Ke Mang ea Lokelang ho Ruta Bana ka Molimo?

“Morutuoa ha a ka holimo ho mosuoe oa hae, empa e mong le e mong ea rupetsoeng ka ho phethahetseng o tla ba joaloka mosuoe oa hae.”—LUKA 6:40.

BATSOALI ba bang ba ikutloa ba sa tšoanelehe hore ba ka ruta bana ba bona ka Molimo. E ka ’na eaba ba nahana hore ha baa ruteha kapa ha ba tsebe ho le hokaalo ka litaba tsa bolumeli e le hore ba rute bana hantle. Ka lebaka leo, ba ka ’na ba batla hore bana ba bona ba rutoe ke mong ka bona kapa moruti.

Leha ho le joalo, ke mang ea loketseng ka ho fetisisa ho ruta bana ’nete ka Molimo haesita le melao ea boitšoaro? Ak’u hlahlobe seo Bibele e se rutang tabeng ena, ’me u bapise thuto eo le seo bafuputsi ba se fumaneng.

Boikarabelo ba Ntate ke Bofe?

Seo Bibele e se rutang: “Lōna bo-ntat’a bana, le se ke la khentša bana ba lōna, empa le ba hōlisetse Morena ka ho ba khalemela le ho ba ruta hantle.”—Baefese 6:4, “Bibele—Phetolelo e Ncha.”

Seo bafuputsi ba se fumaneng: Bo-ntate ba rua molemo joang ha ba hlaolela ho ba le tumelo e matla? Sehlooho se hatisitsoeng ka 2009, se reng Fathers’ Religious Involvement and Early Childhood Behavior, se ile sa re: “Ho ba bolumeling bo itseng ho ka thusa banna hore e be bo-ntate ba molemo. Bolumeli bo fa batho tšehetso le taolo e itseng bophelong, bo bile boa ba  ruta le ho ba fa tataiso ea hore na ba phele joang.”

Bibele e hatella taba ea bohlokoa ea hore bo-ntate ba lokela ho hōlisa bana ba bona ba be ba ba rute. (Liproverbia 4:1; Bakolose 3:21; Baheberu 12:9) Empa na taelo ee e sa sebetsa le kajeno? Ka 2009, Univesithi ea Florida e ile ea hatisa sehlooho se neng se tšohla kamoo bo-ntate ba bileng le tšusumetso kateng baneng ba bona. Bafuputsi ba ile ba fumana hore bana bao bo-ntate ba bona ba neng ba kentse letsoho ka ho feletseng ho ba hōlisa ba ne ba batla ba e-na le kutloelo-bohloko haholoanyane ba bile ba sa inke ba se na thuso. Bashanyana ba ne ba sa opise hlooho hakaalo, athe banana ba ne ba batla ba tsitsitse maikutlong. Ntle le pelaelo, keletso ea Bibele e ntse e sebetsa le kajeno.

Boikarabelo ba ’Mè ke ba Bohlokoa Hakae?

Seo Bibele e se rutang: “U se ke ua furalla molao oa ’m’ao.”—Liproverbia 1:8.

Seo bafuputsi ba se fumaneng: Ka 2006, Handbook of Child Psychology e ile ea re: “Ka karolelano, bo-’mè ba qeta nako e etsang 65% ho ea ho 80% ba e-na le bana ba bona ho feta bo-ntate, le hona ba ipha nako ea ngoana ka mong, ho bonahala sena e le se etsahalang le linaheng tse ngata.” Ha ngoana a qeta nako e ngata joalo le ’mè oa hae, o angoa haholo ke lipuo tsa hae, liketso tsa hae, esita le boikutlo ba hae.

Ha ntate le ’mè ba tšoarisane tabeng ea ho ruta bana ba bona ’nete ka Molimo, ba ba fa bonyane limpho tse peli tsa bohlokoa. Ea pele, bana ba fumana monyetla oa ho theha kamano e ntle le Ntate oa bona ea leholimong, e leng kamano e ka ba tsoelang molemo bophelo ba bona kaofela. Ea bobeli, bana ba ithuta mohlaleng oa batsoali hore na ntate le ’mè ba lokela ho sebelisana joang e le hore ba finyelle lipakane tsa bohlokoa. (Bakolose 3:18-20) Le hoja ba bang ba ka ’na ba thusa, ho salang ke hore batsoali ke bona ba nang le boikarabelo ba ho ruta bana ba bona ka Molimo le hore na Molimo o batla hore litaba tsa lelapa li tsamaisoe joang.

Leha ho le joalo, batsoali ba lokela ho ruta bana ba bona joang? Ke mekhoa efe e ka atlehang?