Ka 1995 sehlooho se hlahang websaeteng ea UNESCO se reng Declaration of Principles on Tolerance, se ile sa re: “Batho ba lokela ho hlompha maikutlo a batho ba bang e le hore ho be le khotso lefatšeng.”

 Ka lehlakoreng le leng, ho se hlomphe maikutlo a batho ba bang ho ka fella ka ho hloeana le ho se hlomphane. Ha batho ba ba le maikutlo a joalo, ha ba tšoare batho ba bang hantle, ba ka bua batho ba bang hampe le ho ba loantša.

 Batho ba bangata ha ba utloisise hore na ho hlompha maikutlo a batho ba bang ho akareletsa’ng. Ba bang ba lumela hore motho ea hlomphang maikutlo a batho ba bang o lokela ho lumela ntho e ’ngoe le e ’ngoe eo ba bang ba e etsang. Leha ho le joalo, ba bang ba lumellana le se tšehetsoang ke Bibele hore ha u hlompha maikutlo a batho ba bang seo ha se bolele hore u lokela ho lumellana le ntho e ’ngoe le e ’ngoe eo ba e etsang.

 Na Bibele e ka thusa batho hore ba hlomphe maikutlo a batho ba bang matsatsing aa ao re phelang ho ’ona?

Bibele e re’ng ka ho hlompha maikutlo a batho ba bang?

 Bibele e khothaletsa batho hore ba hlomphe maikutlo a ba bang. E re: “Batho bohle ba ke ba bone hore ha le batho ba tsitlellang maikutlong a lona.” (Bafilipi 4:5) E boetse e re khothaletsa hore re nahanele le ho se khetholle ba bang. Batho ba sebelisang keletso ena baa utloisisa hore batho bohle ba na le tokelo ea ho ikhethela hore na ba phele joang empa seo ha se bolele hore ba lumellana le tsela eo batho ba bang ba phelang ka eona.

 Leha ho le joalo, Bibele ea bontša hore hona le tsela eo Molimo a lebeletseng hore re itšoare ka eona. E re: “Uena motho, Molimo o u boleletse se molemo.” (Mikea 6:8) E fana ka tataiso e tsoang ho Molimo e thusang batho hore ba thabele bophelo.—Esaia 48:17, 18.

 Molimo ha aa re lumella hore re ahlole ba bang. Ho ea ka Bibele, “ke Molimo feela ea fanang ka molao le ea ahlolang . . . Joale uena u mang hore u ahlole moahisani oa hao?” (Jakobo 4:12) Molimo o re file bolokolohi ba ho ikhethela ebile o nka re ikarabella ka liqeto tsa rona.—Deuteronoma 30:19.

Bibele e re’ng ka ho hlompha ba bang?

 Bibele e re: “Hlomphang batho bohle.” (1 Petrose 2:17, Bibele e Halalelang) Kahoo, bohle ba khethang ho phela ka melao ea Bibele ba hlompha batho bohle ho sa tsotellehe hore na ba lumela eng kapa hore na ba khetha ho phela bophelo ba bona joang. (Luka 6:31) Sena ha se bolele hore batho ba mamelang Bibele ba tla lumela ntho e ’ngoe le e ’ngoe eo batho ba bang ba e lumelang, ba tla lumellana le maikutlo a bona kapa ba tšehetse liqeto tsohle tseo ba li etsang. Ho e-na le hoo, ba na le mekhoa e metle ebile ba leka ka hohle kamoo ba ka khonang ho etsisa tsela eo Jesu a neng a tšoara batho ba bang ka eona.

 Ka mohlala, Jesu o kile a kopana le mosali ea neng a le bolumeling boo a sa lumellaneng le bona. Mosali enoa o ne a lula le monna eo e seng oa hae. Bona e ne e le bophelo boo Jesu a sa lumellaneng le bona. Leha ho le joalo, Jesu o ile a bua le eena ka tlhompho.—Johanne 4:9, 17-24.

 Bakreste ba etsisa Jesu ka hore ba thabela ho hlalosetsa batho ba bang seo ba se lumelang. Ba etsa joalo ka “tlhompho” ho batho ba ikemiselitseng ho ba mamela. (1 Petrose 3:15) Bibele e ruta Bakreste hore ba se ke ba qobella ba bang hore ba lumele seo ba se lumelang. E re molateli oa Kreste “ha aa lokela ho loana empa o lokela ho ba bonolo ho bohle,” ho akareletsa le ba sa lumeleng lintho tseo a li lumelang.—2 Timothea 2:24.

Bibele e re’ng ka lehloeo?

 Bibele e re: “Loanelang hore le be le khotso le batho ba bang.” (Baheberu 12:14) Motho ea loanelang ho ba le khotso ha a rate lehloeo. Le hoja a sa etse lintho tse khahlanong le seo a se lumelang, o leka ka hohle kamoo a ka khonang ho phela le batho bohle ka khotso. (Matheu 5:9) Ha e le hantle, Bibele e khothaletsa Bakreste ho rata lira tsa bona le ho ba mosa ho ba ba tšoarang hampe.—Matheu 5:44.

 Bibele e re Molimo o ‘hloile’ kapa o ‘nyonya’ lintho tseo batho ba li etsang ho utloisa batho ba bang bohloko. (Liproverbia 6:16-19) Empa mona e sebelisitse lentsoe “ho hloea” ho hlalosa boikutlo bo matla ba ho se rate liketso tse mpe. Bibele e bontša hore Molimo o ikemiselitse ho thusa le ho tšoarela batho ba batlang ho fetoha e le hore ba phele ka melao ea hae.—Esaia 55:7.

Litemana tsa Bibele tse buang ka ho hlompha maikutlo a batho ba bang

 Tite 3:2: ‘Le se ke la tsitlella maikutlo a lona, le be bonolo ho batho bohle.’

 Matheu 7:12: “Ka hona, lintho tsohle tseo le batlang hore batho ba le etse tsona, le lona le ba etse tsona.”

 Joshua 24:15: “Le ikhethele kajeno eo le tla mo sebeletsa.”

 Liketso 10:34: “Molimo ha a leeme.”

 Habakuke 1:12, 13: “[Molimo ha a] khone ho mamella bokhopo.”

 Baroma 12:19: “Le lumelle Molimo hore a bontše khalefo ea hae. Mangolo a re: ‘Jehova o re: “Phetetso ke ea ka, ke tla fana ka kotlo.”’” a

 Jehova Molimo ha aa fa mang kapa mang tokelo ea ho iphetetsa. O tla etsa bonnete ba hore toka e phethahatsoa ka nako eo a e behileng. E le ho ithuta ka ho eketsehileng, bala sehlooho se reng: “Will the Cry for Justice Be Heard?”