1, 2. Ke hobane’ng ha ho tla lula ho e-na le mafutsana lefatšeng mehleng ee?

MORUO oa lefatše o putlame. Batho ha ba fumane mesebetsi. Ba bang ba beha bophelo ba bona kotsing e le hore ba fallele linaheng tse ruileng. Bofutsana bo atile esita le linaheng tse ruileng. Batho ba ruileng ba ntse ba rua ho ea pele ha ba futsanehileng le bona ba ntse ba futsaneha ho ea pele. Ho latela lipatlisiso tse entsoeng morao tjena, ha chelete ea batho ba seng bakae ba ruileng ka ho fetisisa e ka kopanngoa, e ka phelisa baahi bohle ba lefatše. Le hoja ho ka ba thata ho netefatsa lipalo-palo tseo, ha ho motho ea sa hlokomeleng hore batho ba bangata ke mafutsana futse, athe ba bang bona ba ruile hoo ba nang le chelete e ka ba phelisang bophelo bohle ea ba ea phelisa le litloholo tsa bona. Jesu le eena o ne a hlokomela taba ena. Kahoo, o ile a bua mantsoe ana a utloisang bohloko: “Kamehla le na le mafutsana.” (Mar. 14:7) Ke hobane’ng ha ho le joalo?

² Jesu o ne a tseba hore boemo ba moruo bo ke ke ba fetoha ho fihlela ’Muso oa Molimo o busa. Tšenolo 18:3 e re bo-ralipolotiki, baruti hammoho le “bahoebi”, kaofela ke karolo ea lefatše lena la Satane. Le hoja batho ba Molimo ba khona ho ikarola  lipolotiking le bolumeling ba bohata, boholo ba batho ba sitoa ikarola ka ho feletseng litabeng tsa moruo oa lefatše lena la Satane.

3. Re lokela ho ipotsa lipotso life?

³ Kaha re Bakreste, re lokela ho ipotsa lipotso tse latelang e le hore re itlhahlobe hore na maikutlo a rona ke afe ka maruo: ‘Nka sebelisa lintho tseo ke nang le tsona joang ho bontša hore ke rata Jehova? Nka etsa’ng hore ke se ke ka phathahana ka ho etsa chelete? Ke lintho life tse etsahalletseng batho ba Molimo tse bontšang hore baa mo tšepa leha ho nyolosetsa?

4, 5. (a) Motsamaisi oa papisong ea Jesu o ile a hlaheloa ke’ng? (b) Jesu o ile a eletsa balateli ba hae hore ba etse’ng?

⁴ Bala Luka 16:1-9. Papiso ea Jesu ea motsamaisi ea sa lokang e etsa hore re inahane. Ka mor’a hore motsamaisi a qosoe ka ho ba bohlasoa ka thepa ea hae, o ile a etsa lintho ka “bohlale bo sebetsang” hore a ‘iketsetse metsoalle’ e tla mo thusa ha a se a lelekiloe mosebetsing oa hae oa botsamaisi. * Jesu o ne a sa re barutuoa ba hae ba etse bomenemene e le hore ba khone ho iphelisa. O ile a ba a re boitšoaro bo joalo ke ba “bara ba tsamaiso ena ea lintho.” Leha ho le joalo, o ne a bua ka papiso eo e le ho hlakisa ntlha ea bohlokoa ho barutuoa ba hae.

⁵ Jesu o ne a tseba hore joaloka motsamaisi eo, balateli ba hae ba ne ba tla lokela ho fumana mokhoa oa ho phela lefatšeng lena la batho ba ichebileng bobona. Ke kahoo a ileng a re ho bona: “Iketsetseng metsoalle ka maruo a sa lokang, e le hore, ha a fela, [Jehova le Jesu] ba ka le amohela libakeng tsa bolulo tse sa feleng.” Ke’ng eo re ithutang eona mantsoe aa?

6. Re tseba joang hore Jehova o ne a sa rera hore batho ba etse chelete?

⁶ Le hoja Jesu a sa ka a hlalosa hore na ke hobane’ng ha a re maruo ha aa loka, Bibele e re hlakisetsa hore Molimo o ne a sa rera hore batho ba etse chelete. Jehova o ile a etsa hore lintho tsohle tseo Adama le Eva ba li hlokang li be teng ka bongata. (Gen. 2:15, 16) Lilemo hamorao, ha phutheho ea batlotsuoa e fuoa moea o halalelang, “ho ne ho se le ea mong ea neng a re leha e le efe ea lintho tseo a neng a e-na le tsona ke ea hae; empa ba ne ba kopanela lintho tsohle.” (Lik 4:32) Moprofeta Esaia o ile a re ho na le nako eo batho ba tla sebelisa lihloliloeng tsa lefatše mahala. (Esa. 25:6-9; 65:21, 22) Empa pele nako eo e fihla, barutuoa ba Jesu ba tlameha ho ba le “bohlale bo sebetsang” e le hore ba khone ho iphelisa ka “maruo a sa lokang” a lefatše lena ’me ba ’ne ba sebeletse Jehova.

