SEHLOOHO SE KA NTLE | NA MOLIMO OA U TSOTELLA?
Na Molimo oa U Tsotella?
‘Ke hlorile ’me ke futsanehile. E se eka Jehova a ka nkela hloko.’ *—DAVIDA OA MOISERAELE, OA MEHLENG EA BOHOLO-HOLO.
Na hoa utloahala hore Davida o ne a ka lebella hore Molimo a mo tsotelle? Na Molimo oa u tsotella? Batho ba bangata ha ba lumele hore Molimo ea matla ’ohle oa ba tsotella. Hobane’ng?
Lebaka le leng ke hore Molimo o phahametse batho hōle. Ha Molimo a le boemong ba hae bo phahameng ’me a talima lichaba tsohle, “li joaloka lerotholi ka nkhong; ’me li lekantsoe joaloka lerōle sekaleng.” (Esaia 40:15) Mongoli e mong oa mehleng ena ea sa lumeleng ho Molimo o entse qeto ea hore “ke ho ithetsa ho lumela hore ho na le Molimo ea tsotellang seo u se etsang.”
Ka lehlakoreng le leng, batho ba bang ba nka hore boitšoaro ba bona bo etsa hore Molimo a se ke a ba tsotella. Ka mohlala, monna e mong ea bitsoang Jim, o re: “Kamehla ke ne ke rapella hore ke be le khotso le boitšoaro, empa ho e-s’o ee kae ke iphumana ke se ke halefile. Qetellong, ke ile ka etsa qeto ea hore ke khopo haholo hoo Molimo a ke keng a nthusa.”
Na Molimo o hōle le batho hoo a ke keng a ba tsotella? Ha e le hantle o ikutloa joang ka libōpuoa tsa hae tse sa phethahalang? Ntle le hore Molimo a itšenole ho rōna, ha ho motho ea ka buellang Molimo ’me a araba lipotso tseo. Leha ho le joalo, Bibele e leng molaetsa oo Molimo a o ngoletseng batho—e re tiisetsa hore Molimo ha a hōle le rōna ebile o tsotella batho. “Ha e le hantle,” Bibele e re ha a “hōle le e mong le e mong oa rōna.” (Liketso 17:27) Lihloohong tse ’nè tse latelang, re tla tšohla seo Molimo a re bolellang sona ka lerato leo a le bontšang batho le kamoo a ileng a bontša lerato le joalo ho batho ba tšoanang le uena.
^ ser. 3 Pesaleme ea 40:17; Jehova ke lebitso la Molimo le ka Bibeleng.