PELE ho ketsahalo ena e boletsoeng ka holimo, ’na le Evelyn Trabert, eo ke neng ke le kabelong ea boromuoa le eena, re ne re na le lilemo tse peli re qetile koetliso ea rōna sehlopheng sa bone sa Sekolo sa Bibele sa Gileade sa Watchtower, seo ka nako eo se neng se le haufi le Ithaca, New York. Re ile ra abeloa ho ea Santa Ana. Empa pele ke le bolella ho se hokae ka tšebeletso ea ka ea boromuoa e nkileng lilemo tse ka bang 29, e re ke le bolelle hore na ho tlile joang hore ke kenele tšebeletso eo.

Batsoali ba ka e leng John le Eva Olson ba ne ba lula Spokane, Washington, U.S.A., ka 1923 ha ke hlaha. E ne e le Malutere empa ba sa lumellane le seo kereke e se rutang ka mollo oa lihele, kaha ba ne ba sa utloisise hore na taba eo e lumellana joang le hore Molimo o lerato. (1 Joh. 4:8) Ntate o ne a sebetsa lebakeng, ’me ka le leng bosiu, mosebetsi-’moho le eena a mo bolella hore Bibele ha e rute hore lihele ke sebaka sa tlhokofatso. Nakoana ka mor’a moo, batsoali ba ka ba ile ba qala ho ithuta le Lipaki Tsa Jehova ’me ba ithuta hore na ha e le hantle Bibele e re ho etsahala’ng lefung.

Ka nako eo ke ne ke le lilemo li robong, empa ke sa hopola ke mametse batsoali ba ka ba bua ka cheseho ka lintho tse ncha tseo ba ithutileng tsona ka  Bibeleng. Ba ile ba tlala cheseho le ho feta ha ba ithuta hore lebitso la Molimo oa ’nete ke Jehova, ’me seo sa ba lokolla pherekanong ea thuto ea Boraro-bo-bong. Ke ile ka qala ho lumela lithuto tsena tse babatsehang tsa Mangolo, ka ithuta hore ‘’nete e ea re lokolla.’ (Joh. 8:32) Kahoo, ha ho mohla nkileng ka tenoa ke ho ithuta Bibele, ho e-na le hoo ke ne ke lula ke thabela ho hlahloba Lentsoe la Molimo. Le hoja ke ne ke le lihlong, ke ne ke ea tšimong le batsoali ba ka. Ba ile ba kolobetsoa ka 1934. Le ’na ke ile ka kolobetsoa ho ba mohlanka oa Jehova ka 1939, ha ke le lilemo li 16.

Lehlabuleng la 1940, batsoali ba ka ba ile ba rekisa ntlo ea bona, ’me boraro ba rōna ra kenela tšebeletso ea nako e tletseng re le bo-pula-maliboho Coeur d’Alene, Idaho. Re ne re hirile folete e ka holim’a moo ho lokisoang likoloi. Liboka li ne li tšoareloa lapeng. Ka nako eo, ke liphutheho tse seng kae feela tse neng li na le Liholo Tsa ’Muso, kahoo tse ling li ne li kenela malapeng a batho kapa libakeng tse hiriloeng.

Ka 1941 ke ile ka ea kopanong e neng e tšoaretsoe St. Louis, Missouri, le batsoali ba ka. Ka Sontaha e ne e le “Letsatsi la Bana,” ’me bana ba lilemo li pakeng tsa 5 le 18 ba ile ba lulisoa haufi le sethala. Ha Mor’abo rōna Joseph F. Rutherford a phethela puo ea hae o ile a bua le rōna bana, a re: “Lōna . . . bana bohle . . . ba ikemiselitseng ho mamela Molimo le Morena eo a mo khethileng, ka kōpo emang!” Re ile ra ema kaofela ha rōna. Eaba Mor’abo rōna Rutherford o re: “Bonang, lipaki tse ncha tsa ’Muso tse 15 000!” Puo eo e ile ea matlafatsa boikemisetso ba ka ba ho ba pula-maliboho.

