“’Na Jehova Molimo oa Lōna Kea Halalela”
Atamela ho Molimo
“’Na Jehova Molimo oa Lōna Kea Halalela”
“OA HALALELA, oa halalela, oa halalela Jehova Molimo.” (Tšenolo 4:8) Ka mantsoe ana Bibele e bontša hore Jehova oa halalela ’me seo se akarelletsa hore ha a na sekoli le hore o hloekile ka tsela e phahameng ka ho fetisisa. Ho hang Molimo hase moetsalibe; a ke ke a silafatsoa kapa a qaphaletsoa ke sebe ka tsela leha e le efe. Empa na seo se bolela hore batho ba sa phethahalang ha ba na tšepo ea ho ba le kamano le Molimo ea halalelang ka ho fetisisa? Le hanyenyane! A re hlahlobeng mantsoe a fanang ka tšepo a tlalehiloeng ho Levitike khaolo ea 19.
Jehova o ile a re ho Moshe: “Bua le phutheho eohle ea bara ba Iseraele.” Mantsoe a latelang a ne a lebisitsoe ho e mong le e mong sechabeng. Moshe o ne a lokela ho re’ng ho bona? Molimo a tsoela pele a re: “U re ho bona, ‘Le lokela ho halalela, hobane ’na Jehova Molimo oa lōna kea halalela.’” (Temana ea 2) Moiseraele e mong le e mong o ne a lokela ho bontša khalalelo. Mantsoe a reng “le lokela” a bontša hore seo e ne e se khothaletso feela empa e ne e le taelo. Na Molimo o ne a batla hore ba etse seo ba ke keng ba se khona?
Hlokomela hore ha Jehova a re oa halalela, o ne a sa bolele hore batho ba lokela ho lekana le eena ka khalalelo, ho e-na le hoo o ne a bontša lebaka leo a neng a fana ka taelo eo ka lona. Ka mantsoe a mang, Jehova o ne a sa re barapeli ba hae ba sa phethahalang Iseraeleng ba halalele joaloka eena. Seo se ne se ke ke sa etsahala. Jehova, “Ea Halalelang ka ho Fetisisa,” o phahametse bohle ka khalalelo. (Liproverbia 30:3) Leha ho le joalo, kaha Jehova oa halalela, o lebeletse hore barapeli ba hae ba halalele ka hohle kamoo ba ka khonang le hoja e le batho ba sa phethahalang. Ba ne ba ka bontša hore baa halalela ka litsela life?
Ka mor’a hore a fane ka taelo ea hore ba halalele, Jehova o ile a roma Moshe hore a ba bolelle lintho tseo ba lokelang ho li etsa likarolong tsohle tsa bophelo. Moiseraele e mong le e mong o ne a lokela ho mamela melao ea boitšoaro e kang ena: a hlomphe batsoali le ba hōlileng (temana ea 3 le 32); a nahanele ba sa utloeng litsebeng, ba sa boneng le ba bang ba hlorileng (temana ea 9, 10 le 14); a tšepahale ’me a sebelisane le ba bang ka toka (temana ea 11-13, 15, 35 le 36) le hore a rate barapeli-’moho le eena joalokaha a ithata. (Temana ea 18) Ka ho mamela melao ena le e meng e boletsoeng, Moiseraele o ne a bontša hore ‘ruri oa halalela ho Molimo oa [hae].’—Numere 15:40.
Taelo e mabapi le khalalelo e re tsoela molemo haholo kaha e re thusa ho lemoha litsela tsa Jehova Molimo le hore na o nahana joang. Taba ea pele, re ithuta hore e le hore re be le kamano e haufi le eena, re lokela ho etsa sohle se matleng a rōna hore re phele ka melao ea hae e halalelang ea boitšoaro. (1 Petrose 1:15, 16) Ka ho khomarela melao eo, re ka thabela bophelo bo molemo ka ho fetisisa.—Esaia 48:17.
Taelo ea hore re halalele e boetse e bontša kamoo Jehova a tšepang barapeli ba hae kateng. Jehova ha aa lebella hore re etse se ka holimo ho matla a rōna. (Pesaleme ea 103:13, 14) Oa tseba hore kaha re entsoe ka setšoantšo sa hae, re ka khona ho ithuta ho halalela ho isa bohōleng bo itseng. (Genese 1:26) Na see ha se u susumelletse hore u ithute haholoanyane hore na u ka atamela haufi le Jehova Molimo ea halalelang joang?
[Setšoantšo se leqepheng la 9]
Re ka khona ho ithuta ho halalela