Tlaleho ea Lefapha la Tšireletso la Naha United States le re lilemong tse ka holimo ho tse leshome tse fetileng, basebetsi ba tšireletso ba boema-fofane ba amohile batho lintho tse sa lumelloang tse limilione tse 50. Ka 2011 feela, basebetsi ba tšireletso ba ile ba thibela ha lithunya tse fetang 1 200 li kenngoa lifofaneng. Bongata ba batho ba ile ba re ba ne ba lebetse hore ba tšoere lithunya.

Ba boholong lefapheng la thuto ba qalile ho khomaretsa lisebelisoa tse nyenyane tsa elektronike lijunifomong tsa bana e le hore ba se ke ba lofa sekolo ntle ho tumello. Motsoali o fumana molaetsa oa selefouno ha lisensara li bontša hore ngoana o fihlile sekolong, ebe li romela molaetsa o fapaneng ha ngoana a ka fihla metsotso e 20 ka mor’a nako.

Kereke ea Lutere ha e sa nkoa e le bolumeli ba naha ea Norway. Ka lekhetlo la pele, Paramente ea Norway e ile ea voutela ho hlomathisa molao oa motheo e le hore e ka khaola maqhama a pakeng tsa Kereke le Puso.

Basebetsi ba babeli ho ba bararo bao ho entsoeng phuputso ho bona Czech, ba ile ba re ba ikutloa ba tlameha ho araba lifouno, li-e-mail, kapa melaetsa ea selefouno e amanang le mosebetsi esita leha ba se mosebetsing. Ba bangata ba bona ba nahana hore ba tla be ba hloka botho ha ba sa arabe melaetsa eo hang-hang.

Ho sa tsotellehe ho phahama ha tlhahiso ea lijo ka liphesente tse ka bang 50 lilemong tse 20 tse fetileng, le lithane tse limilione tse 71 tsa raese le koro tse bokeletsoeng, India e ntse e thatafalloa ke ho fepa batho ba eona. Ke karolo e ka etsang 40 lekholong feela ea lijo tseo tse bokeletsoeng e fuoang batho ba India. Bobolu le ho senngoa ha lijo ke tse ling tsa lintho tse bakang mathata.