Likhoeli tse seng kae ka mor’a kopano e neng e tšoaretsoe St. Louis, lelapa leso le ile la fallela karolong e ka boroa ea California. Kabelo ea rōna motseng oo oa Oxnard, e ne e le ho qala phutheho. Re ne re lula k’haraveneng e nang le bethe e le ’ngoe feela. Bosiu ke ne ke ala holim’a tafole ea ho jela ’me ke robala moo—ho se ho sa tšoane le ha ke ne ke e-na le kamore ea ka!

Nakoana pele re fihla California, Japane e ile ea hlasela Pearl Harbor e Hawaii, ka la 7 December, 1941. Ka le hlahlamang, United States e ile ea kena Ntoeng ea II ea Lefatše. Ba boholong ba ile ba laela hore bosiu ho tingoe mabone hohle, ’me re ne re a tima. Likepe tsa Japane tse tsamaeang ka tlas’a metsi li ne li paterola lebōpo la California, ’me ha ho le lefifi li ne li tla sitoa ho hlasela motse.

Likhoeli tse seng kae hamorao, ka September 1942 re ile ra ea Kopanong ea Puso ea Molimo ea Lefatše le Lecha e neng e tšoaretsoe Cleveland, Ohio. Ha re le moo re ile ra mamela ha Mor’abo rōna Nathan H. Knorr a fana ka puo e reng, “Khotso—Na e ka Tšoarella?” O ile a tšohla Tšenolo khaolo ea 17, e buang ka ‘sebata se neng se le teng, empa se se se le sieo, leha ho le joalo se le haufi le ho nyoloha ka mohohlong.’ (Tšen. 17:8, 11) Mor’abo rōna Knorr o ile a hlalosa hore “sebata” seo ke Selekane sa Lichaba se ileng sa khaotsa ho sebetsa ka 1939. Bibele e ne e boletse esale pele hore Selekane seo se ne se tla nkeloa sebaka ke se seng, ’me seo se etse hore ho be le khotso ka nakoana. Ntoa ea II ea Lefatše e ile ea emisa ka 1945. Ka mor’a moo, “sebata” se ile sa boela sa hlaha e se e le Machaba a Kopaneng. Lipaki Tsa Jehova tsona li ile tsa atolosetsa mosebetsi oa tsona oa boboleli lefatšeng ka bophara, ’me ha ba le keketseho e khōlō ho tloha ka nako eo!

Boprofeta boo bo ile ba nthusa hore ke lemohe se larileng ka pele. Ha ho phatlalatsoa hore selemong se latelang ho tlil’o tšoaroa Sekolo sa Gileade, ke ile  ka ba le takatso ea ho ba moromuoa. Ka 1943, ke ile ka abeloa ho ea bula maliboho Portland, Oregon. Ka nako eo, re ne re bapalla beng ba matlo molaetsa oa Bibele ka keramafono, ebe re ba fa lingoliloeng tsa Bibele tse buang ka ’Muso oa Molimo. Ke ile ka qeta selemo seo ke ntse ke nahana ka tšebeletso ea boromuoa.

Ka 1944, ke ile ka thaba haholo ha ke memeloa ho ea Sekolong sa Gileade le motsoalle oa ka Evelyn Trabert. Barupeli ba rōna ba ile ba qeta likhoeli tse hlano ba ntse ba re bontša hore na re ka etsa’ng hore re natefeloe ke ho ithuta Bibele. Re ile ra khahloa ke tsela eo ba neng ba ikokobelitse ka eona. Ka linako tse ling ba ne ba bile ba re tlisetsa lijo tafoleng nakong ea lijo. Re ile ra fuoa mangolo ka la 22 January, 1945.

’Na le Evelyn hammoho le Leo le Esther Mahan, re ile ra fihla kabelong ea rōna El Salvador ka June 1946. Re ile ra fumana hore masimo “a soeufetse bakeng sa kotulo.” (Joh. 4:35) Ketsahalo e boletsoeng qalong ea sehlooho sena e bontša kamoo baruti ba neng ba halefile kateng. Beke pele ho moo, re ne re tšoere kopano ea pele ea potoloho moo Santa Ana. Re ile ra mema batho hohle hore ba tle puong ea phatlalatsa ’me ra thaba ha ho tla batho ba ka bang 500. Ho e-na le hore re tšohe re batle ho tloha motseng oo, re ile ra ikemisetsa le ho feta ho lula e le hore re thuse batho ba lipelo li ntle. Le hoja baruti ba ne ba lemositse batho hore ba se ke ba bala Bibele ebile e le ba seng bakae ba ka khonang ho ba le eona, batho ba bangata ba ne ba ntse ba lapetse ’nete. Ba ne ba ananela hore re leka ho ithuta Sepanishe e le hore re ba rute ka Molimo oa ’nete, Jehova le ka tšepiso ea hae e babatsehang ea ho tsosolosa Paradeise lefatšeng.

