HA ALEXANDRA a le ka beseng e neng e le mothating oa ho tšela ka borokhong, o ile a utloa motho e mong a re: “Bese e ka tsamaea empa ha e le monna enoa oa Lechaena eena oa sala!” O ile a theoha eaba o bona ntate e mong oa Lechaena a ntse a peteketsa ka Sepanishe a leka ho hlalosetsa lepolesa la ka borokhong boemo ba hae. Kaha Alexandra e ne e le Paki ea Jehova ’me a ea libokeng tsa Lipaki tse tšoaroang ka Sechaena, o ile a ithaopela ho tolokela ntate eo.

Ntate eo o ile a re ke moahi oa moo, empa o ile a tšoaroa poho a nkeloa chelete le litokomane tsa hae. Qalong lepolesa leo le ne le sa mo kholoe, le bile le nahana hore Alexandra o keneletse ’momoring oo. Qetellong lepolesa leo le ile la mo kholoa empa ntate eo a tlameha ho patala chelete e itseng e le hore a ka tšela. Kaha ntate eo o ne a se na chelete, Alexandra o ile a mo fa chelete e ka etsang R280.00 eaba oa patala. Ntate eo o ile a thaba haholo a ba a mo tšepisa hore o tla mo patala chelete e fetang. Empa Alexandra o ile a mo hlalosetsa hore o ikutloa a tlameha ho mo thusa kahoo ntate eo a se ke a mo patala. O ile a fa ntate eo lingoliloeng tsa Bibele eaba o mo khothalletsa hore a ithute Bibele le Lipaki.

Hoa thabisa ho utloa kamoo ba bang ba fanang, le ho bontša mosa kateng esita le ho batho bao ba sa ba tsebeng. Na le uena u ka be u ile oa etsa se tšoanang? Potso ena ke ea bohlokoa hobane Jesu o ile a re: “Ho fana ho tlisa thabo e kholo ho feta ho amohela.” (Liketso 20:35) Le bafuputsi baa lumela hore motho ea fanang oa thaba. Ha re boneng hore na ke ka tsela efe.

Hangata ho fana ho tsamaisana le ho thaba. Moapostola Pauluse o ile a re: “Molimo o rata ea fanang a nyakaletse.” O ne a bua ka Bakreste ba ileng ba fana ka menehelo bakeng sa ho thusa Bakreste-’moho le bona ba neng ba e-na le mathata. (2 Bakorinthe 8:4; 9:7) Pauluse o ne a sa bolele hore ba ile ba fana hobane ba thabile, empa o ne a bolela hore ba ile ba thaba ka lebaka la ho thusa ba bang.

Ho ea ka saense, ho fana “ho hlasimolla kelello ’me ho tlisa thabo, ho kopanya batho ebile ho etsa hore ba tšepane.” Patlisiso e ’ngoe eona e fumane hore “ha batho ba ne ba fa ba bang chelete ba ne ba thaba ho feta ha ba ithekela lintho ka eona.”

Mohlomong ka linako tse ling u ikutloa eka ha ho na letho le lekaalo leo u ka le etsang kapa oa fana ka lona. Empa motho e mong le e mong a ka thabisoa ke ho ‘fana a nyakaletse.’ Haeba u fana u nyakaletse, leha u sa fane ka ntho  e kholo, u ka thaba. Motho e mong eo e leng Paki ea Jehova o ile a romela molaetsa moo ho etsoang makasine ena, a re: “E se e le lilemo joale ke ntša monehelo o seng mokae phuthehong. Empa Jehova o mphile ho hongata ho feta seo ke faneng ka sona. . . . Kea leboha hore ebe le mphile monyetla oa hore ke fane ka mpho ena, ruri sena sea nkhothatsa.”

Ha se chelete feela eo re ka fanang ka eona. Re ka boela ra fana ka lintho tse ling.

Bibele e re: “Motho ea nang le mosa o lerato o sebetsana ka mokhoa o putsang le moea oa hae, empa motho ea sehlōhō o tlisetsa ’mele oa hae khathatso.” (Liproverbia 11:17) Batho ba mosa baa fana ’me ba sebelisa nako le matla a bona ho thusa ba bang. Ba fumana melemo e mengata e akarelletsang ho phela hantle ’meleng.

Lipatlisiso li bontša hore batho ba fanang ha ba kule hangata ebile ha se hangata ba bang le khatello ea maikutlo. Ho fana ho boetse ho etsa hore batho ba nang le mafu a sa foleng ba ikutloe ba le betere. Lipatlisiso li boetse li bontša hore batho ba ntseng ba thusoa ho tlohela joala, ha ba thusa ba bang, ba khona ho bo tlohela kapele ba sa be le khatello ea maikutlo.

