re le mosebetsing.
-
ha re bapala.
-
ha re khanna kapa re palame koloi.
5. Nka bophelo ba ngoana ea e-s’o hlahe bo le bohlokoa
Thothokisong e ’ngoe, Davida o ile a bua ka tsela eo Jehova a thahasellang ntho e ’ngoe le e ’ngoe e etsahalang ka lesea le e-s’o ka le hlaha. Bala Pesaleme ea 139:13-17 ebe le buisana ka potso ena:
-
Ho ea ka Jehova, na bophelo ba motho bo qala ha a emoloa kapa ha a tsoaloa?
Molao oo Jehova a neng a o file Baiseraele o ne o sireletsa bo-’mè le bana ba bona ba e-s’o hlahe. Bala Exoda 21:22, 23 ebe le buisana ka lipotso tsena:
-
Jehova o ne a ikutloa joang ka motho ea bolaeang ngoana ea e-s’o hlahe ka phoso?
-
O ne a ka ikutloa joang haeba motho a ne a ka bolaea ngoana ea e-s’o tsoaloe ka boomo? b
-
U ikutloa joang ka tsela eo Jehova a nkang bophelo ba ngoana ea e-s’o tsoaloe ka eona?
Ho ka etsahala hore le ’mè ea nkang bophelo e le ba bohlokoa a nke ho ntša mpa e le eona feela tharollo. Bala Esaia 41:10 ebe le buisana ka lipotso tsena:
-
’Mè ea utloang a hloka ho ntša mpa o lokela ho kopa thuso ho mang? Ke hobane’ng ha u cho joalo?
BATHO BA BANG BA RE: “Motho oa ’mè o na le tokelo ea ho ikhethela hore na o ntša mpa kapa che hobane ke ’mele oa hae.”
-
Ke’ng e u kholisang hore Jehova o nka bophelo ba ’mè le ba ngoan’a hae ea e-s’o hlahe e le ba bohlokoa?
KAKARETSO
Bibele e re ruta hore re lokela ho rata, ho hlompha le ho sireletsa mpho eo Jehova a re fileng eona ea bophelo. Taba ena e akareletsa bophelo ba rona le ba batho ba bang.
Re Ithutile’ng?
-
Ke hobane’ng ha Jehova a nka bophelo ba batho bo le bohlokoa?
-
Jehova o ikutloa joang ha motho a ipolaea kapa a bolaea motho e mong ka boomo?
-
Ke hobane’ng ha u ananela mpho ea bophelo?
BATLA
Re ka leboha Jehova joang ka mpho ea bophelo?
Na Molimo a ka tšoarela motho oa ’mè ea kileng a ntša mpa? Fumana karabo.
Ho tseba hore na Jehova o nka bophelo joang ho lokela ho ama boithabiso ba rona joang? Fumana karabo.
“ ‘Lipapali Tse Feteletseng’—Na U Lokela ho Ipeha Kotsing ka Tsona?” (Tsoha!, October 8, 2000)
Bona hore na Bibele e ka thusa motho ea batlang ho ipolaea joang.
a Jehova o tsotella batho bohle ba sithabetseng. (Pesaleme ea 34:18) O utloisisa maikutlo a batho a ka ba susumetsang hore ba batle ho ipolaea ’me o batla ho thusetsa. E le ho bona hore na Molimo a ka thusa joang, bala sehlooho se reng “Ke Batla ho Shoa, na Bibele e ka Nthusa ha ke E-na le Maikutlo a ho Ipolaea?” se hlahang karolong ea Batla khaolong ena.
b Batho ba kileng ba ntša mpa ha baa lokela ho ikutloa ba le molato ho feta tekano. Jehova a ka ba tšoarela. E le hore u fumane lintlha tse eketsehileng ka taba ena, sheba sehlooho se reng “Bibele e Re’ng ka ho Ntša Mpa?” se hlahang karolong ea Batla ea khaolo ena.
Mohlomong u ka Rata le
LIPOTSO TSE BOTSOANG HANGATA
Lenaneo la ho Ithuta Bibele le Lipaki Tsa Jehova
Ha u ithuta bukana ena ea U ka Thaba ka ho sa Feleng! u ka sebelisa Bibele e ’ngoe le e ’ngoe eo u nang le eona. U ka mema ba lelapa le metsoalle.