E mong oa batho bao ke qalileng ho ithuta le bona ke Rosa Ascencio. Ka mor’a hore a qale ho ithuta Bibele, o ile a arohana le monna eo a neng a lula le eena. Eaba monna eo o qala ho ithuta Bibele. Ba ile ba nyalana, ka mor’a moo ba kolobetsoa, ’me ea e-ba Lipaki Tsa Jehova tse chesehang. Rosa ke eena oa pele oa ho nka bopula-maliboho Santa Ana. *

Rosa o ne a e-na le k’hefi. O ne a e koala ha a ea tšimong, a tšepa hore Jehova o tla mo fa seo a se hlokang. Ha a e bula ka mor’a lihora tse seng kae, bareki ba ne ba tla ka bongata. O ile a bona bonnete ba mantsoe a ho Matheu 6:33 ’me a lula a tšepahala ho isa lefung.

Ka lekhetlo le leng, moruti e mong oa moo o ile a ea ho monna eo ’na le baromuoa ba bang ba bahlano re neng re hirile ha hae, ’me a mo bolella hore haeba a tsoela pele ho re hirisetsa ntlo, eena le mosali oa hae ba tla khaoloa kerekeng. Mong’a ntlo eo, eo e neng e le rakhoebo ea hlaheletseng, o ne a se a ntse a tennoe ke boitšoaro ba baruti, kahoo a se ke a mo mamela. O ile a bolella moruti eo hore ha a na taba leha a ka lelekoa kerekeng. A re tiisetsa hore re ka tsoela pele ho lula moo hafeela re ntse re batla ho lula teng.

Motse-moholo San Salvador, moromuoa e mong o ne a ithuta Bibele le mosali ea nyetsoeng ke moenjiniere ea bitsoang Baltasar Perla. Monna eo ea pelo e ntle o ne a se a feletsoe ke tumelo ho Molimo ka lebaka la boikaketsi ba baeta-pele ba bolumeli. Empa ha ho hahoa ofisi ea lekala, Baltasar o ile a ithaopela ho etsa lipolane le ho haha mohaho oo ntle ho tefiso le hoja e ne e e-s’o be Paki.

Ka mor’a hore a sebetse le batho ba Jehova kahong eo, Baltasar o ile a kholiseha hore o fumane bolumeli ba ’nete. O ile a kolobetsoa ka la 22 July, 1955, ’me mosali oa hae Paulina, a kolobetsoa nakoana ka mor’a moo. Bana ba bona ba babeli ba ntse ba sebeletsa Jehova ka botšepehi. Mora oa hae, e leng Baltasar, Jr., o se a qetile lilemo tse 49 a sebeletsa Bethele ea Brooklyn, moo a tšehetsang mosebetsi oa boboleli o hōlang ka potlako lefatšeng ka bophara ’me hona joale ke setho sa Komiti ea Lekala, United States. *

Ha re qala ho tšoara likopano San Salvador, Mor’abo rōna Perla o ile a re thusa ho fumana holo e khōlō eo kopano e ka tšoareloang ho eona. Qalong, re ne re sebelisa litulo tse seng kae feela; empa ka tlhohonolofatso ea Jehova, re ile ra ’na ra eketseha selemo le selemo ho fihlela re tlala holo eo ’me e se e bile e sa re lekane! Ha ke le likopanong tseo, ke ne ke khona ho kopana le batho bao ke neng ke ithuta Bibele le bona. U ka inahanela hore na ke ne ke ikutloa joang ha ba mpontša batho ba sa tsoa kolobetsoa bao ba ithutang le bona!

