BATHO ba sebelisang lik’homphieutha ba boloka boitsebiso bo bongata ho tsona boo ba ka bo fumanang ha ba bo batla. Borasaense ba tšepa hore ba tla ntlafatsa mekhoa e sebelisoang ea ho boloka boitsebiso ka hore ba etsise mokhoa oa tlhaho o tsoetseng pele oa ho boloka boitsebiso—e leng oa DNA.

Ak’u nahane: DNA e fumanehang liseleng, e boloka boitsebiso bo bongata haholo ba lintho tse phelang. Nick Goldman oa mokhatlo oa European Bioinformatics Institute o re: “Re ka khona ho nka DNA masapong a liphoofolo tse khōlō tse kang litlou tse seng li le sieo. . . ebe re utloisisa kamoo e sebetsang kateng. Kaha e nyenyane haholo, e na le boitsebiso bo bongata ebile ha ho hlokahale motlakase hore e boloke boitsebiso, ho bonolo ho bo boloka le ho bo romela.” Na DNA e ka boloka boitsebiso bo entsoeng ke batho? Bafuputsi ba cho joalo.

Borasaense ba khonne ho etsa DNA ea maiketsetso e sebelisang li-code ho boloka boitsebiso, likhatiso tse rekotiloeng le litšoantšo joalokaha boitsebiso bo bolokoa lisebelisoeng tsa elektronike kajeno. Hamorao borasaense bana ba ile ba ntša boitsebiso boo bo le joalokaha ba ne ba bo kenya. Borasaense ba lumela hore qetellong ha ba ntse ba sebelisa mokhoa ona, grama e le ’ngoe ea DNA ea maiketsetso e ka khona ho boloka boitsebiso bo lekanang le bo ka bolokoang ke li-CD tse 3 000 000 ’me boitsebiso boo bo ka fumaneha le ka mor’a lilemo tse makholo kapa tse likete. Kamoo ho bonahalang kateng, mokhoa ona o ka boloka boitsebiso bohle bo teng lefatšeng. Sena se entse hore DNA e bitsoe “hard drive [sesebelisoa se bolokang boitsebiso k’homphieutheng] eo ho seng e ka bapisoang le eona.”

U nahana’ng ka see? Na bokhoni ba DNA ba ho boloka boitsebiso bo bile teng ka ho iphetola ha lintho? Kapa na bo entsoe?