7. Ho Luka 16:10-13, Jesu o re eletsa hore re etse’ng?

⁷ Bala Luka 16:10-13. Motsamaisi oa papisong ea Jesu o ile a iketsetsa metsoalle hore e mo tsoele molemo. Empa Jesu o ile a re balateli ba hae ba iketsetse metsoalle leholimong ka mabaka ao e seng a boithati. O ne a batla hore re utloisise hore tsela eo re sebelisang “maruo a sa lokang” ka eona e tla bontša hore na re rata Jehova kapa che. Joang?

8, 9. Fana ka mohlala oa kamoo batho ba bang bontšang kateng hore ba rata Jehova ka maruo a bona a sa lokang.

⁸ Re ka bontša hore re rata Jehova ka lintho  tseo re nang le tsona ka hore re fane ka menehelo ho tšehetsa mosebetsi oa boboleli oo Jesu a buileng ka oona. (Matheu 24:14) Ngoanana e mong oa naheng ea India o ne a boloka chelete ka lebokoseng le lenyenyane. O ne a bile a rekisa lintho tseo a bapalang ka tsona hore a tšele chelete ka moo. Ha lebokose le tlala, o ile a fana ka chelete eo e le monehelo. Mor’abo rona e mong oa India ea nang le masimo a litholoana o ile a fana ka tse ling tsa tsona ka bongata ofising ea phetolelo ea Semalayalam. O re kaha ofisi e hloka ho reka litholoana, o utloa a thusitse ho feta ha a ne a ka fana ka chelete. O na le “bohlale bo sebetsang.” Barab’abo rona ba Greece le bona ba fana ka oli ea mehloaare, chisi le lijo tse ling lelapeng la Bethele.

⁹ Mor’abo rona e mong oa naheng ea Sri Lanka o fane ka ntlo ea hae le setša hore ho tšoareloe liboka le likopano ho tsona le hore ho lule bo-pula-maliboho. Ka ho etsa joalo, o itella bara le barali babo rona ba se nang chelete. Linaheng tseo mosebetsi oa rona o thibetsoeng, barab’abo rona ba fana ka matlo a bona hore ho tšoareloe liboka e le hore bo-pula-maliboho le bahoeletsi ba bang ba se ke ba tlameha ho patalla holo eo ba ka tšoarelang liboka ho eona.

10. Jehova o tla re hlohonolofatsa joang ha re fana?

¹⁰ Mehlala ena ea bontša hore batho ba Molimo ba ‘tšepahala ho se senyenyane’ ka hore ba fane ka lintho tseo ba nang le tsona. (Luka 16:10) Bahlanka baa ba Jehova ba ikutloa joang ka lintho tseo ba fanang ka tsona? Baa utloisisa hore ha ba fana ba tla fumana maruo a “’nete.” (Luka 16:11) Morali’abo rona e mong ea atisang ho fana ka monehelo ho tšehetsa mosebetsi oa boboleli o re: “Ho fana ka tsela ena ho nthusitse ka litsela tse ngata. Ke se ke khona ho tšoarela batho ba bang ka bolokolohi, ho ba mamella ’me le ho mamela ha ke eletsoa.” Batho ba bangata ba ithutile hore ha ba fana, Jehova oa ba hlohonolofatsa.—Pes. 112:5; Liprov. 22:9.

11. (a) Ha re fana re bontša joang hore re na le “bohlale bo sebetsang”? (b) Menehelo e sebelisoa joang ho thusa batho ba Molimo? (Sheba setšoantšo se qalong.)

¹¹ Ha re sebelisa maruo a rona ho sebeletsa Jehova, re bontša hore re na le “bohlale bo sebetsang.” Re tla tseba ho thusa batho ba bang ha maemo a rona a lumela. Le hoja ka linako tse ling batho ba nang le bohona ba sa khone ho ba bo-pula-maliboho kapa ho fallela libakeng tse ling, ba thabisoa ke ho tseba hore menehelo ea bona e tšehetsa mosebetsi oa boboleli oo ba bang ba o etsang. (Liprov. 19:17) Ha re fana ka menehelo, re kenya letsoho hore ho be le lingoliloeng ’me re tšehetsa mosebetsi oa boboleli libakeng tseo batho ba bangata e bang bahoeletsi empa boholo ba bona ba futsanehile. Linaheng tse kang Congo, Madagascar le Rwanda, Libibele li turu. Ka linako tse ling chelete ea ho reka Bibele e ka lekana le mokholo oa beke kapa oa khoeli. Kahoo, ka lilemo tse ngata bara le barali babo rona ba ile ba lokela ho khetha hore na ba tla reka lijo kapa ba reke Bibele. Empa hona joale ka lebaka  la menehelo ea batho ba bangata, mokhatlo oa Jehova o nolofalloa ho fetolela le ho isa Libibele ho bahoeletsi bohle ba li hlokang hammoho le ho batho ba leqemeng la ho rutoa ka Jehova. (Bala 2 Bakorinthe 8:13-15) Kahoo, bohle e ba metsoalle ea Jehova e-bang baa fana kapa baa fuoa.

