Nahana ka ntate ea buang le mora oa hae ea lilemo li supileng. O re, “Khale koana, Molimo o ile a bōpa lefatše le lintho tsohle tse ho lona, a bōpa le letsatsi, khoeli le linaleli.” Moshanyana o nka metsotso e seng mekae a ntse a nahana ka taba ena ebe oa botsa, “Ntate, ke mang ea bōpileng Molimo?”

Ntate oa hae o re: “Ha ho na motho ea mo bōpileng. Haesale a le teng.” Karabo eo e bonolo e khotsofatsa ngoana ka nako eo. Leha ho le joalo, ha a ntse a hōla potso ena e ntse e mo tšoenya. O bona ho le thata ho utloisisa hore ho ka ba le motho ea se nang qalo. Hoa makatsa hobane le sepakapaka se na le qalo. Oa ipotsa o re: ‘Molimo o bōpiloe ke mang?’

Bibele e araba potso eo joang? Ha e le hantle e e araba ka tsela e tšoanang le eo ntate ea mohlaleng oa rōna a ileng a e araba ka eona. Moshe o ile a re: “Jehova, . . . pele lithaba li tsoaloa kapa u qala ho hlahisa lefatše le naha e behang, . . . esita le ho tloha nakong e sa lekanyetsoang ho isa nakong e sa lekanyetsoang u Molimo.” (Pesaleme ea 90:1, 2) Ka ho tšoanang, moprofeta Esaia o ile a re: “Na ha ua tseba kapa ha ua utloa? Jehova, ’Mōpi oa lipheletso tsa lefatše, ke Molimo ho isa nakong e sa lekanyetsoang”! (Esaia 40:28) Ka ho tšoanang, lengolo la Juda le re Molimo o bile teng ka “nako eohle e fetileng e hlokang qalo.”—Juda 25.

Mangolo ao a re bontša hore Molimo ke “Morena oa bosafeleng,” e leng kamoo moapostola Pauluse a mo hlalosang kateng. (1 Timothea 1:17) Sena se bolela hore haesale Molimo a le teng ho tloha khale. Ebile o tla lula a le teng. (Tšenolo 1:8) Kahoo, ho ba teng ha hae ka ho sa feleng ke tšobotsi e ka sehloohong ea Ea Matla ’Ohle.

Ke hobane’ng ha ho le thata ho utloisisa taba ee? Re phela nako e khutšoanyane, kahoo re utloisisa nako ka tsela e fapaneng hōle le eo Jehova a e utloisisang ka eona. Kaha Molimo o phela ka ho sa feleng, ho eena lilemo tse sekete li lekana le letsatsi. (2 Petrose 3:8) Ka mohlala: Na lerutle le phelang matsatsi a 50 feela le ka utloisisa ha ho thoe motho o phela lilemo tse 70 kapa tse 80? Le hanyenyane! Kahoo, Bibele e bolela hore re tšoana le marutle ha re bapisoa le ’Mōpi e Moholo. Esita le matla a rōna a ho nahana aa fokola ha a bapisoa le a hae. (Esaia 40:22; 55:8, 9) Kahoo, ha ho makatse hore ebe ho na le litšobotsi tsa Jehova tseo motho a ke keng a li utloisisa ka botlalo.

Le hoja ho ka ba thata hore re utloisise hore Molimo o phela ka ho sa feleng, rea bona hore hoa utloahala. Haeba ho ne ho e-na le motho ea bōpileng Molimo, motho eo e ne e tla ba ’Mōpi. Empa, joalokaha Bibele e bolela, Jehova ke eena ea ‘bōpileng lintho tsohle.’ (Tšenolo 4:11) Ho feta moo, rea tseba hore ho na le nako eo sepakapaka se neng se le sieo. (Genese 1:1, 2) Se bile teng joang? Se lokela ho ba le ’Mōpi. Le eena o bile teng pele ho e-ba le libōpuoa tsohle tse bohlale tse akarelletsang Mora oa hae ea tsoetsoeng a ’notši le mangeloi. (Jobo 38:4, 7; Bakolose 1:15) Ho hlakile hore qalong o ne a le mong. Kahoo, ha ho na motho ea neng a ka mo bōpa.

Hore ebe rea phela le hore ebe sepakapaka se teng ho tiisa hore ho na le Molimo ea phelang ka ho sa feleng. Ea entseng sepakapaka se seholo le melao e se laolang, e tlameha ebe haesale a le teng. Ke eena ea neng a ka fa ntho e ’ngoe le e ’ngoe bophelo.—Jobo 33:4.