Selemong sa 2024 feela, ho tl’o ba le likhetho tse ngata lefatšeng ho pota. Ha ho e-s’o ka ho e-ba le likhetho tse ngata hakana ka selemo. Leha ho le joalo batho ba bangata ha ba sa tšepa bo-ralipolotiki.

•   Ka la 19 September 2023, Pew Research Center e ile ea tlaleha hore liphuputso tse ngata tsa Maamerika li re “bo-ralipolotiki ba bangata ba ichebile bo bona” ho e-na le ho ameha ka ho sebeletsa sechaba. a

 Bacha ba bangata le bona ha ba sa tšepa bo-ralipolotiki.

•   Ka la 29 January 2024, The New York Times e ile ea tlaleha hore “mehleng ena bacha ba amehile ka hore na mathata a teng a ka rarolloa joang. Empa ha ho etsoa liphuputso, bacha ba bontša hore bo-ralipolotiki ha ba rarolle mathata ao.”

•   Ka la 22 January 2024, The Korea Times e ile ea tlaleha hore “lipalo-palo li bontša hore bacha ba tšepa batho ba nang le balateli ba bangata mecheng ea puisano kapa ba behang livideo Inthaneteng, ho feta kamoo ba tšepang bo-ralipolotiki.”

 Na re ka tšepa hore bo-ralipolotiki ba ka re tlisetsa bokamoso bo chabileng? Ke mang eo re ka mo tšepang?

 Ke hantle ha batho ba ameha ka hore na ke mang eo ba lokelang ho mo tšepa. Bibele e re “ea se nang tsebo o lumela lentsoe le leng le le leng empa ea bohlale o nahana ka mohato o mong le o mong oa hae.”—Liproverbia 14:15.

•   Ho ithuta ka ho eketsehileng hore na ntho e nepahetse kapa e fosahetse bala sehlooho se reng: “Itšireletse Litabeng Tseo Eseng ’Nete.”

 Esita le bo-ralipolotiki ba nang le sepheo se setle, ha ba khone ho etsa ntho e ’ngoe le e ’ngoe eo ba batlang ho e etsa. Ke kahoo Bibele e re fang keletso ena:

•   “Le se ke la tšepa likhosana kapa motho hobane a ke ke a le pholosa.”—Pesaleme ea 146:3.

 Bibele e re Molimo o khethile moeta-pele ea tšepahalang le ea sa hloloeng ke letho e leng Jesu Kreste. (Luka 1:32, 33) Jesu ke Morena oa ’Muso oa Molimo, e leng ’muso o busang o le leholimong.—Matheu 6:10.

•   Bala sehlooho se reng: “Morena oa ’Muso oa Molimo ke Mang?” le se reng: “ʼMuso oa Molimo o Tla Etsa’ng?”