Ho ntse ho le joalo, batho ba bang ba re re ke ke ra tseba se etsahalang leholimong kaha ha ho motho ea tsoang teng ea ka re bolellang ka lona. Empa lebaka leo le fosahetse hobane Jesu Kreste o ile a phela leholimong pele a tla lefatšeng. O ile a bua le baeta-pele ba bolumeli ba mehleng ea hae a re: “Ha kea theoha leholimong ho tla etsa thato ea ka, empa ho etsa thato ea ea nthomileng.” Kahoo, Jesu o ne a tsebisa baapostola ba hae ka leholimo ha a re: “Ka tlung ea Ntate ho na le libaka tse ngata tsa bolulo.”—Johanne 6:38; 14:2.

Ntate oa Jesu e leng Jehova Molimo, o lula leholimong. (Pesaleme ea 83:18) Kahoo, ha ho motho ea ka hlalosang leholimo hamolemo ho feta Jehova Molimo le Jesu Kreste. Ba ile ba tsebisa batho ka se etsahalang leholimong ka hore ba bontše batho ba tšepahalang lipono.

Sehlooho se latelang se bua ka litlaleho tsa Bibele tse hlalosang lintho tseo batho ba fapaneng ba ileng ba li bona. Ha u ntse u nahana ka litlaleho tseo, u lokela ho hopola hore leholimo hase sebaka se nang le lintho tseo re ka li bonang kapa ra li tšoara. Kahoo, Molimo ha aa ka a re hlalosetsa se etsahalang leholimong ka tsela e ka utloisisoang feela ke libōpuoa tsa moea, empa o re hlaloselitse ka tsela eo re ka e utloisisang. Litlaleho tsena li tla u thusa hore u utloisise libōpuoa tse phelang ‘libakeng tse ngata tsa bolulo’ tseo Jesu a buileng ka tsona.