Ho na le litlaleho tsa Bibele tse bontšang hore litopo le masapo a batho ba shoeleng a ile a chesoa. (Josh. 7:25; 2 Likron. 34:4, 5) Mohlomong seo se ne se bontša hore batho bao ba ne ba sa tšoaneloe ke lepato le hlomphehang. Empa ka linako tse ling ho chesoa ha setopo ho ne ho sa bolele seo.

Re bona sena tlalehong e buang ka lefu la Morena Saule le bara ba hae ba bararo. Ba ne ba bolailoe ke Bafilista ntoeng. E mong oa bara bao e ne e le Jonathane, motsoalle e moholo le motšehetsi ea tšepahalang oa Davida. Ha bahale ba Baiseraele ba lulang Jabeshe-gileade ba utloa se etsahetseng, ba ile ba lata litopo tseo tse ’nè, ba li chesa ’me ba pata masapo a tsona. Hamorao Davida o ile a babatsa Baiseraele bao ka seo ba se entseng.—1 Sam. 31:2, 8-13; 2 Sam. 2:4-6.

Mangolo a tšepisa hore bafu ba tla tsosoa—e leng se bolelang hore Molimo o tla khutlisetsa motho bophelong. Ebang motho o chesitsoe kapa che, Jehova a ke ke a hlōleha ho mo tsosa ka ’mele o mocha. Baheberu ba bararo ba tšepahalang bao Morena Nebukadnezare a neng a laetse hore ba lahleloe ka sebōping sa mollo, ha baa ka ba tšoha hore Molimo o tla sitoa ho ba tsosa le haeba ba ka cha lore! (Dan. 3:16-18) Ho bile joalo le ka bahlanka ba tšepahalang ba Jehova ba ileng ba bolaeloa likampong tsa mahloriso tsa Manazi ’me ka mor’a moo ba chesoa. Bahlanka ba bang ba Molimo ba ’nile ba bolaoa ke liqhomane kapa lintho tse ling tse ileng tsa etsa hore ho se ke ha sala leha e se e le moneketsela feela oa bona. Leha ho le joalo ba tla tsosoa.—Tšen. 20:13.

Ha ho hlokahale hore Jehova a tsosolose ’mele oa motho oa pele e le hore a mo tsose. Sena se bontšoa ke se etsahalang ha Molimo a tsosetsa Bakreste ba tlotsitsoeng bophelong ba leholimo. Ho tšoana le Jesu ea ileng “a phelisoa moeeng,” Bakreste ba tlotsitsoeng ba tsosoa e ntse e le bona, empa ba se ba e-na le ’mele oa moea. Ha ba ee leholimong ka ’mele ea nama.—1 Pet. 3:18; 1 Bakor. 15:42-53; 1 Joh. 3:2.

Tšepo ea rōna ea tsoho ha e ea itšetleha ka hore na setopo se chesitsoe kapa che, empa e itšetlehile ka hore re lumele hore Molimo o na le bokhoni ebile o labalabela ho phethahatsa litšepiso tsa hae. (Lik. 24:15) Ke ’nete hore re ka ’na ra se ke ra utloisisa hantle hore na Molimo o tsositse batho joang ka mohlolo nakong e fetileng kapa hore na o tla ba tsosa joang nakong e tlang. Leha ho le joalo, re tšepa Jehova. O ‘tiisitse’ seo ka hore a tsose Jesu.—Lik. 17:31; Luka 24:2, 3.

Bakreste ba lokela ho ela hloko hore na batho ba sebakeng sa habo bona ba tloaetse ho pata bafu joang, ba ikutloa joang le hore na molao o reng tabeng ena. (2 Bakor. 6:3, 4) Kahoo, taba ea hore na setopo sea chesoa kapa che, ke qeto ea motho ka mong kapa ea lelapa.