NA LE uena ha u sa tšepa bolumeli? Batho ba bangata le bona ba ikutloa ka tsela e tšoanang. Linaheng tse ngata, palo ea batho ba ipolelang hore ‘ha se balumeli’ e ntse e eketseha ’me sena se bontša hore bolumeli bo ntse bo felloa ke matla. Ho buuoe ka tse ling tsa linaha tseo sehloohong sena.

Ho na le mabaka a mangata a etsang hore batho ba se ke ba hlola ba tšepa bolumeli. A mang a mabaka a etsang hore batho ba se hlole ba kena kereke a akarelletsa lintho tseo malumeli a li lumellang tse kang lintoa, litlaleho tse mpe tsa thobalano tse etsoang ke baruti hammoho le lintho tse ling tse poteletseng tseo ba li etsang. Lintho tseo li akarelletsa:

• Maruo: Buka ea Global Index of Religion and Atheism e re: “Ha motho a ntse a rua, lerato la hae la bolumeli lea fokotseha.” Hoo ke ’nete hobane linaheng tse ngata batho ba ruile. Moprofesa oa litaba tsa moruo e leng John V. C. Nye o ile a re libakeng tse ling, batho ba “ruile haholo hoo morena ea hlaheletseng ka ho fetisisa ea phetseng lilemong tse makholo a mabeli tse fetileng a neng a ka khalla maruo a bona.”

  SEO BIBELE E SE BUANG: Bibele e ile ea bolela esale pele hore “matsatsing a ho qetela,” batho ba ne ba tla rata chelete le menate ho feta Molimo le moahelani. (2 Timothea 3:1-5) Mongoli e mong oa Bibele ea neng a tseba kotsi ea ho ba le maruo, o ile a re ho Jehova Molimo: “U se ke ua mpha bofutsana kapa maruo.” Ke hobane’ng ha a ile a bua see? O ile a re: “E le hore ke se ke ka khora eaba kea u latola.”—Liproverbia 30:8, 9.

• Lineano tsa bolumeli le boitšoaro: Batho ba bangata, haholo-holo bacha, ba nka hore bolumeli bo siuoe ke nako. Ba bang bona ba nyahamisoa ke lintho tse etsuoang likerekeng. Raliphatlalatso oa Mokhatlo oa Scotland o buellang batho ba sa lumeleng bolumeling e leng Tim Maguire o re: “Batho ha ba sa ea likerekeng hobane ba nka hore melao ea boitšoaro e ’nileng ea sebelisoa ka lilemo tse makholo e siuoe ke nako.”

  SEO BIBELE E SE BUANG: Ha Jesu Kreste a lemosa balateli ba hae ka mesuoe ea bohata, o ile a re: “Le tla ba tseba ka litholoana tsa bona. . . . Sefate se seng le se seng se setle se hlahisa litholoana tse ntle, empa sefate se seng le se seng se bolileng se hlahisa litholoana tse se nang thuso.” (Matheu 7:15-18) “Litholoana tse se nang thuso” li akarelletsa ho itšunya-tšunya lipolotiking ha likereke hammoho le ho lumella mekhoa e meng e halefisang Molimo, e kang ho ratana le batho ba bong bo tšoanang. (Johanne 15:19; Baroma 1:25-27) Li boetse li akarelletsa litloaelo le meetlo e iqapetsoeng e rutoang likerekeng ho e-na le ho ruta lithuto tsa Mangolo. (Matheu 15:3, 9) Jesu o ile a re: “Fepa linku tsa ka tse nyenyane.” (Johanne 21:17) Leha ho le joalo, kajeno batho ba bangata ha ba na kamano e ntle le Molimo.

•   Bolumeli le chelete: Ho latela tlaleho ea Setsi sa Lipatlisiso sa Pew, batho ba bangata ba lumela hore bolumeli bo amehile haholo ka chelete. Ho ekelletsa moo, baruti ba bangata ba phela bophelo bo mabotho-botho ho fapana le batho ba kenang likereke tsa bona. Ka mohlala, motseng o mong oa Jeremane batho ba bangata ba kenang kereke ba futsanehile, ha mobishopo a phela bophelo bo mabotho-botho. Sena se ile sa halefisa Mak’hatholike a mangata a sebakeng seo. Hape, makasine ea GEO e re Nigeria, “moo ho nang le baahi ba limilione tse 100 ba phelang ka chelete e ka tlaase ho R13.93 ka letsatsi, ba bang ba baruti ba teng ba hafa ka nkatana ’me sena se tšoenya batho ba bangata.”

  SEO BIBELE E SE BUANG: E mong oa bangoli ba Bibele e leng Pauluse o ile a re: “Ha re rekise lentsoe la Molimo.” (2 Bakorinthe 2:17) Le hoja Pauluse e ne e le ’moleli ea tummeng phuthehong ea pele ea Bokreste, o ne a etsa mesebetsi e itseng e le hore a se ke a iketsa moroalo ho batho ba bang. (Liketso 20:34) Tsela eo a neng a etsa lintho ka eona e ne e bontša hore o mamela taelo ea Jesu e reng: “Le amohetse ntle ho tefo, le fane ntle ho tefo.”—Matheu 10:7, 8.

