BOYLE o hlahetse lelapeng le ruileng, Lismore Castle, Ireland ka 1627, e leng haufi le nako eo bo-rahistori ba e bitsang qaleho ea mehla ea ho beha mabaka—ha banna ba bohlale ba ne ba leka ho lokolla batho chesehong e feteletseng e neng e ba entse makhoba ka lilemo tse makholo. Boyle le eena o ne a e-na le sepheo se tšoanang. Paleng ea bophelo ba hae ea ha a sa hōla, o ile a ipitsa Philaretus, e bolelang “Morati oa Toka.”

Takatso ea Boyle ea ho ithuta ’nete e ne e lekana le takatso ea hae e matla ea ho bolella ba bang ka seo a ithutileng sona. O ile a ngola libuka tse ngata tse ileng tsa e-ba le tšusumetso e khōlō ho batho ba bangata ba mehleng ea hae, ho akarelletsa le rasaense ea tummeng Sir Isaac Newton. Ka 1660, Boyle e ile ea e-ba e mong oa bathehi ba Royal Society, e leng mokhatlo oa bo-rasaense o ntseng o le teng London, Engelane.

Boyle o ’nile a bitsoa moqapi oa thuto ea k’hemistri. O ile a etsa lintho ka tsela e fapaneng ka ho feletseng le ea bo-rasaense ba mehleng ea hae. Bo-rasaense bao, ba ne ba pata lintho tseo ba li fihletseng kapa ba li ngola ka tsela e poteletseng eo batho ba bangata ba ka thōko ba neng ba ke ke ba e utloisisa. Ho fapana le bona, Boyle eena o ile a ngola lintlha tsohle ka mosebetsi oa hae. Ho feta moo, ho e-na le hore a amohele likhopolo-taba tse ’nileng tsa amoheloa ka nako e telele, o ne a lumela hore ho nepahetse hore a etse liteko tsa saense e le hore a fumane ’nete.

 Liteko tsa saense tsa Boyle li tšehetsa taba ea hore ntho leha e le efe e teng, e entsoe ka likaroloana tse nyenyane ka ho fetisisa ’me li kopane ka tsela e itseng ho etsa lintho tse fapaneng.

Kakaretso ea liphuputso tsa saense tsa Boyle e ngotsoe bukeng ea hae e tsebahalang ea The Sceptical Chymist. Bukeng eo, o khothalletsa bo-rasaense hore ba qobe ho ikhohomosa kapa ho tsitlella maikutlong a bona ’me ba ikemisetse ho amohela liphoso. Boyle o ile a hatisa taba ea hore bo-rasaense ba tsitlellang maikutlong a bona, ba lokela ho fumana phapang pakeng tsa lintho tseo ba neng ba tseba hore ke ’nete le tseo ba neng ba nahana hore ke ’nete.

Tumelo ea Boyle ho Molimo e ne e thehiloe linthong tseo a neng a tseba hore ke ’nete. Lintho tseo a ileng a li fumana ka sepakapaka le tsela e hlollang eo libōpuoa tse phelang li entsoeng ka eona, li ile tsa mo kholisa hore e tlameha ebe ho na le Moqapi le ’Mōpi oa tsona. Kahoo, o ile a hana tšusumetso e neng e ntse e hōla har’a barutehi ba mehleng ea hae ea ho latola boteng ba Molimo. Boyle o ile a etsa qeto ea hore ha ho na motho ea tsebang ho hlahloba mabaka ka botšepehi ea ka sitoang ho lumela ho Molimo.

Leha ho le joalo, Boyle o ne a sa nahane hore tsela eo batho ba behang mabaka ka eona, ke eona feela e ka mo thusang hore a fumane ’nete. O ne a bona ho hlokahala tšenolo e itseng e tsoang ho Molimo. O ile a re tšenolo eo ke Lentsoe la Molimo, Bibele.

Boyle o ile a tšoenyeha ha a hlokomela hore batho ba bangata ha ba tsebe seo Bibele e se rutang le hore ba bonahala ba se na motheo o tiileng oa litumelo tsa bona. O ile a ipotsa hore na ho tla joang hore motho a lumele lintho hobane feela a li rutiloe ke batsoali ba hae kapa hobane e le tsa sebakeng seo a tsoaletsoeng ho sona. Boyle o ile a bontša hore o labalabela ho thusa batho hore ba be le tsebo e eketsehileng ka Bibele.

E le hore a finyelle seo, Boyle o ile a tšehetsa ka lichelete mosebetsi oa ho hatisa Bibele ka lipuo tse ngata. Tse ling tsa lipuo tsena li akarelletsa tse buuang ke matsoalloa a Amerika Leboea, hammoho le Searabia, Seaerishe, Semalay le Seturkey. Kahoo, Robert Boyle o ile a bontša hore le hoja a ne a le bohlale, o ne a ikokobelitse a bile a na le tabatabelo ea ho fumana ’nete linthong tsohle le ho thusa batho ba bang hore ba etse se tšoanang.