Ka la 24 February 2022, Russia e ile ea hlasela Ukraine, ho sa tsotellehe boiteko boo baeta-pele ba linaha ba bo entseng ho qoba ntoa ena. Ntoa ee e ka ama lefatše joang? Matsatsi a ’maloa a fetileng, mongoli e moholo oa Machaba a Kopaneng António Guterres o ile a re: “Ho thata ho nahana ka tšenyo eo ntoa ena e tl’o e baka le kamoo e tl’o ama tšireletseho ea linaha tsa Europe le linaha tse ling tsohle.”

•   Jesu Kreste o ile a bolela esale pele hore “sechaba se tla tsohela sechaba matla le ’muso o tla tsohela ’muso matla.” (Matheu 24:7) Bala sehlooho se reng “Ke’ng e Bontšang Hore re Phela ‘Matsatsing a ho Qetela?’ kapa ‘Nakong ea Bofelo’?” E le hore u bone hore lintoa tse etsahalang kajeno li phethahatsa boprofeta boo Jesu a buileng ka bona.

•   Buka ea Tšenolo e tšoantša lintoa le mopalami oa pere e “’mala oa mollo” ea tlosang “khotso lefatšeng.” (Tšenolo 6:4) Bala sehlooho se reng “Bapalami ba Bane ba Lipere—Ke Bo-mang?” ho bona hore na boprofeta bona bo kenella joang lintoeng tse etsahalang kajeno.

•   Buka ea Daniele e boletse esale pele ka tsekisano e tla ba lipakeng tsa “morena oa leboea” le “morena oa boroa.” (Daniele 11:25-45) Shebella video e nang le sehlooho se reng Boprofeta bo Phethahetseng—Daniele Khaolo ea 11 ho ithuta hore na ke Hobane’ng ha Russia le linaha tse e tšehetsang li bitsoa morena oa leboea. a

•   Tšenolo e boetse e bua ka ‘ntoa ea letsatsi le leholo la Molimo ea Matla ‘Ohle.’ (Tšenolo 16:14, 16) Leha ho le joalo, ena ha se ntoa e lipakeng tsa linaha. Bala sehlooho se reng “Ntoa ea Armagedone Ke’ng?” ho ithuta lintlha tse eketsehileng ka ntoa ena.

•   Bibele e re Molimo o tla “felisa lintoa ho isa pheletsong ea lefatše.” (Pesaleme ea 46:9) Bala sehlooho se reng “Tšepo ka Bokamoso” ho ithuta lintlha tse eketsehileng ka bokamoso boo Molimo a bo tšepisang.

•   Jesu o rutile balateli ba hae hore ba rapelle ’Muso oa Molimo. (Matheu 6:9, 10) ’Muso oo ke ’muso o leholimong oo ka oona Molimo a tl’o phethahatsa thato ea hae lefatšeng ’me thato ea hae e akarelletsa hore ho be le khotso lefatšeng. Ho ithuta hore na ’muso oo o ka u tsoela molemo joang, shebella video e nang le sehlooho se reng ’Muso oa Molimo Ke’ng?

 Ho na le Lipaki Tsa Jehova tse ka holimo ho 129 000 tse lulang Ukraine. Li etsisa Jesu ka hore li se ke tsa nka lehlakore lipolotiking le ho ea ntoeng. (Johanne 18:​36) Lefatšeng lohle, Lipaki Tsa Jehova li ntse li tsoela pele ho phatlalatsa “litaba tsena tse molemo tsa ’Muso” e le tharollo ea mathata a moloko oa batho ho akarelletsa le lintoa. (Matheu 24:14) Kopa ho ithuta le e mong oa Lipaki Tsa Jehova ka tšepo eo Bibele e fanang ka eona.