Ka ho tšoanang, Lipaki Tsa Jehova ha li rekise libuka tsa tsona kapa hona ho lefisa batho bao li ithutang Bibele le tsona. Hape ha li nke karolo ea leshome kapa hona ho batla koleke libokeng tsa tsona. Ho e-na le hoo, li fumana chelete ea ho etsa mosebetsi oa tsona ka menehelo e fanoang ka boithatelo.—Matheu 6:2, 3.

Lilemong tse mashome tse fetileng, batho ba ne ba sa nahane hore ho tla ba le mathata bolumeling. Leha ho le joalo, ka Bibeleng, Molimo o ile a bolela esale pele hore sena se tla etsahala. O ile a boela a tšoantša malumeli ’ohle a sa mameleng melao ea hae le seotsoa se ikhohomosang e leng “Babylona e Moholo.”—Tšenolo 17:1, 5.

Tšoantšetso e joalo e loketse hobane le hoja malumeli a bohata a ipolela hore a mamela Molimo, a ikopantse le babusi ba lefatše e le hore a fumane matla le maruo. Tšenolo 18:9 e re: ‘Marena a lefatše a ile a etsa bohlola le eena.’ Lentsoe “Babylona”, le sebelisitsoe ka nepo hobane lithuto tse ngata tsa bolumeli ba bohata tse kang moea o sa shoeng, boraro-bo-bong hammoho le tšebelisano le meea li simoloha Babylona ea boholo-holo e leng motse o neng o ikakhetse ka setotsoana bolumeling ba bohata le litumela-khoeleng. *—Esaia 47:1, 8-11.

Babylona ea boholo-holo e ile ea timetsoa ha metsi a nōka ea Eufrate a neng a e sirelelitse a “psha” ’me lebotho la ntoa la Bamede le Bapersia le hapa motse oo. (Jeremia 50:1, 2, 38) Ha e le hantle, ba ile ba timetsa Babylona ka bosiu bo le bong feela!—Daniele 5:7, 28, 30.

Ka ho tšoanang, Babylona e Moholo le eena o ‘lutse holim’a metsi a mangata.’ Bibele e re metsi ao a bolela “batho le matšoele” a limilione a tšehetsang bolumeli ba bohata. (Tšenolo 17:1, 15) Ho ekelletsa moo, Bibele e ile ea bolela esale pele hore metsi ao a tšoantšetso a tla psha e leng se neng se tla bontša hore ho  timetsoa ha Babylona ea kajeno ho atametse. (Tšenolo 16:12; 18:8) Empa e tla timetsoa ke mang? E tla timetsoa ke mekhatlo ea lipolotiki eo e neng e entse setsoalle le eona ’me lehloeo la mekhatlo eo le tla ba matla. Mekhatlo eo e tla ripitla Babylona e Moholo ’me ka tsela ea tšoantšetso e je linama tsa hae.—Tšenolo 17:16, 17. *

Kaha haufinyane Babylona e Moholo e tl’o timetsoa, ka lerato Molimo o lemosa batho ba hae o re: “Tsoang ho eena, sechaba sa ka, haeba le sa batle ho kopanela le eena libeng tsa hae, le haeba le sa batle ho am ohela karolo ea likotlo tsa hae.” (Tšenolo 18:4) Hlokomela hore lentsoe “haeba” le sebelisitsoe ka makhetlo a mabeli lengolong lena. Kahoo, tlhokomeliso ena e lebisitsoe ho batho ba kang Gaffar le Hediye bao ho buuoeng ka bona qalong ea sehlooho sena. Batho bana ba tšoenngoa ke lithuto tse kotsi tse rutoang likerekeng ’me ba batla ho etsa lintho tse khahlisang Molimo.

Pele a ithuta Bibele, Gaffar o ne a nahana hore batho ba mamela Molimo ka lebaka la tšabo. O ile a re: “Ke ile ka khatholoha ha ke hlokomela hore Jehova ke Molimo ea lerato le hore o batla hore re mamele litaelo tsa hae hobane re mo rata.” (1 Johanne 4:8; 5:3) Hediye o ile a imoloha ha a ithuta hore ha se Molimo ea entseng hore e be khutsana le hore boemo ba hae ha boa reroa esale pele. O ile a tšelisoa ke litemana tsa Bibele tse kang Jakobo 1:13, e bontšang hore Molimo ha a leke batho ka lintho tse mpe. Hediye le Gaffar ba ile ba thabela ’nete ea Bibele ’me ba tsoa ka ho feletseng “Babylona.”—Johanne 17:17.

Ha Babylona e Moholo e timetsoa, batho bohle ba ileng ba tsoa ho eena ba tla sireletsoa e le hore ba ka “rapela Ntate ka moea le ka ’nete.” (Johanne 4:23) Batho bana ba labalabela ho bona ha ‘lefatše le tlala tsebo ea Jehova joalokaha metsi a koahetse leoatle.’—Esaia 11:9.

Ka sebele borapeli ba bohata bo tla felisoa hammoho le liketso tsa bona tse mpe. Sena se tla etsahala hobane Molimo a ke ke “a bua leshano.” (Tite 1:2) Ka lehlakoreng le leng, borapeli ba ’nete bona bo tla tsoela pele ho atleha ka ho sa feleng!