Makasine e ’ngoe e hlalosa hore “ha motho a rata batho ebile a fana, hangata ha a nahane ka lintho tse nyahamisang.” Ho fana ho ka boela ha fokotsa khatello ea mali le ea maikutlo. Hape, haeba batho ba hlokahalletsoeng ke balekane ba thusa ba bang, ba khona ho hlola khatello ea maikutlo.

Ruri ho fana hoa thabisa.

Jesu o ile a re ho balateli ba hae: “Itloaetseng ho fana, ’me batho ba tla le fa. Ba tla tšela likotleng tsa liaparo tsa lona tekanyo e ntle, e hlohliloeng, e hlokohliloeng le e tšolohang. Etsoe tekanyo eo le lekanyang ka eona, ba tla le lekanyetsa ka eona ka ho tšoanang.” (Luka 6:38) Ha u thusa batho ba bang, hangata le bona ba etsa se tšoanang ho uena le ho ba bang. Kahoo, ho fana ho thusa batho ho ba le tšebelisano-’moho ’me ho tiisa setsoalle.

Bafuputsi ba ile ba hlokomela hore “batho ba tloaetseng ho fana ba susumetsa ba bang ho latela mohlala oa bona.” Ba boetse ba bontša hore “ha motho a bala ka mosa o bontšitsoeng ke ba bang, o susumelletseha ho etsa se tšoanang.” Ke ka lebaka leo bafuputsi ba reng “motho a le mong a ka susumetsa batho ba bangata ho akarelletsa le bao a sa ba tsebeng.” Ka sebele ho fana ho ka  tšoaetsa ba bang ’me bophelo bo ka ba monate haeba batho ba bangata ba itloaetsa ho fana.

Ka mohlala, Lipaki Tsa Jehova li ile tsa ithaopela ho fana ka liphallelo ha ho ne ho e-na le sefefo se matla Florida, U.S.A. Ha Lipaki li ntse li emetse ho sebetsa ntlong e ’ngoe, li ile tsa hlokomela hore fense ea moahelani oa tsona e senyehile, kahoo tsa ithaopela ho e lokisa. Moahelani eo o ile a ngolla ntlo-kholo ea Lipaki Tsa Jehova a re: “Ka sebele ke qala ho kopana le batho ba ratang batho hakana. Ke leboha haholo.” O ile a bontša hore oa leboha ka hore a ntše monehelo e le ho tšehetsa mosebetsi oa Lipaki Tsa Jehova.

Phuputso e ’ngoe ea saense e re “ka tlhaho batho ba rata ho thusana.” E boetse e re “esita le bana ba rata ho fana ’me ba qala ho etsa seo e sa le masea.” Hobane’ng? Bibele e re re bopiloe ka “setšoantšo sa Molimo” kahoo re khona ho bontša makhabane a tšoanang le a hae.—Genese 1:27.

’Mopi oa rona Jehova ke Molimo ea fanang. O re file bophelo le ntho e ’ngoe le e ’ngoe e re thabisang. (Liketso 14:17; 17:26-28) Haeba re bala Lentsoe la hae, e leng Bibele, re tla ithuta ka lerato la hae bakeng sa rona hape re tla ba metsoalle ea hae. Bibele e boetse e re bolella ka seo Molimo a se entseng e le hore re fumane bophelo bo sa feleng nakong e tlang. * (1 Johanne 4:9, 10) Kaha re entsoe ka setšoantšo sa Molimo, re etsa hantle ha re etsisa mohlala oa hae oa ho fana. Haeba re etsa joalo, re tla thaba ’me Molimo o tla re amohela.—Baheberu 13:16.

Na u ntse u hopola Alexandra, eo ho builoeng ka eena qalong ea sehlooho see? Pale ea hae e ile ea fella kae? Le hoja motho e mong ea neng a le ka beseng eo a ile a re Alexandra o bapetse ka chelete ea hae, ntate eo a ileng a mo thusa o ile a patala chelete eo. Ho feta moo, ntate eo o ile a fela a ithuta Bibele. Alexandra o ile a thaba haholo ha a kopana le ntate eo ka mor’a likhoeli tse tharo, kopanong ea puo ea Sechaena ea Lipaki Tsa Jehova, Peru. Ntate eo o ile a ba a memela Alexandra le ba neng ba tsamaea le eena lijong lebenkeleng la hae.

Ruri ho fana le ho thusa ba bang hoa thabisa. Re ka thaba le ho feta haeba re ka thusa ba bang ho tseba ka Jehova Molimo e leng Mofani oa limpho tsohle tse molemo!—(Jakobo 1:17) Le uena u ka thabela melemo e tlisoang ke ho fana!