12. Ke joang Abrahama a ileng a bontša hore o tšepa Molimo?

¹² Tsela e ’ngoe ea ho ba metsoalle le Jehova ke ka ho qeta nako ea rona re sebeletsa Jehova ho e-na le ho qeta nako e ngata re sehlela ho ba le maruo. Abrahama o ile a mamela taelo ea Jehova ea hore a tlohe motseng oa Ure moo ho neng ho hafshoa ka nkatana hore a eo phela litenteng hobane o ne a e-na le tumelo ’me a batla ho lula e le motsoalle oa Jehova. (Baheb. 11:8-10) Kamehla o ne a tšepile hore Jehova o tla mo hlohonolofatsa ho e-na le hore a ipatlele maruo. (Gen. 14:22, 23) Jesu o ile a re khothalletsa hore re be le tumelo e joalo. O ile a re ho mohlankana e mong: “Haeba u batla ho phethahala, e-ea u rekise lintho tsa hao u fe mafutsana ’me u tla ba le letlotlo leholimong, u tle ’me u be molateli oa ka.” (Mat. 19:21) Le hoja mohlankana eo a ile a hloleha ho ba le tumelo e tšoanang le ea Abrahama, ba bangata ba bontšitse hore ba tšepa Molimo joaloka Abrahama.

13. (a) Pauluse o ile a re’ng ha a eletsa Timothea? (b) Re ka bontša joang hore re mamela keletso ea Pauluse?

¹³ Timothea o ne a e-na le tumelo. Ka mor’a hore Pauluse a bitse Timothea “lesole le khabane la Kreste Jesu,” o ile a re ho eena: “Ha ho monna ea sebeletsang e le lesole ea ikenyang likhoebong tsa bophelo, e le hore a ka fumana kamohelo ea ea mo ngolisitseng e le lesole.” (2 Tim. 2:3, 4.) Mehleng ena, balateli bohle ba Jesu ba latela keletso eo ka hohle kamoo ba ka khonang. Ha lefatše le ba susumetsa ka lipapatso hore ba be le maruo a eketsehileng, ba hopola mantsoe ana: “Ea alingoang ke mohlanka oa motho ea mo alimang.” (Liprov. 22:7) Satane o batla hore re qete nako ea rona e ngata re sehlela ho ba le maruo. Re ka qeta lilemo re sesa ka har’a likoloto ka lebaka la liqeto tse ling tseo re li entseng. Ka mohlala, sekoloto sa ntlo, sa sekolo, sa koloi esita le ho ntša chelete e ngata bakeng sa lechato ho ka etsa hore re imeloe haholo kelellong. Re tla be re bontša hore re bohlale ha re nolofatsa bophelo ka ho fokotsa likoloto le ho qoba ho reka lintho tseo re sa li hlokeng e le hore re be makhoba a Molimo ho e-na le ho sehlela maruo.—1 Tim. 6:10.

14. Re lokela ho ikemisetsa ho etsa’ng? Fana ka mehlala.

¹⁴ Ha re hlokomela hore na ke lintho life tseo e leng tsa bohlokoa haholo bophelong, re ka khona ho nolofatsa bophelo ba rona. Ho na le banyalani ba bang ba neng ba e-na le khoebo e etsang chelete e ngata. Leha ho le joalo, ba ile ba rekisa khoebo eo, sekepe sa bona le lintho tse ling tsa bona hobane ba ne ba batla ho boela ba nkela bopula-maliboho. Ka mor’a moo, ba ile ba ithaopela ho ea etsa tsoho la monna moo ho neng ho hahoa ntlo-kholo e Warwick, toropong ea New York. Nakoana ka mor’a moo, ba ile ba ea sebeletsa Bethele hammoho le morali oa bona, mokhoenyana oa bona le batsoali ba bona. Batsoali ba bona ba ile ba ithaopa kahong ea ntlo-kholo. Morali’abo rona e mong oa pula-maliboho motseng oa Colorado o naheng ea U.S.A, o ne a sebetsa ka matsatsi a itseng bankeng. Mookameli oa hae o ile a rata tsela eo a sebetsang ka eona haholo hoo a ileng a ekeletsoa mosebetsi ’me a pataloa mokholo o kopolang hararo oo a  neng a o pataloa pele a ekeletsoa mosebetsi. Empa kaha mosebetsi oo o ne o tla mo sitisa ho ea tšimong hantle, o ile a o hana. Ena ke mehlala e seng mekae har’a e mengata ea Bakreste-’moho le rona ba ileng ba itella Jehova. Ha re ikemisetsa ka mokhoa ona ho etsa hore lintho tseo Jehova a li batlang li tle pele bophelong ba rona, rea bontša hore re nka ho ba metsoalle ea Jehova ho le bohlokoa ho feta ho lelekisa maruo.

