BIBELE e re: “Ha ho motho ea boneng Molimo ka nako leha e le efe.” (Johanne 1:18) Molimo o khanya hoo ho se nang sebōpuoa leha e le sefe sa nama le mali se ka mo bonang ’me sa phela. (Exoda 33:20) Leha ho le joalo, ho latela litlaleho tse ling, Jehova o ile a etsa hore banna ba itseng ba be le pono ka se leholimong. E mong oa banna bao e ne e le moprofeta Daniele. Ha ho pelaelo hore seo a ileng a se bona se ile sa etsa hore a be le tšabo e nang le tlhompho, e leng boikutlo boo le rōna re lokelang ho ba le bona. Hlokomela kamoo Daniele a hlalosang seo a ileng a ba le tokelo ea ho se bona ponong. *—Bala Daniele 7:9, 10.

“Moholo-holo oa Matsatsi.” Tlotla “Moholo-holo oa Matsatsi,” eo e leng Daniele feela ea e sebelisang e bontša “motho ea hōlileng lilemong.” (Daniele 7:9, 13, 22) Jehova o lilemo li kae? Kaha ke “Morena oa bosafeleng,” esale a le teng ka ho sa feleng ho isa ka ho sa feleng. (1 Timothea 1:17; Juda 25) Hore ebe Molimo o teng ka ho sa feleng ho re tiisetsa hore bohlale ba hae ha bo na meeli, kaha Bibele e amahanya bohlale le ba hōlileng. (Jobo 12:12) Ke ’nete, ha ho bonolo hore likelello tsa rōna tse fokolang li utloisise khopolo ea bosafeleng. Empa na ka sebele re ka lebella hore re utloisise ka ho feletseng Molimo eo bohlale ba hae bo ke keng ba bapisoa?—Baroma 11:33, 34.

Hlokomela hore Moholo-holo oa Matsatsi ‘o ile a lula fatše.’ Ka morero ofe? Litemana tse potolohileng taba li fana ka tataiso ka hore li sebelise mantsoe a kang “Lekhotla” le “kahlolo.” (Daniele 7:10, 22, 26) Kahoo, ponong eo Jehova o ne a lutse fatše e le Moahloli. O ne a tla ahlola bo-mang? Lichaba tsa lefatše, tseo pejana li ileng tsa hlalosoa e le libata ponong ea Daniele. * (Daniele 7:1-8) Jehova ke Moahloli ea joang?

“Liaparo tsa hae li ne li le tšoeu joaloka lehloa, ’me moriri oa hlooho ea hae o ne o le joaloka boea bo hloekileng.” ’Mala o mosoeu o tšoantšetsa ho loka le bohloeki. Boemong ba bona ba tlhaho, boea ba nku bo ka ba bosoeu. Kahoo, moriri o tšoanang le boea ba nku o ne o tla ba mosoeu. Na u ka inahanela hore na Daniele o ile a bona eng? Na u bona Moahloli ea hlooho e tšoeu, eo mohlomong a apereng seaparo se selelele sa ka holimo se bosoeu ba lehloa? Mokhabo-puo ona o re tiisetsa hore likahlolo tsa Jehova li lokile ebile li bontša bohlale. Ke Moahloli eo re lokelang ho mo tšepa ka ho tebileng le ho mo hlompha.

“Ho ne ho e-na le ba likete tse sekete ba ntseng ba mo sebeletsa, le ba likete tse leshome tse iphetileng ka makhetlo a likete tse leshome ba ntseng ba eme ka pel’a hae.” Basebeletsi baa ba leholimong ke bo-mang? Bibele e tsebahatsa mangeloi e le “basebeletsi ba [Molimo].” (Pesaleme ea 104:4) Mangeloi a Molimo ao mohlomong a leng limilione tse makholo, a tšoarehile ka ‘ho phetha taelo ea hae’ le ‘ho etsa thato ea hae.’ (Pesaleme ea 103:20, 21) Na boo hase bopaki bo bong ba hore bohlale ba Molimo ha bo na meeli? Ke mang ha e se Jehova feela ea neng a ka khona ho etella pele lebotho le hlophisehileng hakaalo le le tšoarehileng ka lilemo tse ngata hakaalo?

Pono ea Daniele e re susumelletsa hore re tšepe Jehova, Moholo-holo oa Matsatsi. Likahlolo tsa hae li lokile ’me bohlale ba hae ke bo ka tšeptjoang. Ke hobane’ng ha u sa ithute ka ho eketsehileng mabapi le kamoo u ka atamelang ho Molimo ea nang le bohlale bohle?