Kaha re se re bone hore ha se Molimo ea re bakelang mathata, joale ke hobane’ng ha ho e-na le tlala, ho sotleha, ntoa, mafu le likoluoa tsa tlhaho? Sehloohong sena, Bibele e tl’o re fa mabaka a mararo ao ka ’ona re hlaheloang ke lintho tsena.

1. Boithati, Meharo le Lehloeo. Bibele e re ‘motho o busa motho ho mo ntša kotsi.’ (Moeklesia 8:9) Hangata re hlaheloa ke mathata hobane re sotloa ke batho ba khopo, ba meharo le ba ithatang.

2. Liketsahalo Tse sa Lebelloang. Ka linako tse ling re ba le mathata hobane re “hlaheloa ke nako le ketsahalo e sa lebelloang.” (Moeklesia 9:11) Temana ena e bolela hore maemong a mang mathata a rona a bakoa ke hore ho be le kotsi ea tšohanyetso sebakeng seo re leng ho sona. Kapa a bakoa ke hore batho ba bang ba etsa liphoso le hore ha ba tsotelle.

3. Lefatše le Busoa ke ea Khopo. Bibele e re lebaka-baka le etsang hore re be le mathata ke hobane “lefatše lohle le rapaletse matleng a ea khopo.” (1 Johanne 5:19) Enoa “ea khopo” ke Satane Diabolose. Qalong e ne e le lengeloi la Molimo, empa “ha aa ka a ema a tiile ’neteng.” (Johanne 8:44) Mangeloi a mang a ile a iketsa bademona ka hore a se ke a mamela Molimo eaba a iketsetsa borata joaloka Satane. (Genese 6:1-5) Esale Satane le bademona ba khelosa batho ho tloha ha ba qala ho se mamele Molimo. Hona joale ba babe le ho feta. Ho tletse bomalimabe hohle hobane Satane o halefile haholo, o ‘khelosa lefatše lohle.’ (Tšenolo 12:9, 12) Satane oa tlola-tlola ke thabo ha re hlaheloa ke mathata hobane o khopo. Kahoo, mathata ’ohle ao re nang le ’ona re a bakeloa ke eena, e seng Molimo.

NAHANA: Bibele e re: “Molimo ke lerato.” (1 Johanne 4:8) Ho ke ke ha etsahala hore motho ea lerato a utloise ba bang bohloko. Kaha Molimo o lerato, ho ke ke ha khoneha hore a re etsetse “bokhopo” le hore a re hlokele “toka.”—Jobo 34:10.

Mohlomong oa ipotsa hore na Molimo o tla felisa Satane neng e le hore bokhopo le ho utloa bohloko li tsebe ho fela. Re se re bone hore Molimo o hloile bokhopo le hore o utloa bohloko haholo ha a bona re utloile bohloko. Ebile o re khothalletsa ho ‘lahlela matšoenyeho ’ohle a rōna ho eena, hobane oa re tsotella.’ (1 Petrose 5:7) Kaha oa re rata ebile o na le matla, o tl’o felisa ntho e ’ngoe le e ’ngoe e re utloisang bohloko. Sehlooho se latelang se tla hlalosa taba ena. *