Kopanong e ’ngoe, mor’abo rōna e mong o ile a tla ho ’na, a re ho na le seo a batlang ho mpolella sona. Ke ne ke sa mo tsebe empa ke batla ho utloa hore na o re’ng. O ile a re: “Ke ne ke le e mong oa bashanyana ba ileng ba le betsa ka majoe Santa Ana.” Joale le eena o ne a se a sebeletsa Jehova! Ke ile ka thaba haholo. Puisano eo e ile ea nkholisa hore tšebeletso ea nako e tletseng e putsa ka ho fetisisa.

Ke ile ka etsa mosebetsi oa boromuoa ka lilemo tse ka bang 29, El Salvador, ka qala ke le motseng oa Santa Ana, ka fetela Sonsonate, ka ntan’o ea Santa Tecla, ’me ka qetella San Salvador. Ka 1975, ka  mor’a ho nahanisisa taba ena le ho e rapella, ke ile ka etsa qeto ea ho tlohela tšebeletso ea boromuoa eaba ke khutlela Spokane. Batsoali ba ka ba seng ba hōlile ba ne ba hloka thuso.

Ha Ntate a hlokahala ka 1979, ke ile ka hlokomela ’Mè ea neng a se a fokola a bile a sa khone ho iketsetsa letho. O ile a qeta lilemo tse robeli ka mor’a moo, ’me a hlokahala a le lilemo li 94. Nakong eo e thata, ke ile ka hatelleha haholo. Ka lebaka la khatello ea maikutlo ke ile ka ba ka tšoaroa ke boloetse ba lebanta. Empa ka thapelo le tšehetso e lerato ea Jehova ke ile ka khona ho phahama, ’me ka mamella teko eo. Ho joalokaha Jehova a re, ‘ho isa bohlooho-putsoeng ba hao ke tla ’ne ke u nke ’me ke u mamelle ’me ke u pholose.’—Esa. 46:4

Ka 1990, ke ile ka fallela Omak, Washington. Ha ke le moo ke ile ka boela ka ikutloa ke phetha mosebetsi oa bohlokoa tšimong ea Sepanishe, ’me batho ba ’maloa bao ke neng ke ithuta Bibele le bona ba ile ba kolobetsoa. Ka November 2007, ke ile ka fallela foleteng e motseng o haufi oa Chelan, Washington, kaha ke ne ke se ke sitoa ho hlokomela lehae la ka, Omak. Phutheho ea mona ea Sepanishe esale e ntlhokomela ho tloha ha ke fihla, ’me ke ananela sena haholo. Kaha ke ’na feela Paki ea leqhekoana mona, bara le barali babo rōna ba ntšoara ka mosa joaloka “nkhono” oa bona.

Le hoja ke ile ka khetha ho se nyaloe le ho se be le bana e le hore ke etse tšebeletso ea ka ka botlalo “ntle ho tšitiso,” ke na le bana ba bangata ba moea. (1 Bakor. 7:34, 35) Ke ile ka ipolella hore tsamaisong ena ea lintho, nke ke ka ba le ntho e ’ngoe le e ’ngoe. Kahoo ke etelelitse lintho tsa bohlokoa pele—e leng ho inehela tšebeletsong ea Jehova ka ho feletseng. Lefatšeng le lecha ke tla ba le nako e ngata ea ho thabela lintho tsena tse ling kaofela tse ntle. Temana eo ke e ratang ka ho fetisisa ke Pesaleme ea 145:16 e re tiisetsang hore Jehova o tla “khotsofatsa takatso ea ntho e ’ngoe le e ’ngoe e phelang.”

Hona joale ke lilemo li 91, ’me ke sa totoba kahoo ke ntse ke bula maliboho. Tšebeletso ea bopula-maliboho e mpha morolo ’me e etsa hore ke be le morero bophelong. Ha ke fihla El Salvador, e ne e le hona mosebetsi oa boboleli o qalang. Ho sa tsotellehe khanyetso ea Satane e sa eeng moriting, hona joale ho na le bahoeletsi ba fetang 39 000 naheng eo. Taba ena e matlafalitse tumelo ea ka haholo. Ho hlakile hore Jehova o tšehelitse ka moea oa hae o halalelang boiteko boo batho ba hae ba bo etsang!