15. Ke ntho efe eo re ke keng ra e lebala?

¹⁵ Ha re ruile, ha se hakaalo hore Jehova o re hlohonolofalitse. Jehova o hlohonolofatsa batho ba etsang ‘mesebetsi e metle.’ (Bala 1 Timothea 6:17-19) Ka mohlala, ha morali’abo rona Lucia * a utloa hore bahoeletsi baa hlokeha Albania, o ile a falla Italy a ea Albania ka 1993. Ka nako eo, o ne a se na mokhoa oa ho iphelisa, empa o ile a tšepa Jehova. O ile a ithuta ho bua Sealbania ’me o se a thusitse batho ba 60 hore ba kolobetsoe. Le hoja boholo ba Bakreste-’moho le rona ba sa sebetse tšimo moo batho ba bangata hakaalo ba amohelang litaba tsa Bibele, eng kapa eng eo re e etsang ho thusa batho ho fumana bophelo bo sa feleng ke letlotlo leo le ka mohla re ke keng ra le lebala.—Mat. 6:20.

16. (a) Ho tla etsahala’ng ka lefatše lee? (b) Kaha rea tseba hore na ho tla etsahala’ng ka lefatše, re lokela ho ba le maikutlo afe ka maruo?

¹⁶ Jesu o ile a re: “Ha [maruo a sa lokang] a fela,” eseng ‘haeba a fela.’ (Luka 16:9) Mathata a ho putlama ha moruo a ’nileng a e-ba teng mehleng ena ke linyane ha a bapisoa le lintho tse tla etsahala lefatšeng nakong e tlang. Lefatše lena le busoang ke Satane le tl’o timetsoa hammoho le sohle se ho lona. Moprofeta Ezekiele le Sofonia ba ile ba profeta hore khauta le silevera tseo esale li e-na le boleng bo phahameng ho tloha khale, ha li sa tla ba le thuso. (Ezek. 7:19; Sof. 1:18) Re ka ikutloa joang ha re hlokomela motsotsong oa ho qetela oa bophelo ba rona hore re tetse maruo a ’nete hore feela re be le “maruo a sa lokang” a lefatše lee? Ho ka tšoana le ha re sehlile ka thata bophelo bohle ba rona hore re be le chelete e ngata, athe chelete eo kaofela ke mokoebe. (Liprov. 18:11) Qetellong “maruo a sa lokang” a tla fela. Kahoo, a re a sebeliseng hona joale ho ‘iketsetsa metsoalle’ leholimong, ke hore ka tsela e tla re thusa ho ba metsoalle ea Jehova. Eng kapa eng eo re e etsang hore ’Muso oa Jehova o tle pele bophelong ba rona e re tlisetsa litlhohonolofatso tse ngata.

17, 18. Metsoalle ea Molimo e tla hlohonolofatsoa joang?

¹⁷ Ha ’Muso oa Molimo o se o le teng, ha re na ho hloka chelete hore re be le bophelo bo botle, matlo le lijo. Athe lijo tsona li tla bapala bana. Ka nako eo, ho e-na le hore re hoebe ka lihloliloeng tse kang khauta, silevera le tse ling, re tla khabisa ka tsona. Re tla haha matlo a matle ka thepa ea boleng bo holimo ea lepolanka, lejoe le lesenke ’me e tla fumaneha mahala. Re tla thusa batho mahala ’me re arolelane lintho tse ntle tseo re li fumanang lefatšeng.

¹⁸ Tsena ke tse ling feela tsa litlhohonolofatso tse ngata tseo re tla li fumana ha re ‘iketsetsa metsoalle’ leholimong. Thabo ea barapeli ba Jehova e tla khaphatseha ha ba utloa Jesu a re ho bona: “Tloong, lōna ba hlohonolofalitsoeng ke Ntate, le rue ’muso oo le o lokiselitsoeng ho tloha ho thehoeng ha lefatše.”—Mat. 25:34.